Read njo 1 SAMUEL 7 Bible Online

1 SAMUEL 7 - njo bible

1 SAMUEL 7

¹ Kiriath-jearim nunger aru, aser KIBUBA süngdenji bener atu, aser tenem nung Abinadab kidangi aji bener aru, aser KIBUBA süngden ayutsü par chir Eleazar meshiteta ayu.

²Kiriath-jearim nung ozüng süngdenji mapang talangka, oda küm metsü shi liasü, aser Israel kidong ajongai KIBUBA dang teyari asoshi ayimten.

³Samueli Israel kidong ajak dang jembia ashi, “Nenoki KIBUBA dangi nenok mulungjang ajak agi meyipdi süra, ajangla nenok rongnungi bendanger tsüngremtem aser Ashtarot endokang, aser KIBUBA dangi nenok mulungjang renemang, pa dang tenzükang, aser pai nenok Filistia nunger ket nungi kümzüktsü.”

⁴Idangji Israel nungeri Baalim aser Ashtarot endok, aser KIBUBA dang tenzük.

⁵Samueli ashi, “Israel ajak Mizpai sentepang, aser ni nenok asoshi KIBUBA dang sarasademtsü.”

⁶Aser parnok Mizpai külemi sentep aser tzü taten, aser aji KIBUBA madang shitokadok aser iba anogo nung lumi aser ashi, “KIBUBA anema onoki tai menaogo.” Aser Samueli Mizpa nung Israel nunger o bendang.

⁷Kodang Filistia nungeri Israel nunger Mizpa nung külemi sentepa lir ta angashi, Filistia yimsüsürtemi Israel anema atu. Aser kodang Israel nungeri aji angashi, parnoki Filistia nunger tsübua liasü.

⁸Israel nungeri Samuel dang ashi, “Asenok Filistia nunger ket nungi kümzüktsü asoshi KIBUBA asen Tsüngrem dang maneni ayimtenang.”

⁹Samueli mama teyongdak san chanu ka agi, aser aji tarongba tenla rangbenKIBUBA dang tenla aser Samueli KIBUBA dang Israel asoshi ayimten aser KIBUBAi pa dang langzü.

¹⁰Samueli tarongba tenla tenla-a alidang Filistia nungeri Israel anema tongbang raratsü anasa aru; saka iba anogo nung Filistia nunger madak KIBUBAi ola tulu agi metenoktsü, aser parnok kokdaktsü.

¹¹Israel nungeri Mizpa nungi Filistia nunger aria ao, aser parnoki Bethkar tashi oa parnok alep.

¹²Ajiser Samueli lung ka bena aru, aser aji Mizpa o Shen tsüngda nung azüng, aser iba tenüng Ebenezer ta aja, aser ashi, “Ya Tashi KIBUBAi asenok yariogo.”

¹³Yamaji Filistia nungerji akok, aser parnok joko Israel litsüi maru: aser Samuel anogo tepiyong KIBUBA Filistia nunger anema liasü.

¹⁴Filistia nungeri Israel nungi agiba yimtitem Ekron nungi Gat tashi Israel nem tanaben meyipa agidaktsü; aser Filistia nunger ket nungi Israeli parnok linük kümzüka ayu. Aser Israel o Amor nunger tsüngda nung yimjung liasü.

¹⁵Samueli pa arishi tepiyong Israel o bendang.

¹⁶Pai küm shia tatongi Bethel, Gilgal, aser Mizpa semdang; aser item linük ajak nung pai Israel o bendang.

¹⁷Pa Ramai shilang, kechiaser yangji par ki liasü; aser yangji pai Israel o bendang; aser pai KIBUBA dang tenladak ka yanglu.