Read njo 1 SAMUEL 31 Bible Online

1 SAMUEL 31 - njo bible

1 SAMUEL 31

¹Tang Filistia nungeri Israel anema rara; aser Israel nisungtem Filistia nunger madang nungi ajen, aser Gilboa tenem nung tepseta laodaktsü.

²Filistia nungeri Saul aser par jabasotem sülen nepeta anitak; aser Filistia nungeri Saul jabasotem, Yonathan, Abinadab aser Mak-shua tepset.

³Aser tongbangji Saul anema sashia aküm, aser lijak amertemi pa menep; aser pa lijak amertemi pa kanga yirutsü.

⁴Idangji Sauli pa nok o nü abenba dang ashi, “Ne nok atsütetang, aser aji agi ni leptangang; ashiko item memejeptokertem arua ni lepsatsütsü aser samatsütsü. Saka pa nok o nü abensangi meinyak, kechiyong pai kanga tsübua liasü. Aji asünung Sauli pa nok bena arua aji agi pa sasa tepset.

⁵Kodang pa nok o nü abensangi Saul süogo ta angu, pai yamaji pa nok agi pa tepset, aser pa-a pa den asü.

⁶Yamaji iba anogojisa Saul aser pa jabasotem asem aser pa nok o nü abensang, aser par nisung ajak asü.

⁷Aser kodang Israel nisungtem külen tsütsü lenten nung alirtem aser Yordan atena oa alirtemi Israel nisungtem jenogo aser Saul aser pa jabasotem süogo ta angu, parnoki yimtitem toktsü, aser jena ao; aser Filistia nunger aru aser item nungji ali.”

⁸Tasüngji kodang Filistia nungeri tepseta alir süoshi pongzüka aru, parnoki Gilboa tenem nung Saul aser par jabaso asem tepseta angu.

⁹Parnoki pa tekolak lepzük, aser pa nok o nü agizük, aser süngyanglu kidangi aser nisungtem dangi osang abentsü, meketa aliba Filistia limai yok.

¹⁰Parnoki pa nok o nü Ashtarot kidang ayu; aser parnoki pa temang Beth-shan jara nung sentaka ayu.

¹¹Kodang Filistia nungeri pa indang oda Saul dak inyakba indang Yabesh-gilead nung alirtemi angashi,

¹²tasü tait nisung ajak aramesoa ammang piyong jaja, aser Saul aser pa jabasotem temang Beth-shan jara nungi agizük; aser parnok Yabeshi bener aru, aser yangji arong.

¹³Aser nüburtemi parnoki parnok teret bena arua itemji tamarisk süngdong kübok rema yutsü, aser anogo tenet lumi.