Read nso ABÙ-ÁKWÁ 3 Bible Online

ABÙ-ÁKWÁ 3 - nso bible

ABÙ-ÁKWÁ 3

¹Mu onwem bu nwoke ahu nke huworo nweda-n'ala site na nkpa-n'aka nke nrubiga-ókè nke iwe-Ya.

²Mu ka O duworo me ka m'jegharia n'ọchichiri ghara inwe ìhè.

³N'ezie, mu ka Ọ nātughari aka-Ya megide ọtutu mb͕e ogologo ubọchi nile.

⁴O mewo ka anu-arum na akpukpọ-arum ka nká; Ọ b͕ajiwo ọkpukpum nile.

⁵O wuwo ńsí na ike-ọgwugwu dika ulo imegidem, were ya b͕am buruburu.

⁶N'ebe nile b͕ara ọchichiri ka O meworo ka m'biri, dika ndi nwuru anwu site na mb͕e ebighi-ebi.

⁷Ọ b͕achiwom ogige, m'we ghara ipu apu; O mewo ka ọla eji kem ab͕u di arọ́.

⁸Ọzọ, mb͕e m tikuru Chineke nkpu, O mechibido ekperem uzọ.

⁹O werewo nkume awara awa b͕achie uzọm nile, okporo-uzọm nile ka O meworo ka ha b͕agọ ab͕agọ.

¹⁰Bear nke nēche anwu ka Ọ burum, ma-ọbu ọdum nke nọ n'ebe-nzuzo di iche iche.

¹¹Uzọm nile ka O wezugaworo, O we dọbisiem; O mewom ka m'tọb͕ọrọ n'efu.

¹²Ọ zọwo uta-Ya ukwu ikwe ya, O guzom dika ihe edotara ib͕a àkú.

¹³O mewo ka àkú nile nke àkpà-àkú-Ya ba n'akurum abua.

¹⁴Aghọworom ndim nile ihe-ọchi, na abù ha nābù n'ikpọ ubọ-akwara ogologo ubọchi nile.

¹⁵O mewo ka ihe nile nke nēlu ilu jum afọ, O mewo ka m'ṅujue wormwood afọ.

¹⁶O were umu nkume kujie ezém nile, Ọ turawom na ntu.

¹⁷I juwo nkpuru-obim ka ọ ghara inọ n'udo; echezọwom ọdi-nma.

¹⁸M'we si, Ikem alawo n'iyì, ya na ncherem nke sitere na Jehova.

¹⁹Cheta nweda-n'alam na nwagharim, na wormwood na ńsí.

²⁰Nkpuru-obim nēcheta ha nke-ọma, we ruda n'ala nimem.

²¹Nka ka m'nēweghachi n'obim, n'ihi nka ka m'nēchere.

²²O sitere n'ebere nile nke Jehova na emeghi ka ayi gwusia, n'ihi na obi-ebere-Ya nile agwughi.

²³Ha di ọhu kwa-ututu; ihe riri nne ka ikwesi-ntukwasi-obi-Gi bu.

²⁴Òkèm bu Jehova, ka nkpuru-obim siri; n'ihi nka ka m'gēchere Ya.

²⁵Jehova di nma n'ebe ndi nēle anya Ya nọ, Ọ di nma n'ebe nkpuru-obi nke nāchọ Ya nọ.

²⁶Ọ di nma ka madu chere nzọputa Jehova, dere kwa du n'ichere ya.

²⁷Ọ diri nwoke nma ka ọ nēbu yoke na mb͕e ọ di na nwata.

²⁸Ya nọdu náni ya iche, debe ọnu-ya du, n'ihi na Ọ tukwasiwo ya n'olu-ya.

²⁹Ya tiye ọnu-ya n'ájá; ma eleghi anya ọ di olile-anya gādi.

³⁰Ya mere ǹtì-ya nye onye nēti ya ihe; ka ita-uta ju ya afọ.

³¹N'ihi na Onye-nwe-ayi agaghi-aju rue mb͕e ebighi-ebi.

³²N'ihi na ọ buru na O mekpa aru, ma Ọ gēnwe obi-ebere dika iba-uba nke ebere-Ya nile si di.

