Read nya huba Matta 27 Bible Online

Matta 27 - nya huba bible

Matta 27

¹Tsəɗakə mbudla, wawa'ar fərist ka njirawawa'a tə tsəmdzə dəhəu, ka mbanya təkəra Yesu ka nda tsəya nyi.

²Nda mbiya nyi, ga təra nacha, ga yi nənyi nyi nə Bilatus ngwamna Roma.

³Nda Yahuda, ndər tləɗa nyi nda la'a ənda nja tlanda nyi nəumar tə nə Yesu, ngə cha na ku ɗufwa cha macha naya zəndi ya, ngə cha fa'atə kwaba azurfa makərkumənyi nda ga ɓəlandə nyi nə wawa'ar fərist ka njirawawa'a.

⁴Ndə cha, “A mər təya səpəla'a nda ya tləɗanda ndə kəla bikə ka nja tsəya nyi.” Ngə nda ɓəlakə nyi, “Mi nəkəea kwa? Dzarkə səngha!”

⁵Kəl ngə Yahuda Iskərayoti tə uchiu kwaba nda gu Mbwa'alə Hyel, ga biya tərata nyi, ngə cha ki tsətə sə'i tə wulya cha ga hakəya kərnyi tə wua ngə cha tah.

⁶Ngə wawa'ar fərist inda tə ɗəmtə kwaba inda ga na, “Kwaba nda nja kinda ka nja tsəya ndə na, tsaubar kəmən katə mən pəu gu məɗəwa Mbwa'alə Hyel.”

⁷Ngə nda mbatə nya ga ɗəlbiya babal na kwaba nda, nda njo nga, “Babal nə njir hər təm,” ngə nda fiya ka mbwar haɗə nji shilishili.

⁸Na cha gwa'atə njo nga babal nda, ba'a nya “Babal mashi.”

⁹Təwa ənga, sənda Irmiya ndər mətakər tə ɗaka na tə nyabiya dzəa, “Nda fa'atə kwaba azurfa makərkumənyi, sənda njir Isra'ila tə dləukər ka nda kwa kinda təkəra cha nga.[15]

¹⁰Nda ɗəlbiya babal ndər hər təm ni, wi nda tlakə tə nar ɗa.”

¹¹Yesu tə ta'i mar Bilatus, ngə Bilatus tə jau nyi, “Nakə ngə təl njir Yahuda ya?” Ngə Yesu tə ɓəlakə nyi, “Wi ngə na ka.”

¹²Kəl ja, nda wawa'ar fərist ka njirawawa'a Yahuda tə gwa'a bikə nyi, nacha shau nda wa.

¹³Kəl ngə Bilatus tə nar nyi, “A ko ngatə dəhə sə'inə nda kwa dəkə təkəra nə ma?”

¹⁴Kəl ja, Yesu da ɓəlakə nyi wa, nacha gwa'atə Bilatus tə mər məngəl gagaɗa.

¹⁵Atə kala bəjir Ladər Dləgəlnda, ngwamna tsəltə na wuniya ndə zhang ku jarum, kala ndə nda nja i tabiya.

¹⁶Aku bəji nda vanya gagaraliga da, ku jarum, tləm nyi Barabas.

¹⁷Manda dlama nji tə tsəmtədza, ngə Bilatus tə jau nda. “Wa hyo i ya wuniya hya? Barabas zəma, aa Yesu nda njo nga Kəristi?”

¹⁸Aka Bilatus zəndətə ənda shishi nda nya ta nda nga gwa'atə nda shili na Yesu ma nyi.

¹⁹Tsəutanyi Bilatus tə ngya ku dzəga nəuma, kəl ngə mala nyi tə sətə nyi mafakəu, “Biya ta ngha ku ɓwanya ndə kəla bikə nga, aka aku vu'i nə nya na, sa təya ɓwaɓwatə gagaɗə ku shi'uni təkəra cha.”

²⁰Kəl ja, wawa'ar fərist ka njirawawa'a Yahuda tə tsukutə dlama nji, ənda nda na Bilatus wuniya nda Barabas nja tsəya Yesu.

²¹Ngə Bilatus tə ɓəla jau nda, “Wa hyo i ya wuniya hi lya nji mətlə ina?” Ndə nda, “Barabas.”

²²Ngə Bilatus tə jau nda, “Mi yo mər na Yesu nə njo nga Kəristi na?” Dəhə nda tə wum ga na, “Kukwanda nyi nji!”

