Read njo 1 SAMUEL 25 Bible Online

1 SAMUEL 25 - njo bible

1 SAMUEL 25

¹Tang Samuel asü; aser Israel ajak külemi sentepa pa asoshi mang ayim, aser pa par kidang Rama nung arem. Aser Dawidi aramesoa Paran aremi alu.

²Maon nung takar nisung ka liasü, shiba Karmel nung shishilemba mapa inyaka liasü, pa san meyi asem aser nabong meyi ka liasü, pai Karmel nung item nungi tezüngsa mejep.

³Pa tenüngji Nabal, Kaleb kidong nungi liasü. Pa tebutsü Abigail kanga tesangra aser tobur tajung, saka la kinungpuji yazü majung aser mit tetoktok liasü.

⁴Nabali par san tezüng mejeper ta Dawidi arem nung angashi.

⁵Dawidi asangur ter yoka, parnok dangji ashi, “Nenok Karmeli tuang, aser Nabal dangi oa kü tenüng nung pa nem salem agüjang.

⁶Aser yamaji nenoki azükarua alisang dang ashitsü, Na aser ner kibong anaprong tesünep sang, aser na akaba ajak tesünep sang.

⁷Na san tezüng mejepdak lir ta angashir; ne sannükertem tang onok den liasü, aser onoki parnok mak mesüdaktsü, Karmel nung parnok aliba mapang tepiyong parnok meyong kecha mesamatsü.

⁸Ne asangurtem dang asüngdangang, parnoki ne dang ashitsü, anungji ne nükdang kü asangurtem yimli ngudakjangma; kechiyong onok benjong anogo tajung ka nung arur; yimlibilema, ne keti kechisa arudir ne tenzükertem aser ne chir Dawid nem agüjangma.”

⁹Kodang Dawider asangurtem aru, parnoki Nabal dang Dawid tenüng nung item o ajak jembi, aser ajemajema ali.

¹⁰Nabali Dawid tenzükertem dang langzü, “Dawid shiba? Aser Yesse chir shiba? Tanü asüng alar jenti pei kibur nungi jenzüka aor.

¹¹Ajangla ni kü amtsük aser tzü kü san tezüng mejepertem asoshi tepsetba shi ni memetetba nisung nem agütsütsü no?”

¹²Anungji Dawider asangurtem parnok lenmangi meyipa arua pa dang item ajakji ashi.

¹³Dawidi pei nisungtem dang ashi, “Nenok nisung shia pei nok semang.” Aser parnok nisung shiai nok asem; aser Dawida pei nok asem; aser Dawid sülen nisung noklang pezü shi atu; aser noklang ana oset-tsüset den ali.

¹⁴Saka asangur rongnung kati Nabal kibutsü Abigail dang ya oda ashi, “Ajiang, Dawid arem nungi asen kibur nem salem agütsütsü osang abenertem yok; aser pai parnok sensatsü.

¹⁵Saka parnoki onok dang kanga junga benshiogo, onok moapu nung kopiga liasü parnokji onok medemer liasü, onok mak mesüdaktsü mesüra onok kecha mesamadaktsü:

¹⁶san nüka onok parnok den aliba mapang tepiyong onok asoshi aonung aser anüngdang parnokji jara ama liasü.

¹⁷Tang anungji nai kechi inyaktsü metetang aser shisadangangma; kechiyong ozü kibur anema aser pa kibong ajak anema tamajung inyaktsü mulungteta lir; kechiyong pa dang shingaia o kata meshitettsüsa pa kümli majung lir.”

¹⁸Idangji Abigaili ilunga amtsük noklang ana, yi mori ana, aser san pungu asang, aser jang atakba tatakzük pungu, tsükmenatzü tejep noklang ka, aser munguzünu amtsük noklang ana, itemji gado nung oshitsü.

¹⁹Aser lai asangurtem dang ashi, “Kü jakdang oang; ajiang, ni nenok sülen arur;” saka lai la kinungpu Nabal dang kecha mashi.

²⁰La gado nung mener tenem kübok leni aludang, ajiang, Dawid aser pa nisungtem la jakdang alu; aser lai parnok ajuru.

²¹Tang Dawidi ya oda shia liasü, “Atangji amajok nung ni iba nisung akaba ajak arem nung nüka liogo, anungji pa akaba kecha mesama: aser paibo tajung melen tamajung shia agütsür.

²²Asüngnep tashi nung pa akaba ajak oda tebur chanu ka danga ni tokja lira, Tsüngremi yamaji mesüra tali Dawid dak inyakangma.”

²³Kodang Abigaili Dawid angu, lai ilunga gado nungi alu, aser Dawid madang la tejak mechioka ali nung apudak.