³³N'ihi na Ọ dighi-esite n'obi-Ya weda umu madu n'ala, mekpa ha aru.

³⁴Izọpia ndi-nkpọrọ nile nke uwa n'okpuru ukwu,

³⁵Iwezuga ikpé ọ bula n'iru Onye kachasi ihe nile elu,

³⁶Ime ka madu b͕agọ ab͕agọ n'okwu-ikpé-ya: Onye-nwe-ayi eleghi ihe ndia anya ọma.

³⁷Ònye bu onye ahu nke kwuworo okwu, o we rè, mgbe onyenwe-ayi enyeghi iwu?

³⁸Ọ̀ bughi n'ọnu Onye kachasi ihe nile ka ihe ọjọ na ezi ihe si aputa?

³⁹Gini mere madu nke di ndu ji atamu ntamu, onye ọ bula, bayere ahuhu nmehie-ya nile?

⁴⁰Ka ayi gwuputa ala uzọ nile ayi, nyochaputa ha, laghachikuru Jehova.

⁴¹Ka ayi weliere Chineke Nke bi n'elu-igwe obi-ayi n'ọbu-aka-ayi abua.

⁴²Ayi onwe-ayi ejehiewo nupu kwa isi; Gi onwe-gi ab͕agharaghi.

⁴³I werewo iwe kpuchie Onwe-gi, we chua ayi; I b͕uwo, I nweghi ọmiko.

⁴⁴I werewo igwe-oji kpuchie Onwe-gi, ka ekpere-ayi we ghara igabiga.

⁴⁵Ihe azachapuru azachapu na ihe ajuru aju ka I nēme ayi n'etiti ndi nile di iche iche.

⁴⁶Ndi-iro-ayi nile asaghepuwo ọnu-ha imegide ayi.

⁴⁷Oké egwu na olùlù eruwo ayi aru, itọb͕ọ-n'efu na ntipia.

⁴⁸Ọtutu iyi nke juputara na miri ka anyam nērùda, n'ihi ntipia nke ada ndim.

⁴⁹Anyam nāwusi dika miri, ọ dighi-eguzo kwa du, ghara ikwusi akwusi,

⁵⁰Rue mb͕e Jehova gēsi n'elu-igwe lepu anya, hu.

⁵¹Anyam nēme nkpuru-obim ihe, n'ihi umu-ndinyom nile nke obodom.

⁵²Ndi bu ndi-irom n'efu achusiwo ntám ike dika nnunu.

⁵³Ha ekpochapuwo ndum n'olùlù, we tuam nkume.

⁵⁴Miri rubigaram n'isi; asirim, Ebipuwom.

⁵⁵Esirim n'olùlù dichasi ala kpọkue aha-Gi, Jehova.

⁵⁶Olum ka I nuru; ezobela nti-Gi n'iku-umem, na ntikum.

⁵⁷I biaruru nso n'ubọchi m'kpọkuru Gi: I siri, Atula egwu.

⁵⁸Onye-nwe-ayi, I kpezuwo ọnu nke nkpuru-obim; I b͕aputawo ndum.

⁵⁹Jehova, I huwo nb͕agọm; Gi kpe ikpem.

⁶⁰I huwo ibọ̀-ọ́bọ̀ nile ha na èchìchè nile ha n'arum.

⁶¹I nuwo ita-uta-ha, Jehova, na èchìchè nile ha megidem;

⁶²Eb͕ub͕ere-ọnu nke ndi nēbili imegidem, na ntughari-obi-ha megidem ogologo ubọchi nile.

⁶³Legide inọdu-ala-ha, na nbili-ọtọ-ha; mu onwem bu abù ha nābù n'ikpọ ubọ-akwara.

⁶⁴I gēnyeghachi ha nmeso-ha, Jehova, dika ọlu aka-ha si di.

⁶⁵I gēnye ha ihe-nkpudo obi, bú ọb͕ub͕a-iyi I b͕ara ha.

⁶⁶I gāchu ha n'iwe, kpochapu ha n'okpuru elu-igwe nke Jehova.