Read north okpela arhe iLuku 1 Bible Online

iLuku 1 - north okpela arhe bible

iLuku 1

¹Ebubu ẹgbọ e she rọshẹka kẹkẹ emini e bhale ya tsẹ nya ẹghẹghẹ oyi anye.

²Ẹzẹzẹ abi ẹgbọ eni ẹ gue ungmemhi oyi Ẹshinẹgba le, ni e rọte igbaekẹle ri ẹloe mẹ wẹ abi e li de, ighọ e li gue wẹ yẹ anye, ni anye rọ lighọ kẹkẹ wẹ.

³Aborọkhia khi eni ingme ena, khi rọte igbaekẹle mhi te tọwẹ ọkpẹ, lọli o rọ ti mhẹ ẹloe, ni mhi kuegbe-a kẹkẹ abi e li de ghi ẹ, yẹyẹ iTiofilọsi ni a ri ekpẹ ẹ na,

⁴Isheghọ ni u rọ ya lẹsẹ egbegbi ingme ni e la emini a sẹsẹ ẹ.

⁵Ọkpodalo-ugamhi ọyi Ẹshinẹgba ọghuo ni a lu iZakaraya ọ ya la ọ ẹghẹghẹ oyi oghie ni a lu Erọdu ni ọ mhuẹ ekẹ iJudia. Ọni iZakaraya ọ khi ọtuọghuo igbhogbho ekpodalo-ugamhi eyi Ẹshinẹgba ni Abija ọ li la. A lu ughuẹ ọli Enizabẹti ni ọ khi omiomi Erọni.[1]

⁶Ọni ọmọse ọna ali ughuẹ ọli, e khi ẹgbọ ni e pfuasẹ shi odalo oyi Ẹshinẹgba, ni e ri ishi eyi Ẹshinẹgba á gbe akanya.

⁷Ẹa bia ọmọ itobọ khi Enizabẹti aga ọ khi. Wẹwẹ ava-ava e she womhẹ.

⁸Ẹlẹghuo, khi ugamhi o tẹ iku ẹgbọ ekpodalo-ugamhi eyi Ẹshinẹgba ni iZakaraya ọ la,

⁹obọ o mu iZakaraya khi lọli ọ ya lo Owa oyi Ẹshinẹgba ya tosẹ ituale afu ẹẹra ukhomhi atẹtẹ. Ighọ eni igbhogbho ekpodalo-ugamhi eyi Ẹshinẹgba e kie kpẹ ẹ li.

¹⁰Abi ẹghẹghẹ ni a rọ ọ tosẹ eni ituale o rọ ramhi, eni ẹgbọ ni e bhale shi oni ugamhi, e legba atukpapfẹ, e sọ iromhi.

¹¹Ighọ agẹni ọyi Ẹshinẹgba ọ bhale ya migha ukiẹkiẹ obọ ita oni adido ni a la tosẹ ituale.

¹²Abi iZakaraya ọ rọ mẹ ọni agẹni, ọ yila, ulishi oo mu ọli.

¹³Ama ọni agẹni ọọ li, “Khi zẹ ni ulishi o muẹ, Ẹshinẹgba ọ she suọ iromhi ni u sọ. Ughuẹ Enizabẹti, o ya bia ọmọ nẹ. IJọni khi eva ni u ya lu ọli.

¹⁴Ọni ọmọ, ọ ya ri oghẹlẹ ali iregbemu ghi ẹ. Ebubu ẹgbọ e ya ghẹlẹ shi ubiamhi oyọli.

¹⁵Irari khi ọ ya fu shi odalo oyi Ẹshinẹgba. Ọ́ khi tigbe da onyọ ni o toto ghue. Rọte ẹlẹ ni a te ya bia li, ọ te ya mhuẹ Ayẹmhẹ-nọ-pfuasẹ.

