Read nya huba Matta 18 Bible Online

Matta 18 - nya huba bible

Matta 18

¹Aku bəji nda shawa inda shili da Yesu ga jau nyi, “Wa ngə ndə nda ndiya na dəgalkur ku təlkur huɗamələma?”

²Ngə Yesu tə nga zər kushu ga ta'ində nyi ku pama nda,

³ngə cha na, “Jiri yo nar hi, ma a da hya sha ga ɗa wi ngulisha'a wa, a da hyo gwa ku təlkur huɗamələm pa'a wa.

⁴Aka əngə ja, ndə nda ndiya na dəgal ku təlkur huɗamələm nacha ngə ndə nda tə həya kərnyi ga ɗa wi zər nənna.

⁵Ya dəhə ndə nda tə dləutsə zər wi nənna ku tləm ɗa, naya nda cha dləutsi.

⁶“Madawa tə gwa'atə zhang ku pama ngulisha'a shiɗəɗə inə kwa na'a jiri nə tə mər səpəla'a, bəliya nja mbatə nyi bəra dəgal tə wulya tlakə nyi nja bəzəu nyi gwatə kwar fa'a.

⁷Sər təhuɗə na dunəya, nacha nda na sər gwa'atə nji kwa mər səpəla'a! Tuku ngə sə wi ingə kwa shili, kəl ja, sər təhuɗə na ndə nda tə shili təwa nyi!

⁸“Macha chakə ndara hya kə kwa gwa'atə ko mər səpəla'a, ka tlanda ka sənda. A ndiya nghə tə vi ka gwa ku pi nda ba'anawa ana chi zhang ndara hi zhang tsa njo bəzəu nghə gu hu'u nda ba'anawa ana chi mətləu ndara hi mətləu.

⁹Macha lyakə kwa gwa'atə ko mər səpəla'a tsəu, chakubiya. A ndiya nghə tə vi ka gwa ku pi na li zhang tsa njo bəzəu nghə gwa ku hu'u nda pa'a kwa tə na lyakə mətləu.

¹⁰“Hya ɗa na dəma tsa hya da həyatə ngulisha'a shiɗəɗə ina. Aka yo nar hi, chama kənda kwa yi na wula kənda nə Ada ɗa nda kya huɗamələm.[10]

¹²“Mi sənda hyo har ma ndə na kətəng nyi gharəu ngə zhang ku huɗa nda tə sa? A da cho ngyar dləkumənyi parnya dlə inda kyatə sara ma, cho təra ki gwa'a sasanyi nda ma?

¹³Jiri ya kwa nar hi, macha uya, cho mər hirgyaɗi təkəra zhang nda matsa inda dləkumənyi parnya dlə inda pa'a sa nda.”

¹⁴Əngə tanyi tsəu ja, Adanə hi nda kya huɗamələm da kwa i zhang ku huɗa ngulisha'a shiɗəɗə ina sa wa.

¹⁵“Ma kuvanghə ndər nəu tə mərtə nghə bikəu, ka yi da cha ka chabiya nyi bikə nyi təhi mətlə tahi. Ma cha səhimi da ka, a ɓəlandə nyi təkə shili.

¹⁶Kəl ja, ma a da cha səhimi dakə wa, ka uya ndə zhang ndara nji mətlə dzə ngha, tsa'aka dəhə ɓwanya nda nji mətlə ndara makərə tə dləukəri, ɗatə ngyangyanyi.

¹⁷Ma a da cha səhimi da nda wa, kəl ba'a ka dəkar nyi nə njir nəuwa. Ma cha ngyar səhimi da njir nəuwa, ka fiya nyi wi ndə nda pa'a kwa zəndə Hyel ndara ndər tsəm tsachi.

¹⁸“Jiri yo nar hi, ma dəhə sənda hya mbiya tə dunəya, mbiya tə nji kya huɗamələm, ma dəhə sənda hya pəlnda tə dunəya nə tsəu, pəlnda tə nji kya huɗamələm.

¹⁹“Yo tsakətə nar hi, dəhə sakanda nji mətla ku huɗa hi tə dunəya na, tə dləukər na sənda hya pətlənya təkəri, Ada ɗa nda kya huɗamələm kwa mərtə hi sə sənyi.

²⁰Aka mbwa nda nji mətlə ndara makər tə daɓiyadzə tə ku tləm ɗa, tangnda ya ku pama nda.”

²¹Kəl ngə Bitrus tə shili da Yesu ga jau nyi, “Tlaka, zhaka yiɗawa yo kina farbikər zamə ɗa macha mərtə ɗa bikəa? Zhaka məɗəfa ya?”

²²Ngə Yesu tə wum ga na, “A da zhaka məɗəfə tanyi wa, kəl nda məɗəfə məɗəfə zhaka məɗəfəkumnyi.

²³Aka təlkur huɗamələm kwa pabiya da təl nda tə gwa ku jiga gəna nyi nda tsa mavi'i nyi.

²⁴Nda cha ghəya, kəl nja shili na vanya ndə nda təl nda kwa nəu nyi pam dəbu kuma.

²⁵Manda a da cha kwa nau kinda wa, ngə təl nda na, nja ki ɗəlnda nyi kya'a nda na mala nyi, ka ngulisha'a nyi ana dəhə sənyi, nja kinda məl nda ni.

²⁶Ngə mava nda uzhi tə undya cha mar təl nda cha gədi, ‘Maki, ngatə təhuɗə ɗa, ka na'a bəji kushiu yo kinda nghə dəhəu!’

²⁷Ngə təl nda ngatə təhuɗə mava nda, ngə cha ngya nyi na məl nda ga ngya nyi cha təra.

²⁸“Kəl ja, nda ndə nda biya ɓə na kuvanyi mava nda cho nəu nyi kwaba gharəu zhang tanyi. Ngə cha ɓəjitə fəlangha cha, cho na, ‘Kinda ɗa sənda yo nəu ngha!’

²⁹Ngə kuvanyi mava nda uzhi ga gədi nyi cha na, ‘Maki, ngatə təhuɗə ɗa, ngya ɗa na bəji kushiu, yo kinda ngha.’

³⁰Kəl ja, cha ngyari, ga ki fəunyi ku jarum, kəl nacha kinda nyi.

³¹Nda alenya mavi'i tə la'a ənga, ngə huɗa nda tla, ngə nda təra ga yi nar nyi dəhə sənda ɗa nə təl nda.

³²Kəl ngə təl nda nga ndə nda cha ngya nyi na məl nda, ga na, ‘Nakə mava pəlapəla'a! Ya ngya nghə na dəhə məl nda yo nəu ngha, aka ka gədi ɗa.

³³A da ɗa tsa'atsa'a ko nda ngatə təhuɗə kuvanghə mava wi nda ya ngatə təhuɗə nghə ma?’

³⁴Huɗa təl nda tla, ngə cha na nja fəunyi ku jarum ka nja nənyi ɓwaɓwatəu, kəl nacha kinda sənda təkəra cha dəhəu.”

³⁵“Əngə tanyi tsəu Ada ɗa nda kya huɗamələm kwa mərtə hi, ma hya ngyar farbikər zamən hi ka kwamən hi ku ɗufwa hi.”