²⁴Lai pa tsüngdang apudaka ashi, “Kü madak kü kibur taiji liangma: aser ne kilitsüri yimlibilema, ne narong nung jembidakjangma, aser ne kilitsür o angangma.

²⁵Ni ne dang mepishir, kü kiburi iba samesa nisung oda Nabal tezüngshima: kechiyong pa tenüng amaji pa lir; pa tenüng Nabal lir, aser pa dak tamashi lir: saka ni ne kilitsüri nai yokba kü kibur asangurtem mangu.”

²⁶“Anungji tang kü kibur KIBUBA taküm ali nungji, aser na taküm ali nungji, azü tokshiba nungi aser ne ket agi mang ayangtsü KIBUBAi sota ali nung, tang aji asünung ne tsükchirtem aser shirnoki kü kibur anema tamajung bushir, Nabal ama sangma.

²⁷Aser tang iba sempet koba ne kilitsüri bener kü kibur dangi aru, aji kü kibur sülen anitakba asangurtem nem agüjangma.

²⁸Yimlibilema ne kilitsüri aibelenba tai tokangma: kechiyong KIBUBAi kü kibur kibong takang ka kümdaktsütsü, kechiyong kü kiburi KIBUBA tongbang rarar, aser ne dak ne taküm tepiyong tamajung mangutsü.

²⁹Aser nisungi na arishitsü aser ne taküm bushitsü adokaka, teka nung kümzüka kü kibur takümbo KIBUBA ne Tsüngrem alitsü; aser tsükchirtem takümbo lung lijak nungi ama pai endoktsü.

³⁰Kodang KIBUBAi kü kibur dang tajung ajak ne indang jembiba ama inyakdir, aser Israel madak na chuba shimtetdir;

³¹oda kecha masü nung nai azü tokshiba, mesüra kü kiburi pei sasa pei ket agi mang ayang ta idangji kü kibur atema temulung zürepba, mesüra temulungjang nung temetsüdaktsü malitsü; aser kodang KIBUBAi ne dang junga benshidir, idangji ne kilitsüra bilemtetangma.”

³²Dawidi Abigail dang ashi, “KIBUBA, Israel Tsüngrem shibai tanü na kü lenji yok, temoatsü sang:

³³aser ne shisatsü temoatsü sang, koba agi tanü ni azü tokshiba tai aser kü sasa kü ket agi mang ayangba nungi ni sota ayu.

³⁴Kechiyong atangji KIBUBA Israel Tsüngrem taküm ali nungji, na ilunga maru asübo, ne dak tamajung inyaktsü aliba nungi shibai ni sotla aser anepdang sangwadang Nabal asoshi tebur chanu ka danga anünga melila.”

³⁵Anungji pa asoshi lai bener aruba la ket nungi Dawidi agizük, aser pai la dang ashi, “Ner kidangi tesünep nung tuang; ajiang, ni ne ola angaogo, aser na agizükogo.”

³⁶Abigail Nabal dangi aru; aser ajiang, pai par kidang benjong ka, chubar benjong mesüka yanglua liasü; Nabal yi agi mesepa pa mulungjang kanga pela-a liasü; anungji anepdang sangwa matong tashi lai pa dang kecha mashi.

³⁷Anepdang kodang Nabal nungi yiji oadoker liasü, pa kinungtsüi pa dang item ajak ashi, aser pa süchia oadok, aser pa lung ama aküm.

³⁸Iba sülen anogo ter lir KIBUBAi Nabal dak azük nung pa asü.

³⁹Kodang Dawidi Nabal süogo ta angashi, pai ashi, “KIBUBA shibai kü maksü Nabal dak mang ayang, aser pei kilir tamajung nungi sota ayu, temoatsü sang aser Nabal tamajung inyakba pa pei kolak manung meyipa KIBUBAi agütsüogo.” Aser Dawidi pa kibutsü asütsü yoka Abigail indang jembitep.

⁴⁰Kodang Dawid kilirtem Karmeli Abigail dangi aru, parnoki la dang ashi, “Na Dawid kibutsü asütsü, pa dangi anir aotsü onok ne dangi yok.”

⁴¹Lai aramesoa la tejak alilen mechiok, aser ashi, “Ajiang, ne kilitsür ne kibur tenzükertem tetsüng shitoktsütsü kilir ka dang lir.”

⁴²Abigaili ilunga aramesoa gado ka nung amen, aser lar kilitsür pungu la sülen anitak; aser Dawid osang abenertem sülen la ao, aser pa kibutsü aküm.

⁴³Ano Dawidi Yezreel nunger Ahinoam agi; aser tenaprongla pa kinungtsü aküm.

⁴⁴ Tang Sauli pei jala Mikal Dawid kinungtsü Gallim nunger Lais jabaso Palti nem agütsür liasü.