¹⁶Ẹgbọ iZirẹni ebubu ọ ya mu pfi bhale deba Ẹshinẹgba Ọnọmhuẹ ọyẹwẹ.[2]

¹⁷Ọnọmhuẹ ọ ya ghie ọli ralo, ọ mhuẹ ekpabọ ali ayẹmhẹ enabi eyi Elaja. Ọ ya mu udu oyi eni e khi ita pfi ni e ke nono ingme oyi imi wẹ. Ẹgbọ eni ẹa kpẹ ẹ suọ esọ na Ẹshinẹgba, ẹẹ suọ esọ na Ẹshinẹgba abi egbegbi ẹgbọ ẹẹ li. Ọ̀ gbo mu ẹgbọ egbe shi ekẹ khẹ Ẹshinẹgba.”[3]

¹⁸IZakaraya ọ rọ mhila ọni agẹni, “Sẹẹ o li ya khuese mhẹ khi igẹsikia u ngme? Irari khi mhẹmhẹ ali ughuẹmhẹ anye she womhẹ.”

¹⁹Ọni agẹni ọọ li, eva oyẹmhẹ khi iGebulẹni. Mhẹmhẹ mhia migha odalo oyi Ẹshinẹgba. Lọli ọ ghie mhẹ mhi ka nu ẹ ngme, mhi gue oni usomhi onete ona yẹ.[4]

²⁰Ama ungmenu u kẹ ya melea ramhi ẹghẹghẹ ni oni ungmemhi ona o rọ bhale ya tsẹ, itobọ khi u waa mie emini mhi gueyẹ suọ ni ó bhale ya tsẹ shi ẹghẹghẹ oyọli.

²¹Ẹghẹghẹ ni a ngme ena, ẹgbọ e kie migha olase khẹ iZakaraya. Abọ e sha wẹ, irari khi ọ she ke tẹsẹ oni elemhi Owa oyi Ẹshinẹgba dọsẹ.

²²Abi ọ ke rọ lasele ọa ke ngme unu. Eni ẹgbọ e te ododẹ lẹsẹ khi imekẹ ọ mẹ oni elemhi Owa oyi Ẹshinẹgba irari khi obọ ọ ke rọ nu wẹ ngme.

²³Abi ogbẹlẹ ni iZakaraya ọ rọ ya ga oni ugamhi e rọ gba, ọ je apfẹ.

²⁴Ighọ, ughuọli Enizabẹti ọọ mẹ. Ọ la ufui owa iki ishe, ọa ke lasele ni ẹgbọ e mẹ.

²⁵Ọni ọkpotso ọọ, “Ẹshinẹgba ọ she riẹlẹ onana na mhẹ. Ọ mhuẹ isomhelemhi na mhẹ, Ọ rue mhẹ omama egbe le ukpẹloe oyi ẹgbọ.”

²⁶Uki onuzi-esesa o gba ni Enizabẹti ọ te e mẹ, Ẹshinẹgba ọ ghie agẹni ni a lu iGebulẹni bhale ẹoli iNazarẹti ni o la ekẹ iGalili.

²⁷Ọni agẹni ọ bhale deba ọmueshi ni ọa lẹsẹ ọmọse ne ni a lu iMeli ni ọmọse ni a lu iJosẹfu ọọ gue. Unuẹkpẹ oyi iDefidi iJosẹfu ọ khi.[5]

²⁸Ọni agẹni ọ bhale deba iMeli. Ọ tsẹ ọli, ọọ li, “Moo mueshi! Ẹshinẹgba ọ she khivọsẹ nẹ! Ẹshinẹgba ọ nuẹ la!”

²⁹Oni otsẹ ona o ri abọ sha iMeli irari khi ọa lẹsẹ emini otsẹ onana o ngme. Egbe ẹa ke sheshe ọli.

³⁰Ama ọni agẹni ọọ li, “Khi ke zẹ ni ulishi o muẹ, irari khi Ẹshinẹgba ọ she mhọli isomhelemhi nẹ.”

³¹U ya ke mẹ, u bia ọmọ ọmọse, iJesu wa lu eva oyọli.[6]

³²Ọgbọ ọniẹmhi ọ ya khi, Omi Ẹshinẹgba nọ Yagha nẹ Nya a ya ke lu ọli. Ẹshinẹgba ọ ya rue ukpẹkhomhi eghiele oyi itali iDefidi na li.

³³Ọ ya mhuẹ omhẹsẹ shi ọmhuẹ-apfẹ oyi iGiekọpu agbọagbọ. Eghiele oyọli ọa ya mhuẹ ukpẹsẹ.[7]

³⁴IMeli ọ mhila ọni agẹni, ọọ, “Sẹ ingme ni u ngme ena e li bhale ya tsẹ? Irari khi mhi aa lẹsẹ ọmọse ghue.”

