Read nya huba Matta 22 Bible Online

Matta 22 - nya huba bible

Matta 22

¹Yesu tə ɓəla ɓwanya na ba'ada nənda cho na,

²“Təlkur huɗamələm kwa pabiya da ba'ada nənna. Vanya təl da ɗakaɗa nda tə ɓatliya ladər gha mala nə zər nyi.

³Ngə cha sə mavi'i nyi ka nda ki nar nyi nə nji'inda nja nga nda shili aka ɓatliya tənji dəhə səu, kəl ja, nji'inda ngyar shili.

⁴“Kəl ngə cha ɓəla sə alenya mavi'i nda ki nar nyi nə nji'inda nja nga, ‘Ɓatliya təya ladər, a tsəya təya hahaldi i'i ana tla nda nja ngalti, dəhə sə ɗati mənakəu. Anda ma tə mbwar ladər!’

⁵“Kəl ja, mihiɓi inda nja nga nda, da səhimi da nda wa, kala ndə tə təra ki tsa gadu nyi, ndə zhang tə tərata nyi kyo fa nyi, vanya ndə tə tərata nyi ki shafəli nyi,

⁶ngə alenya nji'inda tə səya mavi'i inda, ga dədəgənda nda, ga tsəya nda.

⁷Ngə huɗa təl nda tla gagaɗa, ngə cha sətə ləvaləva nyi nda yi kuɗənda njir tsa nji'inda ga nginda mələm kənda tlaɓətlaɓəu.

⁸“Ngə cha nga mavi'i nyi, ga nar nda, ‘A ɓatliya tənji ladər gha mala na, kəl nda nji'inda nja nga da ki nə wa.

⁹Sakana, təra ma kyo mətəkər laku i, hya nga kala nji'inda hya la'a, nda shili ku ladər na.’

¹⁰Kəl ngə mavi'i inda tə biya ku lakur yauraki ga nga kala nji'inda nda uya shili ku ladər, nji mənakəu ana nji ɗimi dəhəu, vi ladər nda tə nyi chaɓəu.

¹¹“Kəl ja, sakanda təl nda tə gwa ka cho tular mihiɓi inda, ngə cha la'a vanya ndə nda pa'a da na ləkutə ladər dzə nyi.

¹²Ngə təl nda nar nyi nə ndə nda, ‘Bazha, aman ka ɗana səgwa na, ya a ləkutə ladər da dzə nghə wa?’ Kəl ja, ndə nda da uya sər dəkə wa.

¹³“Təma ngə təl nda tə nar nyi nə mavi'i nyi, mbiya nya ma chi na hi hya vakəu nyi gu kutlə kyakyar nga. Tangnda nja kwa tiwi ana ɗəhir.”

¹⁴Ngə Yesu tə udiya ga na, “Ɗang nji'inda nja nga, kəl ja, ɗəmɗəmənyi tsaɗəu.”

¹⁵Njir Farisi tə təra ki mbandər ənda nda kwa ɗa na səya nyi na bikə ku ɓwanya.

¹⁶Ngə nda sətə alenya shawa kənda kə'i njir nəu hir Hiridus, ngə nda na, “Maləm, zəndətə ea ənda ndər jiri ka. Ko dlədləɓə sənda jiri təkəra ɓwanya Hyel, ka hətə nji dəhə sə zhang, aka a da ko takəl ku nji wa.

¹⁷Dəkar ea ja, ndara mi sənda la'a ka? Tsa'atsa'a tanyi məna tsachi nə Kaisar zəma, aa a da tsa'atsa'a wa?”

¹⁸Kəl ja, Yesu zəndəbiyatə kwakunakur kənda, ngə cha na, “Na hi nji dəmən! Mya gwa'atə hyo nga ləbam na'a?

¹⁹Char ɗa ma kwaba nda njo tsachi ni!” Ngə nda shili na nyi kwaba nda,

²⁰kəl ngə cha jau nda, “Səlirma wa ana tləmər wa nə tə kwaba na?”

²¹Ngə nda nar nyi, “Nə Kaisar nga.” Ngə Yesu tə nar nda, “Nənyi ma nə Kaisar sənda nə Kaisar, hya nənyi nə Hyel tsəu sənda nə Hyel.”

