Read njo 1 SAMUEL 27 Bible Online

1 SAMUEL 27 - njo bible

1 SAMUEL 27

¹Dawidi pei mulungjang nung ashi, “Tang ni Saul ket nung kenübo samatsü. Filistia nunger linüki jena aitsüba dak alema ni asoshi kecha mali; aser Israel arrtsü ajak nung ni bushitsü Saul tezü atangtsü; yamaji pa ket nungi ni jentettsü.

²Anungji Dawid aramesoa pa den aliba nisung noklang trok anir, Gat chuba Maok chir Akish dangi aenshia ao.

³Aser Dawid Gat nung Akish den ali, aser pa nüburtem nisung shia pei kinunger den aser Dawida pa kinungtsü ana, Yezreel tsür Ahinoam, aser Karmeltsür Abigail, Nabal kinungtsü den ali.

⁴Aser Saul dang Dawid Gati jena ogo ta metetdaktsü; aser pai joko pa mebushi.”

⁵Dawidi Akish dang ashi, “Tang ni ne nükdang yimli ngura, chuba yimti nung, yangi ni alitsüsa talidak ka kü nem parnoki agütsüdakjangma: kechiaser ne kilir kechiba chuba kidang ne den alitsü.”

⁶Idangji iba anogo nung Akishi pa nem Ziklag agütsü; aji asünung tanü tashi Ziklag Yihuda chuba meyong aküm.

⁷Filistia lima nung Dawid küm ka ser ita pezü liasü.

⁸Dawid aser pa nüburtem atu, aser Geshur nunger, Girz nunger, aser Amalek nunger amak; kechiyong Telam nungi Shuri oda Ijip limai aodang, aliba lima nung item kintemji liasü.

⁹Dawidi alimaji amak; aser tebur süshia tetsür süshia anünga meyutsü, aser san, nashi, gado, ut aser sobutsü bener oadok; aser pai Akish dangi meyipa aru.

¹⁰Kodang Akishi asüngdang, “Nenoki tanü shir anema amak?” Dawidi langzü, “Yihuda nung Negeb, mesüra Yerahmeel nung Negeb mesüra Ken nung Negeb anema.

¹¹Dawidi tebur süshia tetsür süshia Gati arutsü taküm metoktsü; yamaji mesüra, Dawidi yamai inyak, ta parnoki asenok indang osang agütsütsü ta bilem; aser Filistia lima nung aliba mapang tepiyong pai iba yimyaji benshi.

¹²Akishi Dawid dak amanga ashi, Pai pei nübur Israel nem jungjunga pa sempatsüsa kümdaktsüogo, aji asünung pa teti kü kilir alitsü.”