Read north okpela arhe Irọkhasẹ 5 Bible Online

Irọkhasẹ 5 - north okpela arhe bible

Irọkhasẹ 5

¹Mhi ke gbo mẹ ọni ọ shitọ oni ukpẹkhomhi oghie khi ọ mu ebe ni a kẹkẹ emhi shi odalo ọli ali ukhokho ọli mhuẹ obita. A ri ẹruẹli rọte asha ishilua to ọli ma.[29]

²Mhi mẹ agẹni ni ọ funẹ ni ọ tsẹsẹ ngme leghe ọọ liẹ, “Ọghuo ọ ya dobẹ maghiẹ eni ẹruẹli oni ebe-a?”

³Ama ọgbọkhọghuo ọa la iloghie, wẹkhi ekẹ agbọ, wẹkhi ikpọkẹ na agbọ, ni ọ dobẹ khueghie oni ebe-a, ukẹneta khi eri ọ dobẹ ya bino elemhi oni ebe.

⁴Mhi viẹ egbegbọ irari khi aa mẹ ọgbọ ni ọ tẹọ ni ọ ya khueghie oni ebe-a wẹkhi ni ọ bino elemhi ọli.

⁵Ọtuọghuo eni egbhali eghọ ọọ mhẹ, “Khi ke viẹ! Ghe khẹ, Ọdumhi na unuẹkpẹ oyi iJuda, Omiomi iDefidi ọ she mu ọ le. Ọ dobẹ ya khueghie oni ebe-a ali ẹruẹli ishilua eyọli.”[30]

⁶Ighọ mhi mẹ khi Omi Osumha khi ọ migha odalo oyi oni ukpẹkhomhi oghie ni elamhakọ aane eghọ, ali eni egbhali e gasẹ. Ọ li abinẹ khi a she kpẹ gbe ọli-a. Ọ zẹ ekphali ishilua ali ikpamhi alo ishilua ni e khi Ayẹmhẹ ishilua eyi Ẹshinẹgba ni ọ she ghie je ekẹ agbọ nya.[31]

⁷Ọni omi osumha ọ le ya rue oni ebe obita oyi ọni ọ shitọ oni ukpẹkhomhi oghie.

⁸Abi ọ rọ rue oni ebe se, eni elamhakọ aane eghọ ali egbhali uye ọgbọ ali aane, e de yẹshi odalo oyi ọni Omi osumha. Wẹwẹ nya ọgbọgbọ ọ mu ẹfa mhọli obọ ali itasa igolu ni ituale afu ẹẹra ni a tosẹ e vọ, ni e khi iromhi ni eni Ẹshinẹgba ọ she pfa na e sọ.[32]

⁹E to uwolo onogbọ, e liẹ, “U tẹ ọni ọ rue oni ebe, u gbo tẹ ọni ọ ya maghiẹ ẹruẹli ni a rọ ma ọ-a, Irari khi a gbe-a, U ri ọlia eyẹ dẹ ẹgbọ na Ẹshinẹgba, ẹgbọ ni e rọte agbọ nya bhale rọte unuẹkpẹ nya ali ẹmuẹ ọdọda ali ẹgbọ ọdọda nya.[33]

¹⁰U rẹwẹ mele ighie ali ekpodalo-ugamhi ni ẹ ga Ẹshinẹgba ọyawa-a. E ya la agbọ ke mhẹsẹ.”[34]

¹¹Mhi bino mhi suọ iruli eyi igẹni ebubu ni e ramhi igbẹlẹ ali idududu. E le gasẹ oni ukpẹkhomhi oghie ali elamhakọ eghọ ali eni egbhali.[35]

¹²E ri ukpokpomhi uruli i to uwolo, e liẹ, “Ọni ọ tẹọ Omi osumha ni a gbe-a ọ khi, ni ọ mie ekpabọ ali ẹpfue ali ilẹsingme ali itoto, ali ekpẹ ali ufumhi ali ikuẹghiẹ!”

¹³Mhi tigbe suọ khi emhikpa ni a ma na iloghie ali ekẹ agbọ ali ikpọkẹ na agbọ ali ena okẹ oniẹmhi ali emini e laọ elemhi ọli nya khi ẹ to uwolo, ẹẹ liẹ, “Ọni ọ shitọ oni ukpẹkhomhi ali Omi osumha, Ikuẹghiẹ ali ekpẹ ali ufumhi ali ekpabọ, e khi eyẹẹ, rọte agbọagbọ ya je agbọagbọ!”

¹⁴Eni elamhakọ aane eghọ ẹ li, “Atsẹ,” eni egbhali eghọ, e de yẹshi, e ga li.