Read nya huba Matta 17 Bible Online

Matta 17 - nya huba bible

Matta 17

¹Ahir hanyi kwah, Yesu tə hətə Bitrus, Yakubu ana Yohana zamənya Yakubu, ga təra na nda gyo kəra mə dzəgaməu nanda səkənda.

²Sakanda nda kwa ndzam nyi, kəl ngə nda la'a Yesu tə sha matsa nda cha parang, huɗəma cha kwa mbəl wi pəchi, ləkutə dza cha tə sha pərtə tyal kwa mbəla.

³Kəl ngə shawa makər inda tə la'a Musa ana Iliya tə chabiyadza, nda kwa ɓwanya na Yesu.

⁴Ngə Bitrus tə nar nyi nə Yesu, “Tlakəu, mənakə gagaɗa təmən tangna, ma cha kwa i ka, yo latə madləɓa makər tangna, nənghə patləu, nə Musa patləu ana nə Iliya patləu.”

⁵Tsəu cha ku huɗa ndəra kəl ləmbəkə pərtə nda kwa mbəla tə səya haɗiya nda dərdla'a, kəl nda ngatə kurakə tə səya kyo ləmbəkə nda, kwa na, “Nənnə ngə Zər ɗa, nda yo nyida, yo mər hirgyaɗi nacha gagaɗa. Sə ma himi da cha!”

⁶Nda shawa inda tə ngatə kurakə nda, nda dla səya hu'i na ləvəra.

⁷Ngə Yesu tə shili ləhə dzən nda ga tsəka nda, ga na, “Hya'atə ma, ngwa hya da ləvər wa!”

⁸Manda har kər a na nda la'a vanya ndə wa kəl Yesu.

⁹Ma ndo səya kyo mə nda, Yesu tə tsau nda bar, “Ngwa hya da dəkar nyi nə madawa sənda hya la'a wa, kəl ma Zər Ndə tə hya'atə ku hwa.”

¹⁰Ngə shawa inda tə jau nyi, “Ja ma'a ngə ka maləm gadlagadla Musa kwa na, tuku Iliya ndər mətakər kwa ghəya shili təvi Kəristya?”

¹¹Ngə Yesu tə wum ga na, “Vəvəl tuku ngə Iliya kwa ghəya shili tangərma, ka cha shili məməlabiya dəhə səu.

¹²Kəl ja, yo nar hi Iliya wurta shili, ya a da nda ngabiya nyi wa, ngə nda mərtə nyi dəhə sənda kəra nda i. Əngə tanyi tsəu nda kwa ɗa məndza'u na Zər Ndəu.”

¹³Ngə shawa inda tə ngabiya ənda təkəra Yohana ndər mər baɓtisma ngə cho ɓwanya.

¹⁴Nda Yesu ka shawa nyi inda tə səya gwa ku dlama nji, ngə vanya ndə tə shili uzhi mar Yesu ga na,

¹⁵“Tlakəu, ngatə təhuɗə təkəra zər ɗa, sə ngo chinyi, kwa pa nyi gagaɗa, zhaka ɗang tanyi cha kwa dla gu hu'u, ka gwatə dəl.

¹⁶Ngə ya shili nacha da shawa nghə inga, ya a da nda nau mbandə nyi wa.”

¹⁷Ngə Yesu tə wum ga na, “Kara nahi njir bəji na, nji kəla jiri, nji ɗimi, ba'a sakamani yo ngya kə'i hya? Ba'a sakamani yo ngya ka səsə'u hya? Anda ma na zər nga tangna!”

¹⁸Ngə Yesu tə tsə məlləm nda, təma ngə cha biya ku zər nda, ngə zər nda mbə ku nda na bəji.

¹⁹Ahir nga, ngə shawa nyi inda tə shili da Yesu tə nda səkənda ga jau nyi, “Mi nda katə ea tsa gədləbiya məlləm nda?”

²⁰Yesu tə nar nda, “Aka a jirikur kəhi da wa nga. Vəlvəl yo nar hi, macha jirikur kəhi da kushi wi məlar mustad, hyo nau nar nyi nə mə na, ‘Təsə tangna, ka təra yi na nda,’ kəl cho təra, ya səda kwa ndiya dunama kəhi wa.”[9]

²²Ahir nda ɓəla tsəmtədzə vu Galili, kəl Yesu tə nar nda, “Njo tləɗanda Zər Ndə nə nji.

²³Nda kwa tsəya nyi, kəl ja, pəshir hanyi makərkunyi cho hya'ati na pi.” Kəl huɗa shawa nyi inda tə tla.

²⁴Nda Yesu ka shawa nyi tə dzəva Kafarnahum, njir tsəm tsachi ka mbwa'alə Hyel tə shili da Bitrus ga jau nyi, “A maləm kəhi da kwa ki tsachi mbwa'alə Hyel ma?”

²⁵Ngə Bitrus tə na, “Kwa ki cha.” Nda Bitrus tə shili ku ki, ngə Yesu tə ghəya ndər nənyi, ga na, “Mi sənda ka har təkəra ɓwanya nga? Atsa wa ngə təltəl nə dunəya ingə kwa dləu tsa cha, atsa nguli kənda zəma aa tsa nji shilishili?”

²⁶Ngə Bitrus tə na, “Atsa nji shilishili.” Ngə Yesu tə ɓəlakə nyi “Yau, a char tə nguli kənda do ki wa.

²⁷Kəl ja, dəhə ka ənga tsa huɗa nji ingə da tla tsamən, ma'i gu fa'a, ka gwa bəzəu ngəliki, kalfi nda ka səya tangərma ko mbəɗiya nyacha ko həbiya kwaba kwa. Ka hətə ka yi kinda ma tsachi ngə ni.”