³⁵Ọni agẹni ọọ li, “Ayẹmhẹ-nọ-pfuasẹ ọ ya bhale debẹ, ẹghẹghẹ aghọ ekpabọ eyi Ẹshinẹgba nọ Yagha nẹ Nya e ya tsua rughuẹ, ọmọ ni u ya bia, ọni ọ pfuasẹ Omi Ẹshinẹgba a ya ke lu ọli.

³⁶Enizabẹti inyọghuoẹ ni a kpẹ ẹ lu aga, ọ she liẹ mẹ umẹmhi, iki esesa o la memena, abi ọ tseku khia khi ọ she womhẹ eghọ, ọ ya bia ọmọ.

³⁷Irari khi aa mẹ emini Ẹshinẹgba ọa dobẹ ẹ riẹlẹ.”[8]

³⁸IMeli ọọ li, “Ẹshinẹgba ọ mhuẹ mhẹ. O ka a tsẹ na mhẹ abi u li ngme ọli.” Ighọ ọni agẹni ọ li vu.

³⁹Ẹghẹghẹ ana iMeli ọ nyanya muno egbe, ọ je ẹoli ni e la epfepfẹ ute ena ekẹ iJudia.

⁴⁰Ọ ramhi apfẹ oyi iZakaraya, ọ tsẹ Enizabẹti.

⁴¹Abi Enizabẹti ọ rọ suọ otsẹ oyi iMeli, ọmọ ni ọ la li elemhi ọ mu egbe nyenẹ. Ayẹmhẹ-nọ-pfuasẹ o bhale deba li.

⁴²Enizabẹti ọ khueghie unu a leghe, ọọ li, “Ọni a khivọsẹ na u khi elemhi ikpotso. Ọni a khivọsẹ na ọmọ ni u ya bia ọ khi.

⁴³Ọghuo mhi khi, ni inyọ Ọnọmhuẹ ọyẹmhẹ ọ kọ ya fẹli?

⁴⁴Abi mhi rọ lẹsẹ suọ otsẹ oyẹ, ọmọ ni ọ la mhẹ elemhi ọ ri oghẹlẹ mu egbe nyenẹ.

⁴⁵Ikhivọsẹ o khi na ọgbọ ni ọ mie ungmemhi ni Ẹshinẹgba ọ ngme khi ọ ya rọli tsẹ.”

⁴⁶IMeli ọọ, “Mhi ri ayẹmhẹ oyẹmhẹ kuẹghiẹ Ẹshinẹgba.

⁴⁷Mhi rọte elemhi ayẹmhẹ oyẹmhẹ kuẹghiẹ Ẹshinẹgba Ọmiepfuese ọyẹmhẹ.

⁴⁸Irari khi ọ yele mhẹ ni mhia mu ẹloe le. Rọte ana vu, ẹgbọ kpa, e ya ke e lu mhẹ, Ọni a khi vọsẹ na.[9]

⁴⁹Ipfuasẹ o khi eva oyi Ẹshinẹgba nọ funẹ, Irari khi ọ riẹlẹ eminiẹmhi na mhẹ.

⁵⁰Ọ mhuẹ isomhelemhi na ẹgbọ nya ni ẹ na ulishi oyọli rọte agbhotu ya je agbhotu.

⁵¹Ọ ri abọ eyọli gbe ikanya ọnyaloa, ọ vẹsẹ ẹgbọ ni e mhuẹ itiegbenga elemhi isamhi udu eyẹwẹ kua.

⁵²Ọ ti ighie tiemhile ekẹ,[10] ama ọ yasẹ ẹgbọ ni e ti egbewẹ tiemhie nga idane.

⁵³Ọ ri eminete na ẹgbọ ni okiamhi ọ́ọ́ gbe le. Ama eni e pfue, ọ ku wẹ ẹpfue abọ-a.

⁵⁴Ọ she ri ishiobọ ni ọ shi na itawa tsẹ. Ọ bhale ya kpaghiẹ ẹgbọ iZirẹni eni ẹẹ ga li obọ.

⁵⁵Abi ọ li shi ishobọ na agbọagbọ na Aburaamu ali imimi ọli,[11] ni ọ gbo li nu ititawa ngme ọli agbọagbọ.”[12]

⁵⁶IMeli ọ nu Enizabẹti la iki esẹ neni ọ je apfẹ.

