Read nya huba Matta 2 Bible Online

Matta 2 - nya huba bible

Matta 2

¹Nja yah Yesu avu Baitalami atə hə'i Yahudiya, aku bəji nda təl Hiridus ku dzəga təlkur ti. Kəl ngə alenya njir zəndəbiya sasəlga tə hya'ati təwa zədər pəchi tə dzəva Urshalima,

²ngə nda jawa, “Aman ngə zər ngə nja yah təl njir Yahuda nga? Aka a la'atə ea sasəlga nyi təwa zədər pəchi, na cha nə ea shili ka ea hətə nyi səli.”

³Ɓwanya nga tə wendə təl Hiridus kəɓanghəu, ana dəhə njir Urshalima.

⁴Ngə cha tsəmtə dəhə wawa'ar fərist ka maləm gadlagadla, ga jau nda, aman ngə njo yah Kəristi Ndər Dləuya?

⁵Nda nar nyi, “Avu Baitalami atə hə'i Yahudiya, əngə sənda ndər mətakər tə tsəfa.

⁶‘Nakə Baitalami atə hə'i Yahuda, a da kə mələm təutətəutə tə hə'i Yahudiya wa. Aka aku ka njo yah təl dəgal nda kwa nəu na na'ana nji, Isra'ila.’ ”

⁷Kəl ngə Hiridus tə nganda njir zəndə sasəlga inda, aka ga cha zəndə təkəɗər bəji nda sasəlga nda tə biya ti.

⁸Ngə cha sə nda gwa Baitalami abəra, “Ma'i ma hya ki gwa'a zər ngə na sənam, ma hya uya nyi hya shili nar ɗa aka ma'a naya ya yi hətə nyi səli.”

⁹Manda nda ngatə ɓwanya təl, ngə nda dləutsə laku. Kəl janə sasəlga nda nda la'a təwa zədər pəchi nda kwa təra manə nda, na nda tsəu kwa nəu hi nyi kəl sakanda cha yi ta'i gya kəra vi nda zər nda kwa.

¹⁰Nda nda la'a sasəlga nda, kəl nda mər hirgyaɗi gagaɗa.

¹¹Ngə nda gwa ku ki nda, ngə nda la'a zər nda ana ama nyi Maryamu, ngə nda uzhi ga hətə nyi səli. Ngə nda pəliya mbəl kənda ga fa'abiya ga'a nə bəjingha, ana sə'inda kwa shi'uni kwitəkwitəu.[2]

¹²Kəl ngə nda ɓəl ta nda ya tə hə'i kənda təwa vanya laku paməu, manda Hyel tə nar nda ku shi'uni gwa tsəu nda yi təwa təl Hiridus wa.

¹³Manda njir zəndə sasəlga inda tə təra, ngə Chama Tlakə tə chabiya nyi dzə nə Yusufu ku shi'uni ga nar nyi, “Hiridus kwa gwa'a zər ngə ka tsa. Aka ənga, hya'ati! Ka hətə zər nga ana Ama nyi ka hwi yi Masar, ka ngya vu nda kəl sakanda ya nar nghə ka ɓəl shili ti.”

¹⁴Ngə Yusufu tə hya'ati ga hətə zər nda ana Ama nyi əvu'i ga təra yi Masar.

¹⁵Nda ngya hinda kəl sakanda təl Hiridus tə nda tah. Sə ngə tə ɗa ka ga cha nyabiya sə nda Tlakə tə na təwa nya ndər mətakər bəra, “Avu Masar ya ngabiya zər ɗa.”

¹⁶Sakanda Hiridus tə nda zəndəbiya ənda njir zəndə sasəlga inda shandənyi tə kər, ngə ɗufwa cha nginyi. Ngə cha sə ləvaləva nda ki kuɗənda dəhə ngulisha'a shili nda vu Baitalami ana mələm nda lələhəu, ghəya tə nguli fa mətlə səya tə inda shiɗəɗə matsa nda, wi nda ngabiya cha tsa njir zəndə sasəlga inda.

¹⁷A təwa ənga sənda Irmiya ndər mətakər tə na, tə nyabiyadza,

¹⁸“Nja ngatə kurakə avu Rama, kurakər tiwi ana huɗətla. Rahila kwa tiwi ka nguli nyi, a ndə nda kwa nau fətənyi ɗufəu wa, aka nda kuɗa.”

¹⁹Ahir nda Hiridus tə tah, ngə Chama Tlakə tə shili da Yusufu ku shi'uni avu Masar,

²⁰ga na, “Hya'ati ka hətə zər nga ana Ama nyi, hya ɓəl ya ti hə'i Isra'ila, aka nji'inda kwa gwa'a zər ngə ka tsa nda, a kuɗəti.”

²¹Kəl ngə cha hya'atə ga hətə zər nda ana Ama nyi ga ɓəl yatə hə'i Isra'ila.

²²Kəl ja, nda cha ngatə ənda Arkilayus zər Hiridus ngə tə dləu cha ada nyi na təlkur vu Yahudiya, ngə ləvər tə səya nyi tsa yi nda. Ngə nja ɓəla tsakətə təɗəhimi nənyi ku shi'uni, ngə cha tərata nyi yatə hə'i Galili.

²³Ngə cha yi ngyata nyi ku mələm nda njo nga Nazarat, ga nja nyabiya sənda njir mətakər tə na, “Njo nga nyi ndər Nazarat.”[3]