Read njo 1 SAMUEL 26 Bible Online

1 SAMUEL 26 - njo bible

1 SAMUEL 26

¹ Zif nunger kar Saul dangi Gibeai arua ashi, “Dawid ozü litsü lisem lima Yeshimon jakdang Hakila tenem nung atsüka lir.”

²Idangji Sauli aramesoa Israel teshimtet nisung meyi asem anir Dawid bushitsü Zif aremi alu.

³Aser lisem lima Hakila tenem nung Sauli tanendak yanglu koba Yeshmon jakdang liasü. Saka Dawid arem nung ali, aser Saul pa sülen aremi aru ta pai angu.

⁴Anungji Dawidi itdangiter yok, aser atangji Saul arua lir ta angatet.

⁵Dawidi aramesoa Saul tanendaki aru; aser Saul o pa temeranger telok tanishir Ner chir Abner kong liasü, aji angu; aser Saul talungtsü alidak telung len salu tsüki kübok anen, aser temerangertemi pa meketa tanendak yanglu.

⁶Idangji Het nunger Ahimelek aser Yoab adianu Zeruia chir Abishai dang Dawidi ashi, “Shiba kü den Saul dangi tanendaki alutsü?” Abishai ashi, “Ni ne den alutsü.”

⁷Anungji Dawid aser Abishai nisungtem dangi aonung aru; aser ajiang, Sauli pei nü pa tekolak anasa ali nung songtaka yur pa talungtsü alidak meketa mejanga ali: aser Abner aser pa nisung pa meketa liasü.

⁸Idangji Abishai Dawid dang ashi, “Tanü Tsüngremi ne tsükchir ne ket nung bendanga agütsüogo anungji tang ne dang mepishir, nü jagi ali nung tsüngloka ni pa dak khen dang tsüngdi, aser ni tanabenbo pa dak matsüngtsü.”

⁹Dawidi Abishai dang ashi, “Pa tetepset kechiyong KIBUBAi mezüja shimtetba anema teka asang nung tai makai litettsü no?”

¹⁰Dawidi ashi, “KIBUBA taküm ali nungji KIBUBAi pa dak azüktsü mesüra pa tasütsü anogo agi atongtsü; mesüra pa tongbangi alutsü, aser samatsü.

¹¹ KIBUBAi mezüja shimtetba anema ni kü teka masangtsü songtemangma: saka tang ni ne dang mepishir, pa tekolak tsüngdang aliba nü aser tzü bongdangji benang aser asenoki odi.”

¹²Anungji Dawidi Saul nungi nü aser tzü bongdang agi, aser parnok oadok, aser nisung shingaia mangu, mesüra aji memetet, mesüra shinga mesak: kechiyong parnok ajak amua oa liasü: kechiyong KIBUBAi parnok sümanga odaktsü,

¹³Idangji Dawid tipleni apiga or tenem kolak nungji noktak; parnok tsüngda ongdang tuluka liasü.

¹⁴Dawidi nisungtem aser Ner chir Abner dang ayimten, “Abner, nai melangzüker no?” Idangji Abneri langzük aser ashi, “Chuba dang ayimtenba na shiba?”

¹⁵Dawidi Abner dang ashi, “Na tasü tait nisung ka masü no? Na mesüka Israel nung shiba lir? Ajangla nai ne kibur chuba nüka mali asü? Kechiyong pur rongnung kati ne kibur samatsütsü aru.

¹⁶Nai inyakba ya tajungbo masü. KIBUBA taküm ali nungji na asütsü tetemsü, kechiaser KIBUBAi mezüja shimtetba nai nüka maliasü. Aser tang, ajiang, chubar nü aser pa tekolak anasa tzü bongdangto kong ali?”

¹⁷Sauli Dawid ola metet, aser ashi, “Kü chir Dawid, ya ne ola asü?” Dawidi ashi, “Ya kü ola lir, kü kibur, Oh chuba.

¹⁸Aser pai ashi, kechisü nung kü kiburi ne kilir arishir? Ni kechi inyakba asoshi? Mesüra kechi tai kü ket nung lir?

¹⁹Anungji tang ni ne dang mepishir, kü kibur chubai ne kilir o angangma; KIBUBAi ni anema na ajungmeso ta süra pai tenla agizükangma, saka ibai nisung chirtem sürabang, KIBUBA madang parnok atakatem kaoang; kechiaser KIBUBA senmang nung ni matentsüsa tanü ni aridoka ashi, Oang, tangar tsüngremtem külemang.

²⁰Aji asünung tang KIBUBA tsüngdang nungi pila-a oa kü zü ali nung tetsükdaktsüma; kechiyong kari tenem nung ozü bushiba amato, Israel chubai kü taküm bushitsü arua lir.”

²¹Idangji Sauli ashi, “Ni temenen benshiogo; meyipa arung kü chir Dawid, kechiyong joko ni ne dak tamajung meinyaktsü, kechiaser tanü ne nükdang kü taküm senti liasü, ajiang ni suwar jilu ai, aser kanga dang aibelenogo.”

²²Dawidi langzü, “Oh chuba, nüji ajiang! aser asangur rongnung ka arua aji bener oang.

²³KIBUBAi nisung shia nem pa temeshiba aser temulung alemba agütsütsü; kechiyong tanü KIBUBAi na kü ket nung bendanga agütsü, saka KIBUBAi mezüja shimtetba anema ni kü ket mesala.

²⁴Tanü kü tsüngdang ne taküm dang apayu yamaji kü KIBUBA madang apayudakjang, aser pai timtem tejashi ajak nungi ni kümzükdakjangma.”

²⁵Idangji Sauli Dawid dang ashi, “Na temoatsüba sang, kü chir Dawid, nai kechisa inyakdir atangji takok angutsü.” Anungji Dawidi pei lenmangi ao, aser Saul pei talidaki meyipa aru.