Read nya huba Matta 15 Bible Online

Matta 15 - nya huba bible

Matta 15

¹Kəl ngə alenya njir Farisi ana ka maləm gadlagadla tə hya'atə vu Urshalima, ga shili jau Yesu,

²“Mya gwa'atə shawa nghə kwa ɓəlnda sənda jival kəmən tə dlədləɓətə məna? Jan a da nda kwa chinda chi təvi nda səm sə wa!”

³Ngə Yesu tə ɓəlakə nda, “Mya gwa'atə hya kwa ɓəlnda gadlagadla Hyel, anyar dlədləɓə kəhya?

⁴Aka Hyel tə na, ‘Ka hətə nyi səli nə ada ngha ana ama ngha, dəhə ndə nda ngəliya ada nyi ndara ama nyi, tuku nja tsəya nyi.’

⁵Kəl ja, nahi, hyo na tsa'atsa'a tanyi ma ndə tə nar nyi nə njir yah nyi, ‘A da ya kwa nau vala hi wa. Aka a wurtə ya mbatə ndəra ənda yo nənyi dəhə sənda hyo kina uya tsa ya nə Hyel.’

⁶Mada a da cha zhaka hətə nyi səli nə njir ya nyi wa. Aka sər jival kəhi hya fiya ɓwanya Hyel ka sə ɓwa'atanyi.

⁷Nahi nji dəmən, tsa'atsa'a tanyi Ishaya ndər mətakər tə tsəfətə təkəra hi ənda Hyel tə na,

⁸‘Nji'ina atə chimər nya nda tanyi nə nda kwa fal ɗa, kəl ja, ɗufwa nda naɗə tsa ya.

⁹Ɓwa'atanyi nə nda kwa həsəli na'a, aka tsaubar nji ngə nda kwa dlədləɓə nə nji bəra ɓwanya Hyel!’ ”

¹⁰Kəl ngə Yesu tə nga dlama nji ga nar nda, “Səya ma himi hya ngabiya!

¹¹A da sənda tə gwa təwa nya ndə ngə kwa mərtə nyi hiɗahiɗa mar Hyel wa, kəl nda sənda kwa biya ku nya cha.”

¹²Kəl ngə shawa inda tə shili da cha ga na, “A zəndətə kə ənda huɗa njir Farisi ingə tlatə tsa ɓwanya nga?”

¹³Ngə Yesu tə wum ga na, “Dəhə wu nda a da Ada ɗa nda kya huɗamələm ngə tə chiya wa njo təsənda.

¹⁴Ngwa hya ɗəngha na nda wa! Njir wuləfə ingə kwa təɗə kuvanda njir wuləfəu. Ma ndər wuləfə tə təɗə kuvanyi, tsa'a kya'a nda kwa pəpə gu ka'u.”

¹⁵Kəl ngə Bitrus tə na, “Dəkəbiya ea sənda ba'ada ngə təkəri.”

¹⁶Ngə Yesu tə jau nda, “Ma'a nahi ba'aka sakana a da hya ngabiya wa?

¹⁷A da hya ngabiya ma? Dəhə sənda tə gwa təwa nya ndəu, kwa səya ku ta cha, ya cho təbiya.

¹⁸Kəl ja, sə'inda ndə kwa pəa hya'ati ku ɗufwa cha ndani, sə wi ingə ngə kwa mərtə ndə hiɗahiɗa.

¹⁹Aka ku ɗufwa ndə ngə jigadəma ɗimi kwa hya'ati, wi ka tsa ndəu, kasalikur, shi'ushi'ukur, həl, tla gəzhi, ana pə ɓwanya ɗimi təkəra alenya nji.

²⁰Sə ingə ngə kwa mərtə ndə hiɗahiɗa. Kəl ja, səm sərsum na chi kəla chi da kwa mərtə ndə hiɗahiɗa wa.”

²¹Ngə Yesu tə ngyar mbwa nda ga təra yatə hə'i Taya ana Sidon.

²²Kəl janə vanya mala Kan'ana nda na ngya tangnda tə shili da cha, cha har kuraka cha, ga na, “Tlakəu, Zər Dauda ngatə təhuɗə ɗa! Kwa ɗa da na məlləm ku kəra cha, kwa nənyi ɓwaɓwatə gagaɗa.”

²³Kəl ja, Yesu da shau nyi wa. Ngə shawa nyi tə shili da cha ga gədi nyi, “Gədlənda nyi! Aka cho wendə mən na kurakəu!”

²⁴Kəl ngə Yesu tə wum ga na, “Nja sə ɗa kəl ka kətəng sasa nə njir Isra'ila.”

²⁵Ngə mala nda tə shili dzən nda ga uzhi huɗə nyi, ga na, “Tlakəu vala ɗa.”

²⁶Ngə Yesu tə na, “A da tsa'atsa'a nja hətə sərsum ngulisha'a nja sətə nyi nə həya wa.”

²⁷Ngə mala nda ɓəlakə nyi, “Jiri ngə Tlakəu, kəl ja, həya kwa səm sərsum nda kwa pəpə ku nya tlakən nda.”

²⁸Kəl ngə Yesu tə wum ga nar nyi, “Malakəu, jirikur nghə 'ualəu! Sənda ko i cha ɗa nənghə ənga.” Aku ndana bəji kwar mala nda tə mbəa.

²⁹Yesu tə ngyar mbwa nda, cha nəu nya Fa'a Galili. Ngə cha gi ngyata nyi tə dəgəl.

³⁰Dlama nji ɗang gagaɗa tə shili na njir gadal, njir wuləfəu, nji'inda hya nda sanyadza, nji kəla nau ndəra ana alenya njir shiləkə ɗanghəu. Nda shili na nda mar Yesu, ngə cha mbandə nda.

³¹Dlama nji tə mər məngəl ənda nda la'a nji'inda pa'a kwa nau ndəra kwa ndəra, nji'inda hya nda sanyadza, tə uya mbəa, njir gadal kwa ma'i, njir wuləfə tsəu kwa la'a səu, nda kwa fal Hyel njir Isra'ila.

³²Yesu tə nga shawa nyi shili da cha ga na, “Yo ngatə təhuɗə nji'ina aka hanyi makər nə ea kə'i nda tangna, janə a da nda uya madami ga səm wa. Ya a da yo i ya wiɗənda nda na huɓə wa, tsa nda da dla ku laku.”

³³Shawa nyi inda tə wuma, “Ama məno uya sərsum nda kwa nji dlama nji'ina, ya a nji da na ngya tangnə wa?”

³⁴Ngə Yesu tə jau nda, “Takwara yiɗawa ngə tsa hya?” Ngə nda ɓəlakə nyi, “Məɗəfa ana nguli kalfi yiɗau.”

³⁵Ngə cha nar nyi nə dlama nji'inda nda uya vir ngya hu'i.

³⁶Ngə cha hətə takwara məɗəfə inda ana kalfi inda, ga mərtə nyi usaku nə Hyel, ga pəpasəu ga nənyi nə shawa nyi inda, ngə nda tətəkəya nda.

³⁷Dəhə nda tə səma ga nyi. Ngə shawa inda tə tsəmtə sənda həyadza, tsəla məɗəfa.

³⁸Ba nji'inda tangnda shili dəbu fwaɗəu, a da nja jiga mahi'i ka ngulisha'a wa.

³⁹Kəl ngə Yesu tə wiɗənda dlama nji, ngə cha gwa ku param ga təra yatə hə'i Magadan.