Read njo 1 SAMUEL 8 Bible Online

1 SAMUEL 8 - njo bible

1 SAMUEL 8

¹Kodang Samuel tambur aküm, pai par jabasotem Israel madak obendangertem kümdaktsü.

²Tang par mezüng asoba tenüngji Yoel liasü, aser tanabuba tenüngji Abiya; parnok Beersheba nung o bendanger liasü.

³Par jabasotemi pa lenmang nung mejaja saka rongsenleni meyip, aser süpokrem agi, aser ochi o mebendang.

⁴Tang Israel tambur ajak külemi sentep aser Samuel dangi Ramai aru,

⁵ aser parnoki pa dang ashi, “Na tambur lir, aser ne jabasotemi ne lenmang nung mejajar; anungji tangar kintem amaji onok madak o bendangtsü chuba ka kua.”

⁶Saka parnoki onok o bendangtsü onok nem chuba ka kua ta ashiba jagi Samuel mepeladaktsü, aser Samueli KIBUBA dang sarasadem.

⁷KIBUBAi Samuel dang ashi, “Parnoki ne dang ashiba ajak nung parnok ola angang, kechiaser parnoki na magizük masü, saka ni parnok madak chuba asütsü parnoki magizük.

⁸Parnok Ijip lima nungi ni anir adokba anogo nungi parnoki inyakba mapa ajak mesüka tanü tashi parnoki ni senzüka tokja lir, aser tangar tsüngrem tenzük; yamaji ano parnoki ne danga inyaker.

⁹Anungji tang parnok o angang, aji saka nai retreta parnok dang tekümdangtsü shiang, aser parnok madak yimsü asütsüba chuba mapadong indangji parnok dang sayuang.”

¹⁰Samueli KIBUBA o ajak pa dang chuba meshiba nisungtem dang ashi,

¹¹Pai ashi, “Nenok madak yimsü asütsüba chuba mapadongji ibai alitsü; pai nenok jabasotem agitsü aser parnok pa atema, pa talungtsü asoshi agitsü aser par talungtsü jakdang parnoki asemtsü.

¹²Pai parnok kar pei asoshi meyirijang madak aser kar tenem madak tanishir shimtettsü, pai karbo par li alu ladaktsütsü aser par lu rudaktsütsü par raraba oset aser talungtsü osettem yangludaktsütsü.

¹³Ner jalatemji pa asoshi teronem yanglur, sorochioker aser amtsük yanglurtem asütsü.

¹⁴Pai nenok lu aser nenok tsükmenatzü tsüki, nenok oliv tsüki oda item tajungtiba agitsü, aser itemji par tenzüker nem agütsütsü.

¹⁵Pai nenok tsük aser tsükmenatzü nungi ter shilem agitettsü aser aji pa tenzüker aser tongtipurtem nem agütsütsü.

¹⁶Nenok kilirtem aser kilitsürtem, nenok nashi telok tajungtiba aser nenok gado, pai par mapa nung yutsütsü.

¹⁷Pai nenok san telok nungi ter shilem agitsü, aser nenok par kilirtem asütsü.

¹⁸Kodang iba anogoji arudir, nenoki nenok asoshi shimtetba chubaji anema nenoki tashi agi ayimtentsü, saka KIBUBAi nenok dang melangzütsü.”

¹⁹Saka nisungtemi Samuel o manga, parnoki ashi, “Masü, saka onok madak chuba ka alitsüla;

²⁰oda onoka tangar kin amaji sütettsü; oda ozü chubai onok madak o bendangtsü aser onok jakdang aotsü, aser ozü tongbang raratsü.”

²¹Samueli nüburtem o ajak angashi, aser pai KIBUBA narong nung tanaben angashidaktsü.

²²KIBUBAi Samuel dang ashi, “Parnok ola angang, aser parnok nem chuba ka agüjang.” Aser Samuel-i Israel nungertem dang ashi, “Nenok nisung shia pei yimti-i oang.”