Read north okpela arhe iLuku 3 Bible Online

iLuku 3 - north okpela arhe bible

iLuku 3

¹Abi o rọ gbe ikpe igbẹshe ni oghie iSiza ni a lu iTibẹrusi ọ rọ khi oghie, oni ẹghẹghẹ iPọtiusi iPaleti ọ rọ li khi igọvunọ shi ekẹ iGalili ali ekẹ iJudia. Ẹghẹghẹ aghọ Erọdu ọ rọ ọ mhẹsẹ shi ekẹ iGalili. Inyọghuo ọli, ikhi iFilipu ọ mhẹsẹ ẹ shi ekẹ Iturea ali ekẹ iTirakọnitisi. Oghie iLisaniasi, ọ mhẹsẹ shi ekẹ Abilini.

²Ẹghẹghẹ ni Anasi ali iKefasi e rọ khi eni e kpeda nya na ekpodalo-ugamhi eyi Ẹshinẹgba, Oni ẹghẹghẹ ungmemhi oyi Ẹshinẹgba o rọ bhale deba iJọni omi iZakaraya, elemhi ifu ọdagbe ifufu.

³Ọ rọ tse abọ ekẹ iJọdani nya kiakia. Ọ liẹ, “A mu nyenẹ rọte olamhẹ eyẹẹ lasele ni a batazi ni a rọ gbe olamhẹ eyẹ ẹ kua na ẹ.

⁴Abi a li kẹkẹ ọli shi ebe Azaya ọmekẹguele, ni ọ rẹ, “A ya suọ khi ọgbọ ọ la ifu ọdagbe ifufu ẹ tsẹsẹ. Ọọ liẹ, riẹlẹ odẹ shi ekẹ khẹ Ọnọmhuẹ, ‘Bẹ odẹ ni o sheshe na Ọnọmhuẹ’

⁵A ka tsua ekẹ suli igbilimhi ekẹ nya, a gbọmọ ute ọgbọgbọ tiemhie ekẹ, e mele ugbẹrekẹ-a. A ka ri odẹ na gẹnẹ-gẹnẹ mele eni sheshe-a, ena fuọnyọ-fuọnyọ, a ku wẹ gbe lẹghẹ.

⁶Ọgbọkpa ọ ya mẹ Imiepfuese oyi Ẹshinẹgba.”[23]

⁷Ebubu ẹgbọ e fiẹ bhale deba iJọni ni ọ batazi wẹ, iJọni ọ rẹ wẹ, “Ẹẹ enyẹ ifue, ọghuo ọ tse agua yẹ ẹ a na, khi ẹghẹghẹ ofu oyi Ẹshinẹgba ọọ bhale?[24]

⁸A ke ngeli angeli imu-nyenẹ, a khi ke liẹ, ‘Aburaamu ọ khi ita anye.’ Irari khi abi o li mhi li gue ọli ẹ yẹ ẹ khi, Ẹshinẹgba ọ dobẹ ya rọte echẹ ena wolọ eniyẹ lasele na Aburaamu.[25]

⁹A she rue uze shi ekẹ ni a rọ ya rọte imhili ẹẹra te eni ẹẹra gbe, ọọra kpa ni ọa da mọ udumhi onete ne, eri a ya tọli gbe, a tosẹ ọlia.”[26]

¹⁰Eni ẹgbọ e mhila iJọni, “Sẹ anye ke li ya kia mena?”

¹¹IJọni ọọ wẹ, “Ọni ọ mhuẹ iwulu eva ọ ka rue oghuo ọ na ọgbọ ni ọa mhuẹ. Ọni ọ mhuẹ eminale ọ ka kemhi na ọni ọa mhuẹ.”

¹²Emionoga eghuo e li bhale deba li ni a batazi wẹ. Ẹẹ ọli, “Ọsẹsẹ, sẹ anye li ya kia?”[27]

¹³Ọọ wẹ, “A khi ke miono oga dọsẹ ingmẹ ni ẹẹ a ke miono.”

¹⁴Ekhọli-okhuẹ eghuo e mhila li, “Sẹ anye li ya kia?” Ọọ wẹ, “A khi ri itoto rue ikpaghọ ni ẹa khi e yẹ ẹ, a khi ke gbo gue ingme ni ẹa la ọgbọ egbe shi ọli egbe. A zẹ ni ifata eyẹ ẹ e bu ẹ.”

