Read nya huba Matta 5 Bible Online

Matta 5 - nya huba bible

Matta 5

¹Nda Yesu tə la'a dlama nji, ngə cha təra gyatə dəgəl, ga gi ngyata nyi. Ngə ka shawa nyi tə ɓandə nyi,

²kəl cha ghəya dlədləɓə nə nda:

³“Njir papa'akur ngə nji'inda zəndə ɗali kənda ku shanguɗəu, aka təlkur huɗamələm nəkənda nga.

⁴Njir papa'akur ngə nji'inda kwa tiwi na huɗətla, aka nja kwa fətə nda ɗufəu.

⁵Njir papa'akur ngə nji'inda na həyakər, aka dunəya kwa ɗa ka nəkənda.

⁶Njir papa'akur ngə nji'inda kwa chim gagaɗa ka nda mər sənda Hyel kwa i, aka nja kwa nyabiya chim kənda.

⁷Njir papa'akur ngə nji'inda kwa ngatə təhuɗə alenya nji, aka njo ngatə təhuɗə kənda tsəu.

⁸Njir papa'akur ngə nji'inda na chamər ɗufəu, aka nanda ngə kwa la'a Hyel.

⁹Njir papa'akur ngə nji'inda kwa mər tlər aka ngya mənakə ɗa ku pama nji, aka njo nga nda nguli Hyel.

¹⁰Njir papa'akur ngə nji'inda njo izza təkəra mər sənda Hyel kwa i, aka təlkur huɗamələm nəkənda nga.

¹¹Njir papa'akur hi, ma nji kwa ngəl hi, nda kwa izza hi, nda kwa par hi nya ɗimi, nda kwa tla gəzhi nyandəla hi, aka tləm ɗa.

¹²Mər ma hirgyaɗi, aka wazəba kəhi da dəgal ki huɗamələm. Aka əngə tanyi nda izza njir mətakər inda ghəya shili tsahi.”

¹³“Nahi ngə wunə nə dunəya. Kəl ja, ma wunə tə choɓwa, tsəu njo nau ɓatlətə səkə wa. A ɗatə ka sə kəla sakəda, kəl nda nja pənda nja dərɓənda.

¹⁴Nahi ngə vimbəlmbəla nə dunəya. Mələm nda kyatə dəgəl, a da kwa mbunda dzə wa.

¹⁵Ya ndə da kwa hau hu'u ku təkəsəu kwa mbuya na shala wa, kəl nda nja fiya kyatə chaka'i nyi, aka ga cha mbəl nə dəhə nji'inda ku ki nda.

¹⁶Əngə tanyi tsəu ja, hya ngyar vimbəlmbəl kəhi cha mbəla nə nji, ga nda la'a sə mənakə nda hya kwa məra, nda hətə nyi səli nə Adanə hi nda kya huɗamələm.”

¹⁷“Ngwa hya da hari abəra ya shili ka ga ya wazənda gadlagadla nə Musa ana sənda njir mətakər tə dlədləɓətə hi wa. A da ya shili ka ga ya zhazhinda wa, kəl nda ya shili ka ya nyabiya.

¹⁸Jiri yo nar hi, ba'a tə bəji nda huɗamələm ana hə'i kwa zhazhə ti, mada sə nda kushi ndara ɗyatlə ku gadlagadla da kwa zhazhə wa, kəl dəhə sə tə nyabiyadza.

¹⁹Aka əngə ja, dəhə ndə nda tə ɓəlnda mada kushi nda ku huɗa tsaubar, ga dlədləɓətə nyi nə nji wi nda, cho ɗa kushi ku təlkur huɗamələm. Ətsəu dəhə ndə nda tə ɓəlatə tsaubar ga dlədləɓətə nyi nə alenya nji wi nda, cho ɗa dəgal ku təlkur huɗamələm.

²⁰Yo nar hi ja, ma'a tsa'atsa'akur kəhi da ndiya nə ka maləm gadlagadla, ana Farisi ingə wa, a da hyo gwa ku təlkur huɗamələm pa'a wa.”

²¹“A ngatə hi ənda nja nar nyi nə nji'inda parang, ‘Ngwa ka da tsa ndə wa, madawa tə tsəya ndəu, njo shili na cha mar nəuma.’

²²Kəl ja, naya yo nar hi, ma ndə nda tə mər huɗətla na zamə nyi[4] njo yi na cha huɗə nəuma. Madawa tə nar nyi nə zamə nyi ‘Səuna!’ Njo yi na cha mar njirawawa'a. Ana madawa tə nga zamə nyi ‘Ndə kəkəng!’ Cho gwa ku hu'u kəla tah.

²³Aka əngə ja, ma ko gwa'a ka yi na ga'a nghə nə Hyel kyatə dzəgana, ngə ka ɗənghatə sə da mərtə nyi kə nə zamə ngha,

²⁴kəl ka ngyar ga'a nghə nda mar dzəgana, ka kusa hya ki ɓatliya pama hi na zamə nghə nda, ahir nga, ka shili nə nyi ga'a nghə nda nə Hyel.

