Read njo 1 SAMUEL 3 Bible Online

1 SAMUEL 3 - njo bible

1 SAMUEL 3

¹Tang tanur Samueli Eli den KIBUBA tenzük. Item anogo nungji KIBUBA o senti liasü, aser mangdang bulua maliasü.

²Saka konung Eli, shiba tenük ramia kümer angutsü mokoki liasü, pa taktang nung mejanga liasü.

³Saka KIBUBA milenji ano mesepi liasü, aser KIBUBA kidang kong Tsüngrem süngden liasü, idakji Samuel amua aotsü ontaka liasü.

⁴Idangji KIBUBAi Samuel aja, aser pai langzü, “Ni yangi lir.”

⁵Aser pai Eli dangi asema oa ashi, “Ni yangi lir, kechiyong nai ni aja” Saka Eli-i ashi, “Ni na maja, meyipa oa mejanga liang.” Anungji pai or mejanga ali.

⁶Ano KIBUBAi tanaben aja, “Samuel” aser Samueli shishi aser Eli dangi or ashi, “Ni yangi lir, kechiyong nai ni aja,” saka pai ashi, “Kü chir ni na maja, tanaben mejanga liang.”

⁷Tang aji Samueli KIBUBA ola ta memeteti liasü, aser KIBUBA O ano pa dangi jungkai madoki liasü.

⁸Ano KIBUBAi tasembenbuba Samuel aja, aser pa shishi aser Eli dangi ao, aser ashi, “Ni yangi lir; kechiyong nai ni aja.” Aser KIBUBAi tanurji ajar ta Eli-i shitet.

⁹Anungji Eli-i Samuel dang ashi, “Oang, mejanga liang; pai na jarabang, nai yamai shiang: Jembiangma, KIBUBA; kechiyong ne tenzükeri angashir.” Anungji Samuel ao aser pa alidak mejanga ali.

¹⁰Idangji KIBUBA arua idakji noktak, aser tanga mapang nung ajaba amaji, “Samuel! Samuel!” ta aja. Aser Samueli langzü, “Jembiangma, kechiaser ne tenzükeri angashir.”

¹¹Aser KIBUBAi Samuel dang ashi, “Ajiang, ni Israel nung mapa ka inyaktsü, koba tangashir shia tenarongi asatsü.

¹²Iba anogo nung ni Eli kibong indang jembiba ajak, tetenzük nungi oda tatem tashi ni Eli anema inyaktsü.

¹³Kechiyong pai meteta aliba tai asoshi ni par kibong teti asoshi o bendangtsü, kechiaser par jabasotemi atakatem parnok sasa dak bena aru, aser pai parnok menoktang.

¹⁴Anungji Elir kibong tai menabaji tetepsetba tenla mesüra tenla agütsüba agi kodanga mepungdoktettsüsa ni Elir kibong dang azüngashiogo.”

¹⁵Anepdang tashi Samuel mejanga ali, aser KIBUBAr ki kishitem lapok, aser Samueli Eli dang mangdangji ashitsü tsübu.

¹⁶Idangji Eli-i Samuel aja aser ashi, “Kü chir Samuel”. Pai langzü, “Ni yangi lir.”

¹⁷Aser pai ashi, “KIBUBAi ne dang jembibaji kechi? Ni ne dang mepishir, aji kü dang nungi temiim; ne dang pai jembiba ajak nai langka danga kü dang nungi miimshira, yamaji ne dang aser ano talia, Tsüngremi inyakangma.”

¹⁸Aser Samueli kecha miima meyui ajak ashi. Aser pai ashi, “Ibai KIBUBA lir; pa dang kechi ajung aji pai inyakdakjang.”

¹⁹Samuel ain, aser KIBUBA pa den liasü, aser pa o ka danga ali nung metsükdaktsü.

²⁰Aser Dan nungi Beersheba tashi Israel ajaki Samuel KIBUBA atema ainkar asütsü shimtet ta metet.

²¹KIBUBA tanaben Shilo nung jungkai adok; kechiyong KIBUBAi pei sasa Samuel dang Shilo nung KIBUBA o agi jungkai adok.