¹⁵Egbe e mu eni ẹgbọ, e ri udu oyẹwẹ khọkhọ ini iJọni ọ khi ọni Ọmiepfuese ni áá ngme.

¹⁶Ama iJọni ọọ wẹ, “Amẹ mhi rọ batazi ẹ, ama ọgbọ ọọ bhale ni ọ toto dọsẹ mhẹ, ẹkuẹ ni ọ sọ shi owẹ, mhi aa fu tẹ ni mhia taghiẹ ọli-a. Ọ ya ri Ayẹmhẹ-nọ-pfuasẹ ali erali batazi ẹ.

¹⁷Ọ mu ukpokpo ni a tọ akhuli ni o zẹ epfia sọ oyọli mhuẹ obọ. Lọli ọ rọ la ashini a la kpishi ado a ke pfie ado-a. Ọọ ti egbegbi ado ni e la ọ ọ gbili, ọ sọ wẹ ẹ shi ikpulu tsua ya shi owa eminale. Ama ọ ya ri erali ni ẹa ya a pfu ghue tosẹ efuẹwẹ-a.”

¹⁸Odẹ ebubu iJọni ọ te tse abọ ungmemhi oyi Ẹshinẹgba yẹ wẹ, ọọ liẹ wẹ e mu ingeli eyẹwẹ pfi.

¹⁹IJọni ọ gue emhi ebubu yẹ oghie Erọdu ni ọọ riẹlẹ ni ẹa ti, ali ọ gbo gueyẹ ọli khi ọa guẹ kia ni ọ rue Ẹrodiasi ni ọ khi ughuẹ iFilipu inyọghuo ọli shi.

²⁰Itobọ ona, Erọdu ọ riẹlẹ ingmobe ni o rue nga ọ, ọ ya mu iJọni shi owa ighumha.[28]

²¹Abi iJọni ọ rọ batazi eni ẹgbọ ọ se, ọ li batazi iJesu. Abi iJesu ọ li sọ iromhi, idane o khueghie-a.

²²Ayẹmhẹ-nọ-pfuasẹ ọ li abi anekhukhu rọte idane tiemhile shi ọli egbe. Uruli o rọte idane ngme, ọọ, “Omimhẹ u khi. Mhi i nono ingme oyẹ gba, irari khi u ma ri egbe ẹ mu mhẹ.”[29]

²³Ikpe uye ali igbe iJesu ọ gbe ni ọ rọ gbe ikanya eyọli ekẹ le. Ọ khi omi ọmọse ni a lu iJosẹfu abi ẹgbọ e kie li khọkhọ li shi, iJosẹfu ni ọ khi omi Eli.

²⁴Omi iMatati ni ọ khi omi iLẹvi, ni ọ khi omi iMẹlki, ni ọ khi omi iJana, omi iJosẹfu.

²⁵Ni ọ khi Omi iMatatiasi, omi Emọsi, omi iNaumu, omi Esili, omi iNagai,

²⁶Omi iMaati omi iMatatiasi, omi iSemeini, omi iJosẹchi, omi iJoda,

²⁷Omi iJoana, omi iResa, omi iZerubabẹli, omi iShalitieli, omi iNeri.

²⁸Omi iMẹlki, omi Adi, omi iKosamu, omi Emadamu, omi Eri,

²⁹omi iJoshua, omi Eliaza, omi iJorimu, omi iMatati, omi iLẹvi,

³⁰omi iSamọ, omi iJuda, omi iJosẹfu, omi iJonamu, omi Eliakimu.

³¹Omi iMelea, omi iMena omi iMatata, omi iNatani, omi iDefidi,

³²omi iJese, omi Obẹdi, omi iBoazi, omi iSamọ, omi iNashọni,

³³omi Aminadabu, omi Adimi, omi Ani, omi Ezirọni, omi iPẹrẹzi, omi iJuda,

³⁴Omi iGiekọpu, omi Aziki, omi Aburaamu, omi iTẹra, omi iNaọ.

³⁵Omi iSẹrugu, omi iRẹu, omi iPẹlegi, omi Eba, omi iShẹla,

³⁶omi iKenani, omi Afazadi, omi iShẹmu, omi iNoa, omi iLameki,

³⁷Omi iMẹtusẹla, omi Enọki, omi iJarẹdi, omi iMaalalẹli, omi iKena,

³⁸omi Enọshi, omi iSẹti, omi Adamu, Omi Ẹshinẹgba.