Read nya huba Matta 28 Bible Online

Matta 28 - nya huba bible

Matta 28

¹Ahir Pəchir Ngyaməngya, tsəɗakə mbudla pəshir tangərmar hanyi ku suku, Maryamu Magdaliya ana vanya Maryamu nda tə təra ka nda ki ndzamar hu Yesu nda.

²Gəɗə tanyi kəl hə'i tə dzədzi gagaɗa, aka chama Hyel tə səya kya huɗamələm ga dangəlnda mbəgul mə nda ga ngyata nyi ti.

³Ngyakəngya nyi kwa mbəl wi nghənghəɗir par, ana dzaki nyi pərtə tyal wi pərpa'ua.

⁴Ngə ləvər tə səya ləvaləva inda kwa ɓəla hu nda kwa tsamətlaɗəu, nda pəpə puruɓə hu'i wi nji kuɗəkuɗa.

⁵Kəl ngə chama Hyel nda tə nar nyi nə mahi'i inda, “Ngwa ləvəra səya hi wa, zəndətə ya, Yesu nda nja kukwanda nda ngə hyo gwa'a.

⁶A tsə'u cha nə wa, hya'atə tə cha, wi nda nacha. Anda ma hya la'a mbwa nda nja pinda nyi ti.

⁷Ma'i ma kuskusəu hya ki nar nyi nə ka shawa nyi, ‘A hya'atə təcha ku hwa, a ngə cho zhibiya manə hi dzəva Galili, avu nda hyo la'a nyi!’ Sənda ya shili ka ya par hi nga.”

⁸Kəl ngə nda ngyari hu nda na kusa, ku ləvər ana hirgyaɗi gagaɗa, ngə nda yi ka ga nda dəkar nyi nə shawa nyi inda.

⁹Kəl jan Yesu tə chabiyanyi Kərnyi nə mahi'i inda, ndə cha, “Piyarɗufəu cha ngya nahi.” Ngə nda yi da cha ga gapətə hya cha, ga hətə nyi səli.

¹⁰Ngə Yesu tə nar nda, “Ngwa hya da ləvər wa, Ma'i ma hya ki nar nyi nə ka zamə ɗa nda təra gwa Galili, ku nda, nda kwa gwa la'a ɗa.”

¹¹Nda mahi'i inda tə gwa ku laku nda kwa yada shawa inda, ngə alenya ləvaləva ku huɗa njir ɓəla hu nda tə gu mələm, ga gwa dəkarnyi dəhə sə'inda ɗa nə wawa'ar fərist inda.

¹²Wawa'ar fərist inda ka njirawawa'a tə tsəmtədzə ga ɓatliya sənda nda kwa məra, ngə nda hətə kwaba 'ual ga diya nyi vangula ni, nə ləvaləva inda.

¹³Nda nar nyi nə ləvaləva inda, “Hya nar nyi nə nji ənda shawa nyi ingə tə shili həlbiya dza cha vu'i nda hanya hənda hi.

¹⁴Ma ɓwanya nə tə gwa ku himya Bilatus eo chirnya nyi kəpala ənda a bikə kəhi da kwa wa, tsa'aka a səda kwa ɗa na hi wa.”

¹⁵Kəl ngə ləvaləva inda tə dləutsə kwaba nda, ga mər wi sənda nja nar nda. Ɓwanya nda tə wiɗə ku huɗa njir Yahuda, ba'a nya tsəutanyi njir Yahuda kwa dəka.

¹⁶Kəl shawa kwabəzhang inda tə təra gwa Galili, ga gwa təra gyo mə nda Yesu tə nar nda.

¹⁷Nda nda la'a nyi, ngə nda hətə nyi səli, kəl ja, alenya nji kwa tsamə nyi.

¹⁸Ngə Yesu tə yi ləhə dzən nda, ga na, “Na'a tə nji gyalkur təkəra dəhə sənda kya huɗamələm ana sənda tə dunəya.

¹⁹Aka əngə ja, ma'i ma hya ki bəzə Mafakə ɗa nə dəhə nji, nda na'a jiri, nda sha ka shawa ɗa. Hya mərtə nda baɓtisma ku tləmər Ada, ana Zər, ana Shanguɗə Karti,

²⁰hya dlədləɓətə nda, nda ɓəlati dəhə sənda ya nar hi. Hya zəndə ənda tsa'a ya kə'i hi kala bəji, tsa'a tə bəji nda dunəya kwa wura.”