²²Nda nda ngatə ənga, kəl nda mər məngəl, ngə nda ngya nyi ga tərata nda.

²³Tsəu pəshinda tanyi alenya njir Saduki, nda kwa na, a hya'atər nji kuɗəkuɗə da wa, tə shili da cha ga jawa.

²⁴“Maləm, Musa tə nar ea ənda ma nda tah a zər nyi da wa, tuku zamənya ɓwagu tsər na mala nyi nda ga cha yatsə nyi ngulisha'a nə zamə nyi nda.

²⁵Alenya zama da məɗəfa ku pama ea ɗakaɗa. Ngə zə'ualə nda həbiya mala ga tah a zər da wa, ngə zamə nyi tə ɓwagu tsər na mala nyi nda.

²⁶Tang wi ngə tanyi tsəu tə ɗa na mətləkunyi nda, ya əngə makərkunyi, tsa'a tə məɗəfəkunyi nda.

²⁷Udiya jwamənyi ngə mala nda tah.

²⁸Əja ya, atə pəchir hya'atər nji kuɗəkuɗə mala wa cho ɗa lya nda, aka dəhə nda hə nyi tə nda?”

²⁹Yesu tə wum ga na, “A satə hi! Aka a da hya ngabiya sənda tsəfətsəfə nyi ku likatəkatə ndara gyalkur Hyel wa.

³⁰Bəjir hya'atər nji kuɗəkuɗə njo ɗa wi Chama Hyel inda kya huɗamələm, mahi'i ka shili tsəu da kwa hədzə wa.

³¹Ətsəu ya, a təkəra hya'atər nji kuɗəkuɗə a hya kəratsəntə sənda Hyel tə dəkar hi ma?

³²‘Naya ngə Hyel nə Ibrahim, Hyel nə Ishaku, ana Hyel nə Jakop.’ A da cha Hyel nə nji kuɗəkuɗə wa kəl nda Hyel nə nji'inda na pi.”

³³Nda dlama nji'inda tə ngatə ənga, kəl nda mər məngəl na dlədləɓə nyi.

³⁴Manda njir Farisi tə ngatə ənda Yesu chiya tə njir Saduki na ɓwanya, ngə nda tsəmtədzə ga yada Yesu,

³⁵zhang ku pama nda, maləm gadlagadla cha, cha gwa'a ngəya nyi ləbam na jawa.

³⁶“Maləm, gadlagadla manə nga ndiya ku tsaubar kəmən dəha?”

³⁷Ngə Yesu tə ɓəlakə nyi, “ ‘Nyida Hyel Tlakə ngha ana dəhə ɗufwa ka ana dəhə pya ka, ana dəhə jigadəma ngha.’

³⁸Na cha ngə tangərmar gadlagadla ana nda tə ndiya dəhəu.

³⁹Mətləkunyi nda pabiya da nga, ‘Ka nyida təwul ngha wi da ko nyida kərngha.’

⁴⁰Dəhəkura gadlagadla Musa ana sənda njir mətakər tə dlədləɓa, ta'itə təkəra gadlagadla mətlə ina.”

⁴¹Tsəutanyi njir Farisi tangnda tə mbwar zhang, ngə Yesu tə jau nda,

⁴²“Mi jigadəma kəhi təkəra Kəristya? Zər wa cha?” Ngə nda na, “Zər Dauda cha.”

⁴³Ngə Yesu tə na, “Ya ma ngə Dauda təwa gyalkur Shanguɗə Karti, tə nga nyi Tlakə ɗa? Aka Dauda tə na,

⁴⁴‘Tlakə tə nar nyi nə Tlakə ɗa, Ngyata nghə tə chisəma ya, kəl sakanda ya fiya njir dawa nghə tə kiɗa hya ka.’

⁴⁵“Macha Dauda tə nga nyi ‘Tlakə ɗa’ aman cha ɗana ɗa ka zər nya?”

⁴⁶A ndə da nau ɓəlakə nyi wa, ya fwatə tə bəji nda, a ndə da zhaka nau jau nyi səkə wa.