Read njo 1 SAMUEL 4 Bible Online

1 SAMUEL 4 - njo bible

1 SAMUEL 4

¹Aser Samuel o ajak Israel dangi aru. Tang Filistia nunger anema Israel tongbangi ao, aser Ebenezer nung anen; aser Filistia nungeri Afek nung anen.

²Aser Filistia nunger parnok sasa Israel anema taren küma ata aser kodang parnok tongbang raradak moapu nung ajurutep, Filistia nunger tsüngdang Israel tamakok angu; aser parnoki tongbang moapu nung nisung meyi pezü shi tepset.

³Kodang nüburtem tanendaki aru, idangji Israel tamburtemi ashi, “Filistia nunger madang tanü kechiba KIBUBAi asenok chirepdaktsü? KIBUBA tezüngzüktepba temeshi süngdenji asenok den arutsüsa, aser tsükchirtem ket nungi asenok kümzüktsüsa Shilo nungi asenoki bener arudi.”

⁴ Anungji nisungtemi Shiloi yok aser idak nungjagi Temeranger KIBUBA tezüngzüktepba süngden koba cherubim yongtsü nung liasü, parnoki bener aru; aser Eli jabaso ana Hofni aser Finehas, Tsüngremer tezüngzüktepba süngden denji liasü.

⁵Kodang KIBUBA tezüngzüktepba temeshi süngdenji bener tanendaki ait, Israel ajaki ola tulu agi ali agi atentena ayimten.

⁶Kodang Filistia nungeri parnok ayimtenba ola angashi; parnoki ashi, “Ibri nunger tanendak ayimtenba ola tulu tetezü kechi?” KIBUBA süngden tanendaki arua liasü ta parnoki angatet.

⁷Aser Filistia nungertem tsübua liasü, kechiyong parnoki ashi, “Tanendaki Tsüngrem arua lir.” Aser parnoki ashi, Ayatai! Kechiyong akhidang iba amai maliasü.

⁸Ayatai! Item tashi tulu tsüngremtem ket nungi shibai asenok kümzüktsü? Temerenshi tapu tapu ajak agi Ijip nunger dak arem nung tongdaktsüba ya item tsüngremtem lir.

⁹Ibri nunger kübok nenok alar masütsü tashi itang, aser nenok sasa tebur ama sang, Oh nenok Filistia nunger; nenok sasa tebur ama sang, aser rara-ang.”

¹⁰Filistia nungeri rara aser Israeli majet, anungji parnok nisung shia pei süki bushia ajen aser tetepsetba jenti liasü; kechiyong Israelpur tetsüng agi raraba temeranger meyi semer lao.

¹¹Aser Tsüngrem süngdenji bener ao; aser Eli jabaso Hofni aser Finehas tepset.

¹²Tongbang nung jagi Benjamin kidong nisung ka asema oa, iba anogo nungsa pei sü shisar pa tekolak nung ali mezür Shiloi aru.

¹³Aser kodang pa aru, ajiang, süngkhüm anasa Eli pa menden nung mener penzüa liasü; kechiyong Tsüngrem süngden asoshi pa mulungjang atentena liasü. Aser kodang nisungji yimti-i aita osangji ashi nüburtem ajonga jebtep.

¹⁴Aser kodang Eli-i asatepba ola angashi, pai ashi, “Iba rongrongba ola tetezü kechi?” Nisungbaji ilunga arua Eli dang ashi.

¹⁵Tang Eli küm tukur-ti liasü; aser pa tenük junga munguteti liasü.

¹⁶Nisungba jagi Eli dang ashi, “Tongbang nungi arubaji ni lir aser ni tanü tongbang nungi jena aru.” Pai ashi, “Koma asü, kü chir?”

¹⁷Aser osang bener jagi langzüa ashi, “Filistia nunger madang nungi Israel jenogo, aser nübur jenti tepsetogo aser ano ne jabaso Hofni aser Finehas süogo, aser Tsüngrem süngdena rakzüker ogo.”

¹⁸Kodang pai Tsüngrem süngden indang ashi, süngkhüm anasa pa menden tesüleni tsüka, pa tekong raksa, aser asü; kechiaser pa tambur aser taret liasü. Pai küm lir Israel o bendang.

¹⁹Pa jabaso Finehas kibutsü mashisa küma tanur asotsü anasa liasü; aser kodang lai Tsüngrem süngdenji bener ogo ta, aser la kinungpu tebu aser la kinungpu süogo ta osang angashi, lai mokrem aser tanur aso; kechiyong la madaki nuso ashiba aru.

²⁰Aser la asütsü mapang nungji la yarir tetsürtemi la dang ashi, “Tetsübu, kechiaser nai jabaso ka sotsüogo.” Saka lai kecha melangzü mesüra kecha mebilem.

²¹Aser “Israel nungi sentsüwangshi pilaogo,” ta shia, lai tanurji Ikhabod aja, kechiaser Tsüngrem süngden rakzükadok aser la kinungpu tebu aser la kinungpu sama.

²²Aser lai ashi, “KIBUBA sentsüwangshi Israel nungi pilaogo; kechiyong Tsüngrem süngdenji rakzükogo.”