Read nya huba Matta 20 Bible Online

Matta 20 - nya huba bible

Matta 20

¹“Aka təlkur huɗamələm kwa pabiya tlakər fa nda biya tsəɗakə mbudla ka gwa'a nji ka mər tlər ku fa anap nyi.

²Ngə nda ɓatliya cho kinda nda kwaba nda njo ki ku ɓupəchi, ngə cha sətə nda gu fa nyi.

³Wi saka dlə nə mbudla, nda cho tərabiya nya suku ngə cha la'a alenya nji tə ta'i səda nda kwa mər wa.

⁴Ngə cha nar nda, ‘Nahi tsəu ma'i ma gwa mər tlər ku fa ɗa, yo kinda hi sənda tsa'atsa'a.’

⁵Kəl nda hya'ati ga təra gu fa nda. Ətsəu, pəchi tangkər, ana atə saka makər nə akəu, cha ɓəla biya ga mər tang wi nga.

⁶Atə saka tufu nə akəu, cha ɓəla gwa nya suku cha la'a alenya nji tə ta'i səda nda kwa mər wa. Ngə cha jau nda, ‘Mya gwa'atə təhi ta'i tangna pa'a pəchi ɓwa'atanya?’

⁷Ngə nda na, ‘Aka ndə da gwa'a ea ka tlər wa.’ Ngə cha nar nda, ‘Ma'i ma ma'a nahi hya gwa mər tlər ku fa ɗa.’

⁸“Nda akə tə ɗa, ngə tlakər fa nar nyi nə katsadala nyi, ‘Nga njir mər tlər inga ka kinda nda wazəba kənda, ka ghəya na nji'inda batə shili, ka udiya na nji'inda ghəya shili.’

⁹Nji nda tə ghəya tlər tə saka tufu nda, ngə nja kinda nda, kwaba nda njo ki ku ɓupəchi.

¹⁰Nda nji'inda tə ghəya tlər tangərma tə shili ka njo kinda, nda har nda kwa dləutsə 'ual matsa nə nji'inda, kəl ja, na nda ma nja nənda kwaba nə ɓupəchi zhang wi nə nji'inda.

¹¹Nda nda dləutsə kwaba kənda nda ghəya huhuni təkəra tlakər fa nda,

¹²nda kwa na, ‘Nji'ina batə shili na, tlər saka zhang tanyi nda məra, ya ka kinda nda wi nda ka ki ea, naea nda tə mər tlər tsa'anyata tə pəchi dədadəda pa'a pəchi!’

¹³“Ngə tlakər fa nda tə wum ga nar nyi nə zhang ku pama nda, ‘Ngatə bazhi, a da ya ɗiya nghə wa. A da ka dləukər ga mər tlər ka kwaba nda njo ki ku ɓupəchi ma?

¹⁴Dləutsə wazəba ngha, ka təra. Naya nga i ki hi məlməl na nji ngə ya hətə batəbatənyi nga.

¹⁵Aa bikə cha ma ya mər sənda kəra ya har na kwaba ɗa ya? Aa ko ndahuɗə aka ya mər mənakəkur nə alenya nji ya?’ ”

¹⁶Aka ənga, “Ɗang tanyi, nji'inda tangərma, kwa ɗa ka nji batəbata, nji batəbatə tsəu kwa ɗa tangərma.”

¹⁷Nda Yesu kwa təra gwa Urshalima, ngə cha nga nda shawa daɗədaɗə kwabəmətlə inda, ga nar nda,

¹⁸“Gwa Urshalima nə mən, njo gwa tləɗanda Zər Ndə nə wawa'ar fərist ka maləm gadlagadla Musa. Nda kwa tlanda nyi nəumar tah.

¹⁹Ətsəu nda kwa nənyi nyi nə nji'inda pa'a njir Yahuda, nda kwa gyaɗənda nyi, nda kwa dəgənyi na wuɗa, ba kukwanda nyi tə taməngəla. Kəl ja, pəshir hanyi makərkunyi cho hya'ati ku hwa.”

²⁰Kəl ngə Amanya nguli Zabadi tə shili da Yesu ana nguli nyi mətləu, ngə cha uzhi ma nyi ka cha gədi vanya sə tsa cha.

²¹Ngə Yesu tə nar nyi, “Mi sənda ko i ja?” Ngə mala nda wum ga na, “Ka i nguli ɗa inə nda ngya zhang tə chisəma ka, zhang tə matsala ka ku təlkur ngha.”

²²Ngə Yesu tə nar nda, “A da hyo zəndə səngə hyo gədi ngə wa. Kwa nau hya sa ku ɗeɗika ɓwaɓwatə nə kwa səkə ɗa nə ya?” Ngə nda wuma, “Kwa nau ea.”

²³Ngə Yesu tə nar nda, “Jiri, hyo nau sa ku ɗeɗika ɓwaɓwatə ɗa, kəl nda nyar ngya tə chisəma ya ndara matsala ya a da na'a ngə wa. Ada ɗa ngə kwa nənyi nə nji'inda cha ɓatliya kari.”

²⁴Nda alenya shawa kum inda tə ngatə ngə na səu, kəl huɗa nda tə tla tsa shawa mətlə ndə na zamə nyi inda.

²⁵Ngə Yesu tə nga nda dəhə nda ga na, “A zəndətə hi nji təltəl nə nji'inda pa'a njir Yahuda kwa cha təlkur, wawa'a kənda tsəu kwa cha gyalkur nənda.

²⁶A da əngə sənda kwa kina ɗa ku pama hi wa. Ma cha zhang ku pama hi kwa gwa'a ka na cha ɗa dəgaləu, tuku kəl cha ɗa mava kəhi.

²⁷Ndə nda kwa gwa'a ɗa gau tsəu, təku cha ɗa ka mava kəhi,

²⁸Əngə tanyi tsəu, a Zər Ndə da shili ka nja mər mavakur nənyi wa, kəl nda ka ga cha mər mavakur ana cha sanda pya cha ka cha dləuya nji ɗanghəu.”

²⁹Nda Yesu ka shawa nyi kwa ngyar Jariko, dlama nji ɗang gagaɗa tə nəu nyi.

³⁰Njir wuləfə da tsa'a mətlə tə ngya, anya laku. Nda nda ngatə ənda Yesu kwa shili tahə laku nda, ngə nda nga na kurakə dzəgam dzəgaməu, ga na, “Tlakəu Zər Dauda! Ngatə təhuɗə kəea!”

³¹Ngə dlama nji'inda tsə nda, nda bəgə ɗiyu. Kəl ja, nda tsakətə hya'a kurakəu ndo na, “Tlakəu, Zər Dauda, ngatə təhuɗə kəea!”

³²Ngə Yesu tə ta'i ga nga nda. “Mi sənda hyo gwa'a ya mər tə hya?”

³³Ngə nda wuma, “Tlakəu, kwa i ea ea la'a səu!”

³⁴Ngə Yesu tə ngatə təhuɗə kənda ga tsəkar lya nda, təma ngə lya nda mbəɗə ngə nda nəu nyi.