Read njo 1 SAMUEL 9 Bible Online

1 SAMUEL 9 - njo bible

1 SAMUEL 9

¹Tang Benjamin kidong nungi nisung ka, Abiel jabaso, tenüng agi Kis liasü: Abielji Zeror jabaso, Zerorji Bekora jabaso; Bekoraji Afia jabaso, Benjamin nunger rongsen akar nisung ka liasü.

²Aser pa jabaso ka liasü, pa tenüng Saul, asangur aso tajung; aser Israel chir rongnung pa dang nungi aso tajungba kata maliasü; pa tapubang aser temalen nungi, pa nisung ajak dang nungi temaba liasü.

³Saul tebu Kis meyong gado kar sama-a liasü. Anungji pai Saul dang ashi, “Kilirtem nungi nisung ka anir apusoa gadotemji bushiang.”

⁴Pai Efraim tenem linük sema ao, aser Shalisha linük sema ao, saka pai parnok mangu; idangji parnoki Shaalim linük sema ao, aser yangjia parnok maliasü; aser pai Benjamin nunger linük sema ao, saka parnoki itemji mangu.

⁵Kodang parnoki Zuf linüki aru, Sauli pa den aliba kilir dangji ashi, “Kübui Gado indang bilemba amadoker, asenok indangang shisa bulua lir, arung asenoki meyipa odi.”

⁶Saka kilir jagi langzü, “Reprangang, iba yimti nung Tsüngrem nisung ka lir, pai ashiba ajak shitak ataloka aru nung ajaki akhümtsübua züngshir. Tang asenoki ajagi odi, ashiko asenoki koleni aotsü iba indang pai asenok dang shitettsüa kar.”

⁷Idangji Sauli par kilir dang ashi, “Saka ajiang, asenok ora asenoki nisungba dang jagi kechi bener aotsü? Kechiyong asen juli nung amtsük agimaogo, aser Tsüngrem nisung dangi bener arutsü sempet kata mali, asenok den kechi aka?”

⁸Kilir jagi Saul dang tanaben langzüa ashi, “Ajiang, kü ket nung taribi ka lir; asenok dang asen lenmang ashitsü ibaji ni Tsüngrem nisung nemji agütsütsü.”

⁹Akhidang Israel nung kodang nisung kati Tsüngrem nungi metettsü asüngdangdir, yamai pai ashi, “Arung, aser asenoki tangur dangi odi”, kechiyong tang ainkar ta ajaba dang akhidangbo tangur ta ja-a liasü.

¹⁰Idangji Sauli pa kilir dang ashi, “Junger; arung, asenoki odi.” Anungji Tsüngrem nisung aliba yimti jagi parnok ao.

¹¹Parnok yimti jagi atudang, parnoki aiürtem tzütai aoba ngua parnok dang asüngdang, “Yangi tangurji ali asü?”

¹²Parnoki parnok dang langzü, “Pa lir; ajiang, pa ne jakdang lir; tang ilungang; kechiyong pa tanü yimti-i aita lir; kechiaser nüburtem tanü tenem nung tetepsetba tenla agütsütsü.

¹³Nenok yimti-i aitli-i, nenoki pa indangindanga tenemi pa chiyungtsü matudang, pa angutsü; kechiyong pa maru tashi nisungtem mechiyungtsü, kechiaser pai tetepsetba tenla moatsür; aser tesülen shirnok aja parnok chiyunger. Anungji nenok tuang; kechiyong iba mapang nung nenoki pa angutsü.”

¹⁴Tenati yimti-i atu; aser parnok yimti-i aitdang, ajiang, tenemi atutsü parnok jakdang Samuel aru.

¹⁵Tang Saul marudang anogo ka lia KIBUBAi ya oda shia Samuel dang jungkai adok:

¹⁶“Asüng iba mapang nung ni ne dangi nisung ka Benjamin linük nungi yoktsü, aser nai pa kü nübur Israel madak lenir asütsü totzü mezütsütsüla, pai kü nübur Filistia nunger ket nungi kümzüktsü; kechiyong ni kü nübur madak reprangogo, kechiaser parnok ayimtenba kü dangi arua lir.”

¹⁷Kodang Samueli Saul angu, KIBUBAi pa dang ashi, “Ni ne dang jembiba nisungji ajiang! Kü nübur madak pai yimsü asütsü.”

¹⁸Idangji süngkhüm nung Sauli Samuel anasa aru, aser ashi, “Yimlibilema tangur ki kong ali kü dang shiangma.”

¹⁹Samueli Saul dang langzü, “Tangurji ni lir; kü jakdang tenem jagi tuang; kechiyong tanü na kü den chiyungtsü aser anepdang ni na odaktsütsü, aser ne mulungjang nung aliba ajak ne dang ashitsü.

²⁰Ne gadotem koba madoker anogo asem ogo, parnok dak ne mulung tagütsü; kechiyong parnok nguogo. Aser Israeli jangraba ajak shiba dak lir? Aji na asoshi, aser nebuer kibong ajak asoshi masü no?”

²¹Sauli langzü, “Ni Benjamin nunger, Israel kidong rongnung tilaba masü no? Aser kü kibong Benjamin kibong ajak dang nungi tilaba masü no? Anungji kechiba nai iba amai kü den jembir?”

²²Samueli Saul aser pa kilir anir oa, aener taktangi parnok anir aru, aser tejatepertem shirnok nisung semer shi liasü, parnok rongnung tematiba menden nung parnok mendaktsü.

²³Samueli sorochiokba dang ashi, “Ni ne dang balaka yujang, ta ashiba ni ne nem agütsüba shilem to bener arung.”

²⁴Sorochiokbai tapubang aser iba manung aliba bena aru, aser aji Saul madang yutsü. Samueli ashi, “Kechi ne tsüngdang yutsütsü wazüka ayu, aji chiang, kechiyong ni nisungtem majadang aser mapang matongdang na asoshi yutsübaji ibai lir.” Anungji iba anogo Sauli Samuel den chiyung.

²⁵Kodang parnok tenem nungi yimti-i jagi alua, parnoki Saul asoshi kilem nung yipten ka alem, aser pa angji mejang aser pai Saul den kilem nung jembi.

²⁶Ajiser Samueli anepungi kilem nung Saul ja-a ashi, “Ni na yokadoktsüsa shishiang;” anungji Saul shishi aser pa den Samuel yimtongi ao.

²⁷Parnok yimti tatem tonga aludang Samueli Saul dang ashi, “Kilirji asen jakdang odakjang, saka nabo Tsüngrem O ni ne nem angashidaktsütsü noktaka ata-a liang.”