Read nya huba Matta 3 Bible Online

Matta 3 - nya huba bible

Matta 3

¹Aku bəji nda, ndə nda njo nga Yohana ndər mər baɓtisma tə shili cho bəzə ɓwanya Hyel ku takə Yahudiya.

²Cho na, “Tubi ma, aka təlkur huɗamələm ɗatə ləhəu!”

³Na cha ngə ndə nda Ishaya ndər mətakər tə ɓwanya təkər ga na, “Kurakə dzəgam dzəgaməu kwa nga kwa takəu, bəra, ‘Ɓatliya ma ɗufwa hi ka Tlakəu, hya hya'abiya laku tandarəu!’ ”

⁴Ləkutə nda dza Yohana ana shishi dləgwam nja tsa, ngə cha mbabiyadzə na gyarakən chi, sərsum nyi nacha ngə ha'i ana mwamwa chiɗi.

⁵Nji hya'ati vu Urshalima kwa shili da cha, ana dəhə njir hə'i Yahudiya, ana dəhəkura njir mələm nda na ngya nya dəl Urdun.

⁶Nda kwa jiga bikə kənda, cho mər baɓtisma nə nda ku dəl Urdun.

⁷Manda Yohana tə la'a ənda njir Farisi ka njir Saduki kwa shili da cha ka ga cha mərtə nda baɓtisma, ngə cha nar nda, “Nahi tsapəu i! Wa təɗəhimi nə hi hya hwi tsa huɗətlar Hyel ngo shili nga?

⁸Məra ma sənda kwa chari ja, ənda tubi təhi.

⁹Ngwa hya da ngyata hi ka jalvi ənda Ibrahim ngə adanə hi wa. Tsa'anyata yo nar hi, Hyel kwa nau yanda nyi ngulisha'a nə Ibrahim na hangu ina.

¹⁰Aka səu tənji kəm ku ngilangha wua, dəhə wu nda pa'a tə yah nguli mənakəu, njo gəganda nyi ba'a nənyi hu'u.

¹¹“Naya ana ɓiti yo mər baɓtisma nə hi ka cha char ənda tubi təhi, kəl ja, vanya ndə da kwa shili hiɗa nda ndəɗə ɗa na gyalkur, a da ya nji mada'a ka ya hətə nyi ɓiɓi nyi wa, na cha ngə ndə nda kwa shili mərtə hi baɓtisma ana Shanguɗə Karti, ana hu'u.

¹²Cho shili na shala pi nyi ku cha cha, nda cho pibiya dəhə sənda tə lar nyi ni. Cho tsəkəu ɓitir alkama sho val, kəl ja, cho nginda chachang na hu'u nda pa'a kwa ta.”

¹³Aku bəji nda, Yesu tə hya'ati vu Galili ga gwa nya dəl Urdun ka Yohana mərtə nyi baɓtisma.

¹⁴Kəl ja, Yohana kwa gwa'a ngyari, ga na, “Naya nda kwa chim ka mərtə ɗa baɓtisma ya, nə ko shili da ya?”

¹⁵Kəl ngə Yesu tə wuma ga nar nyi, “Əngə tanyi cho ɗa nəchana. Aka təwa ənga mo nyabiya dəhə sənda Hyel kwa i.” Kəl ngə Yohana tə dləukəri.

¹⁶Nda nja mərtə nyi baɓtisma nə Yesu, ngə cha biya ku ɓiti nda. Ɗəɗəu tanyi huɗamələm tə wuna, ngə cha la'a Shanguɗə Hyel kwa səya təkəra cha tang wi mbətla ga ndzəm təkəra cha.

¹⁷Kəl ngə nja ngatə vanya kurakə səya kya huɗamələm, tə na, “Nənna zər ɗa na nda ya kwa nyida, yo ngatə məsəɗakəkur na cha gagaɗa.”