Read njo 1 SAMUEL 28 Bible Online

1 SAMUEL 28 - njo bible

1 SAMUEL 28

¹Item anogo nung Filistia nunger Israel den raratsü asoshi temeranger telok atenshi, aser Akishi Dawid dang ashi, “Nai jungjunga metetang, na aser ne nisungtem kü den temeranger telok rongnung aotsüla.”

²Dawidi Akish dang ashi, “Junger, ne kiliri kechi inyaktsü aji nai metettsü.” Akishi Dawid dang ashi, “Junger, teti kü kolak anüker ni na kümdaktsütsü.”

³ Tang Samuel sür liasü, aser Israel ajaki pa asoshi mang ayim, aser pa pei yimti Rama nung arem. Aser linük nungi Sauli ainkartem arasentsür aser arasener aridoker liasü.

⁴Filistia nunger külemi atenshi, aser Shunem nung arua anen: Sauli Israel ajak külemi sentepdaktsü, aser Gilboa nung anen.

⁵Sauli Filistia nunger temeranger telok angudang, pa tsübua liasü, aser pa mulungjang kanga atenten.

⁶ Sauli KIBUBA dang asüngdang, aser KIBUBAi pungmang agi süshia, Urim agi süshia, mesüra ainkar ajanga süshia pa dang melangzü.

⁷Idangji Sauli pa kilirtem dang ashi, “Arasentsür ka, ni la dangi aotsüsa aser la nungi asüngdangteptsü kü nem bushijangma.” Pa kilirtemi pa dang ashi, “Ajiang, Endor nung tanela aliba arasentsür ka lir.”

⁸Sauli pei sasa melenshia tanga sobutsü sobur, pa aser pa den nisung ana ao, aser aonung parnok tetsür dang jagi arua ashi, “Ni ne dang mepishir, ne ain agi ni ne dang shiba tenüngsa shidir adokdakjangma.”

⁹Tetsür jagi pa dang ashi, “Ajiang, Sauli kechi inyak nai meteter, koda pai ainketer aser arasentsür linük nungi leptokadok: anungji ni südaktsütsü kechiba nai kü taküm asoshi sang soa ayutsü.”

¹⁰Sauli la dang KIBUBA agi azüangshia ashi, “KIBUBA taküm ali nungji, iba mapa atema ne dak kecha temerenshi makatsü.”

¹¹Idangji tetsür jagi ashi, “Ni shiba ne dangi adokdaktsütsü? Pai langzü, Kü dangi Samuel adokdakjang.”

¹²Tetsür jagi Samuel angudang lai tashi agi ayimten; aser tetsür jagi Saul dang jembia ashi, “Kechiba nai ni ashioktsü? Kechiyong na Saul lir.”

¹³Chubai la dang ashi, “Tsübua teli, nai kechi angu?” Tetsür jagi Saul dang ashi, “Ni ali nungi tsüngrem ka adoka angur.”

¹⁴Pai la dang ashi, “Pa tereprangtsü kechi?” Lai ashi, “Tambur nisung ka adoker; aser pa sobutsü ka sobua lir.” Ibaji Samuel ta Sauli meteta aküm, aser pa tejak alilen shir, angema alu, aser akhümtsübu sayu.

¹⁵Samueli Saul dang ashi, “Kechiba nai ni meinprungdakja anir adokdaktsü?” Sauli langzü, “Ni kanga tejashi nung lir, kechiyong Filistia nungeri ni anema rarar, aser Tsüngrem ni nungi pila-a ogo, aser joko kü dang ainkar agi süshia, pungmang agi süshia melangzür: anungji ni kechi inyaktsü aji kü dang metetdaktsütsü ni na aja.”

¹⁶Samueli ashi, “KIBUBA na nungi pila ta aser na anemer kümogo ta meteter kechiba nai kü dang asüngdanger?

¹⁷ Ni agi jembiba KIBUBAi ne dang inyakogo; kechiyong ne ket nungi KIBUBAi yimliji shizükogo aser aji ne kiyonger, oda Dawid nem agütsüogo.”

¹⁸ Kechiaser nai KIBUBA ola manga, aser pa tetsübutsü mit adokba Amalek anema nai meinyak, aji asünung KIBUBAi iba mapa ne dang tanü inyak.

¹⁹Ano KIBUBAi Israel den na dena Filistia nunger ket nung agütsü, aser asüng na aser ner jabasotem, kü den alitsü; ano KIBUBAi Israel temeranger telok Filistia nunger ket nung agütsütsü.

²⁰Idangji Saul ali nung songtoka lao, aser Samuel o agi kanga tsübua liasü; ano pa dak tashi makai aküm, kechiyong anogo ka tepiyong aser iba ammang tepiyong pai chiyungtsü mechiyung.

²¹Tetsürji Saul dangi aru, aser pa kanga timtemseta lir ta ngua, pa dang ashi, “Ajiang, ne kilitsüri ne ola angaogo, aser ni kü taküm kü ket nung agiogo aser nai kü dang jembiba o ni angaogo.

²²Aji asünung tang ni ne dang mepishir, naia ne kilitsür ola angangma, aser ne madang amtsük tebang ka ni yutsütsü mela-angma; aser na ne lenmangi aodang na tashi akatsü chiangma.”

²³Saka pai magizük aser ashi, “Ni machitsü,” saka pa kilirtem aser tetsürlai senteper pa mepitem; aser pai parnok ola anga. Anungji ali nungi pa arameso, aser yipten nung amen.

²⁴Tetsürji kidang nashi chanu tejebket ka liasü; aser lai kara-a aji tepset; aser lai amzü bena arua ajeper aji agi piyazü meinokba amtsük yanglu.

²⁵Lai aji Saul madangi aser pa kilirtem dangi bener aru; aser parnoki achi. Idangji parnok arameso, aser paonungji oadok.