²³Kəl ngə Bilatus tə jawa, “Mya gwa'ata? Mi bikə nda mər cha?” Kəl ngə dəhə nda tə tsakətə pə kurakəu, “Kukwanda nyi nji!”

²⁴Nda Bilatus tə la'a sə da cho nau mər wa, ya kəl mwali nji kwa gwa'a tla, ngə cha gətsə ɓiti ga chinda cha cha mar dlama nji, ga na, “Janə cha, a da ya ku tər ndə nə wa! Tlər kəhi ngə səkə hi!”

²⁵Ngə dəhə dlama nji'inda tə ɓəlakə nyi, “Bikər tə nyi cha ngya təkəra ea ka ngulisha'a kəea!”

²⁶Kəl ngə Bilatus tə wuniya nda Barabas, ngə cha na nja dəgənda Yesu na shiwa, ga nənyi Yesu nə ləvaləva ka nda ki kukwanda nyi.

²⁷Ləvaləva ngwamna inda tə hətə Yesu ga təra na cha gwatə patla ngwamna, kəl ngə dəhə ləvaləva inda tə tsəmtədzə ga ɓandə Yesu.

²⁸Ngə nda səɗənda dzaki dzə nyi, ga handzə nyi daura dəzəu chul nə təlkur.

²⁹Nda ləmətə pahuɗə kər shikəɗi ga mbu nyi ku kəra cha, ngə nda taɓəu nyi zəwa ku chisəma cha, ngə nda uzhi ma nyi nda kwa mər sər həyatəvi nənyi, “Əngwa ea tsəya nghə kapala aləvari, Hyella təɗar pya ka, təl njir Yahuda!”

³⁰Nda təfəndzə nyi tuli, nda dləuya zəwa nda ga dəgənyi nə ku kəra cha.

³¹Nda nda wurandə mər sər gwa'a gyaɗi nacha, ngə nda səɗənda ləkutə dəzə nda ga ɓəla handzə nyi dzaki nyi. Ngə nda təra na cha ka nda ki kukwanda nyi.

³²Nda ləvaləva inda kwa biya na Yesu nya cha mələm, ngə nda ɓə na vanya ndə hya'ati vu Sayirin, tləm nyi Shiman, ngə nda chiu nyi na tuku cha hə taməngəla Yesu nda.

³³Ngə nda yatə mbwa nda njo nga Golgota, nacha ngə, “Mbwar Pəpənghər kər.”

³⁴Ngə ləvaləva inda tə lətə nyi ɓitir anap gwaɗəgwaɗə nyi na sə ɗəwatə nə Yesu ka cha sa, kəl ja, ahir nda cha ɗari, ngə cha ngyar sa.

³⁵Nda nda kukwanda nyi, ngə nda ɓəl ɓəlshiu təkəra ləkutə nyi ga təkəya ku pama kərnənda.

³⁶Ahir nga, ngə nda ngya nda kwa ɓəla nyi.

³⁷A gi kəra cha, nda tsəfətə bikə nda nja mbandzə nyi bəra. “NƏNNA NACHA NGƏ YESU TƏL NJIR YAHUDA.”

³⁸Njir fa'a laku tsa'a mətlə da, nja kukwanda ka cha, zhang tə chisəma cha zhang tə matsala cha.

³⁹Nji nda kwa təra ba nda, tə mərtə nyi ɓwanya həyatəvi nda kwa saka'a kər,

⁴⁰nda kwa na, “Nakə nda kwa huɓənda Mbwa'alə Hyel kwa hərtə ku hanyi makər nda na? Dləuya kərnghə ja, ma cha Zər Hyel ka! Sər ka səya kyatə taməngəla nga!”

⁴¹Tang wi ngə tanyi tsəu, wawa'ar fərist ka maləm gadlagadla inda tə fiya nyi ka sər gwa'a gyaɗi,

⁴²nda kwa na, “Cha dləuya alenya nji, ya a da cha kwa nau dləuya kərnyi wa! A da na cha təl njir Isra'ila nda nə ma? Ma cha səya kyatə taməngəla ngə sakanə ja, məno nənyi jiri.

⁴³Cha ta'i ka Hyel, cha na Zər Hyel cha. Ngwa məna la'a macha Hyel kwa i, cha dləuya nyi sakana!”

⁴⁴Əngə tanyi tsəu, njir fa'a laku inda nja kukwanda kə'i cha nda, tə gu pə ɓwanya ɗimi tang wi nə nji'inda.