⁵⁷Ẹghẹghẹ o ramhi ni Enizabẹti ọ rọ ya bia, ọ ya bia ọmọ ọmọse.

⁵⁸Idogbapfẹ ali ẹgbọ eyọli e suọ abi Ẹshinẹgba ọọ somhi elemhi ọli. E nu ọli ghẹlẹ.

⁵⁹Ogbẹlẹ-elele o ramhi ni a rọ ya shẹlẹ ọni ọmọ a, ee nono ni e lu ọli iZakaraya ni o khi eva oyi ita li.[13]

⁶⁰Inyọli ọọ wẹ, “Iiye! Eva oyọli khi iJọni.”

⁶¹Eni ẹgbọ ẹ ọli, “Ọgbọkhọghuo ọa la unuẹkpẹ oyẹ ni ọ kpẹ le eva onana ghue.”

⁶²Ighọ e ri abọ nu ita ọni ọmọ ngme rọ mhila li abi a ya ke lu ọni ọmọ.

⁶³Ọọ wẹ, e rue emini a kẹkẹ emhi ẹ shi ali ugba na luẹ. Ọ kẹkẹ khi, “Eva oyọli khi iJọni.” O ri abọ sha wẹ nya.

⁶⁴Utoghuokpe, unu oyọli o khueghie-a, ọọ ngme, ọọ kuẹghiẹ Ẹshinẹgba.

⁶⁵Ulishi oo mu idogbapfẹ eghọ nya. Oni ungmemhi ẹgbọ nya e ke ngme asha kpa ekẹ iJudia.

⁶⁶O ri abọ sha ọgbọkpa ni ọ suọ oni ungmemhi. Ee mhila, “Ọmọ nabi sẹ ọna ọ ya khi?” Irari khi obọ oyi Ẹshinẹgba o nu ọli la.

⁶⁷Ayẹmhẹ-nọ-pfuasẹ ọ tiemhile shi iZakaraya ita ọni ọmọ ọ. Ọọ ngme ungmemhi aguele, ọọ liẹ,

⁶⁸“Ikuẹghiẹ o khi na Ẹshinẹgba Ọnọmhuẹ ọyi iZirẹni, itobọ khi ọ she bhale ya pfa ẹgbọ iZirẹni eyọli shi ekẹ.

⁶⁹Ọ rọte unuẹkpẹ oyi iDefidi, ọmọ ọyọli, mu adenọmọ Ọmiepfuese vule na anye.

⁷⁰Abi ọ li rọte unu emekẹguele ni e pfuasẹ eyọli ena ẹlẹlẹ shobọ,

⁷¹khi lọli ya tsumhi awa obọ oyi ebe awa ali eni ẹ biselemhi awa.

⁷²Ali khi lọli ya somhelemhi itita awa, ni sato ishobọ oyọli ni ọ shi na wẹ,

⁷³ikhi isheli ni ọ romhi shi emini ọ gueyẹ ita awa Aburaamu,

⁷⁴khi lọli ya rue awa obọ oyi ebe awa le, ini awa khi ri ulishi ga luẹ

⁷⁵elemhi ipfuasẹ ali ingeli enete, agbọagbọ kpa.

⁷⁶Yẹyẹ omimhẹ, a ya luẹ ọmekẹguele ọyi Ẹshinẹgba nọ Yagha nẹ Nya;[14] irari khi u ya ralo ya bẹ odẹ-a khẹ Ọnọmhuẹ.

⁷⁷Ni u rọ gueyẹ ẹgbọ eyọli khi rọte igbe-olamhẹ-kua na wẹ, e te ya mhọli imiepfuese.

⁷⁸Irari khi Ẹshinẹgba ọyawa ọọ mhọli ilẹlemhi, ọ ya zẹ ni ovọ imiepfuese oyọli o te idane ngale shi awa ọ.

⁷⁹Ali ni o rọte idane gẹ nga eni e la alo ebili egbe ali eni e la okhẹna eghuli.[15] Ni ọ ri awa te odẹ opfọmhẹ.”

⁸⁰Ighọ ọni ọmọ ọ lii fu, ọ lẹsẹ ingme. Ọ la ifui ọdagbe ifufu ramhi ẹghẹghẹ ni ọ rọ lasele tse abọ ungmemhi oyi Ẹshinẹgba yẹ ẹgbọ iZirẹni.