²⁵“Ka kusa ɓatliya na ndər wula ngha təvi hyo yi huɗə ndər nəuma. Tsa ma hya yi, cho yi nə nghə nyi nə ndər tla nəuma, ndər tla nəuma tsəu cho nə nghə nyi nə ləvaləva, ya cho vakəu nghə ku jarum.

²⁶Jiri yo nar ngha, aku nda ko ngya, kəl sakanda ka kinda sənda təkəra ka mada ama kushkura cha.

²⁷“Ngatə təhi nja na, ‘Ngwa ka da mər kasali wa.’

²⁸Kəl ja, naya yo nar hi, dəhə ndə nda tə ndzam mala ga chim ka cha piya na cha mərtə cha kasali na cha ndani ku ɗufwa cha.

²⁹Macha lir chisəma ka kwa gwa'atə ka kwa mər səpəla'a, chakubiya ka vakənda, A ndiya nghə təvi ka tar mədlə dzakə zhang, tsa njo vakəu dzakə zum gu hu'u nda pa'a kwa tah.

³⁰Ma cha chisəma ka kwa gwa'atə ka kwa mər səpəla'a, gəganda ka sənda! A ndiya nghə tə vi ka tar mədlə dzakə zhang tsa njo vakəu dzakə zum gu hu'u nda pa'a kwa tah.

³¹“A natə nji tsəu, ‘Dəhə ndə nda gədlənda mala nyi, tuku cha ɓəliya nyi sar nə gədla.’

³²Kəl ja, naya yo nar hi, ma ndə tə gədlənda mala nyi, ya a da təkəra kasalikur wa, fəu təcha mala nda ku kasalikur ndani, ya dəhə sal nda həbiya mala nda tsəu, kasalikur nda cha kwa mər na cha.

³³“A ngatə təhi tsəu ənda nja nar nyi nə nji'inda parang, ‘Ngwa ka da hətə salkur wa, kəl nda ka nyabiya sənda ka hə salkur təkər nə Tlakə ngha.’

³⁴Kəl ja, naya yo nar hi, ngwa ka da səmfəla pa'a wa, mada ana huɗamələm, aka dzəga təlkur Hyel nga,

³⁵mada ana hə'i aka təmbəl pə hi nyi nga, mada ana mələm Urshalima, aka mələm Təl dəgal nga.

³⁶Ngwa ka da səmfəla na kərakə wa, aka a da ka kwa nau shandə shishi zhang təkəra ka cha ɗa pərtəu, ndara kyakyar wa.

³⁷Sənda ki hyo kina na, na cha ngə, ‘Ah’ a da wa ‘A'a’ ma tə təranda inga, atsa ndə ɗimi nda biya cha.

³⁸“A ngatə tə hi ənda nja na, ‘Li a təvəra li, hir a təvəra hir.’

³⁹Kəl ja, naya yo nar hi, ngwa hya nda ba'a kisəkur tə ndə nda tə mərtə hi ɗimikur wa. Ma ndə tə zhau nghə mandaɓa təwa chisəm, shandə nyi vanyi tsəu.

⁴⁰Ma nda wula ngha ka cha dləuya daura ngha, ka fəkə nyi ngamdə nghə təkəri ma'a.

⁴¹Ma ndə gyal tə na, tuku hya ma'i na cha babal taku zhang, ma'i ma na cha babal taku mətləu.

⁴²Ma ndə nda gədi sə tsa ka, ka ɗa nyi, ma ndə nda tə gwa'a hə saru tsa kə tsəu, ka həya nyi saru nda.

⁴³“A ngatə təhi ənda nja na, ‘Ka nyida zamə ngha, ka ngyari ndər dawa ngha.’

⁴⁴Kəl ja, naya yo nar hi, nyida ma njir dawa kəhi, hya pətlənya ka nji'inda kwa izza hi.

⁴⁵Əngə ja, hyo char kərnəhi ənda nguli Adanə hi da kya huɗamələm hi. Aka nacha kwa mbəliya pəchi nyi təkəra nji ɗimi ana nji'inda kwa mər mənakəkur məlməlu, cho təɗə par tsəu təkəra njir mər sə tsa'atsa'a ana njir mər pəla'akur.

⁴⁶Ka mi Hyel kwa nə hi zhar ja, macha kəl nji nda kwa nyida hi ngə hyo nyida? Əngə ma'a njir tsəm tsachi kwa məra!

⁴⁷Ya macha ndara kəl zamən hi hya kwa usa ya, mi sə nda mərtə hi pam matsa alenya nja? Mada nji kəla zəndə Hyel ma'a kwa mər ənga!

⁴⁸Aka əngə ja, mənakəkur kəhi cha nyabiyadza, tang wi ngə tə mənakəkur Adanə hi nda kya huɗamələm nyinyinyi.