⁴⁵Pəchi tangkər, kutlə tə haɗiya hə'i dəhəu, tsa'a tə saka makərəu.

⁴⁶Atə saka makər nə akəu, ngə Yesu tə har kuraka cha ga na, “Eli, Eli, Lama Sabaktani?” Na cha ngə, “Hyel ɗa, Hyel ɗa, mya gwatə ka ngya ɗa?”

⁴⁷Nda alenya nji'inda tə ta'i nda tə ngatə ənga, ngə nda na, “Yau, wula cho nga Iliya ja!”

⁴⁸Kəl ngə zhang ku pama nji'inda tə kusa hya'ati na hwi ga yi hətə sawa, ga chiu ku ɓitir anap mwamwaləu, ga hakə tə zəwa, ga lətə nyi gi ka cha sa.

⁴⁹Alenya nji'inda tsəu tə na, “Ngya nyi ma, ta'i məna la'a, nda Iliya kwa shili dləuya nyi!”

⁵⁰Kəl Yesu tə ɓəla har kuraka cha dzəgam dzəgaməu, ga biya pi.

⁵¹Kəl ngə miɗi Mbwa'alə Hyel tə tau dzə tsa'a mətləu, hwatə ki ta'i ki. Ngə hə'i tə dzədzi, fafa i tə huhuɓa.

⁵²Hu nji chichi nə Hyel inda ɗaka kuɗə ɗəɗəm tsəu, ɗang tə mbəɗa, nji nji nyi tə hya'atə na pi.

⁵³Nda zəbiya ku hu inda, ahir hya'atər Yesu ku hwa, nda gu mələm karti nə Urshalima, ga char kərnənda nə nji ɗanghəu.

⁵⁴Manda dəgal ləvaləva Roma ana alenya ləvaləva inda kə'i cha tangnda kwa ɓəla Yesu, tə la'a ənda hə'i tə dzədzi ana dəhə alenya sə'inda ɗa, kəl ngə ləvər tə səya nda gagaɗa, ngə nda na, “Jiri, Zər Hyel na!”

⁵⁵Mahi'i ɗang tangnda tsəu inda kwa ɗaka vala Yesu hya'atə vu Galili tə ta'ita nda naɗəu nda kwa ndzam sənda kwa ɗa.

⁵⁶Aku pama nda, Maryamu Magdaliya, Maryamu Amanya Yakubu ana Yusufu, ana amanya nguli Zabadi.

⁵⁷Nda akə tə ɗa, ngə vanya ndər gəna, ndər Arimatiya tə shili, tləm nyi Yusufu, na cha ma'a shawa Yesu cha.

⁵⁸Ngə cha gwa da Bilatus ga gədi dza Yesu ka cha ki haɗiya. Kəl ngə Bilatus tə na nja nənyi.

⁵⁹Ngə Yusufu tə hətə dza Yesu, ga baɗəu ku sər haɗə chicha nə lilin,

⁶⁰ga ki haɗiya nyi ku hu nda cha təka gəgabiya ku mə ka kərnyi. Ngə cha dangəltə mbəgul mə dəgal ga haɗiya nya cha ni, ga tərata nyi.

⁶¹Maryamu Magdaliya, ana vanya Maryamu atə ngya nda tangnda biya mar hu nda nda kwa ndzama.

⁶²Vanya zəkə Pəchir Ngyaməngya, wawa'ar fərist ka njir Farisi tə tsəmtədza, ga shili da Bilatus,

⁶³nda na, “Aləvari, ea ɗənghatə sənda ndər shakər ngə tə ɗaka na nda na cha pi, ‘Yo hya'ati ku hu na pi, ahir hanyi makərəu.’

⁶⁴Aka ənga, ka nar nyi nə ləvaləva, nda ɓəla hu nyi nga, tsa'a tə hanyi makərkunyi, tsa shawa nyi da shili həlbiya nyi, nda nar nyi nə nji hya'atə təcha. Aka shakər batəbata kwa ndiya tangərmanyi ɗimi.”

⁶⁵Ngə Bilatus tə nar nda, “Fa'atə ma ləvaləva, hya təra nanda gyatə hu nda, hya ɓəlatə mənakə wi sənda hyo nau.”

⁶⁶Kəl ngə nda gi fəndzə nyi tləm nə hu nda, ga ɓandə nya cha na ləvaləva.