Read nya huba Matta 6 Bible Online

Matta 6 - nya huba bible

Matta 6

¹“Gəla ma, ngwa hya da mər mənakəkur ka ga hya uya fal tsa nji wa, ma hya mər ənga a da hyo uya wazəba tsa Adanə hi nda kya huɗamələm wa.

²Aka ənga, ma sakanda ko nənyi ga'a nə ndər tari, ngwa ka da bəzə wi ngə tə nji dəmən kwa mər ku vi pətlənya, ana təkəra laku ga nda uya fal tsa nji wa. Jiri yo nar hi, a wurtə nda dləutsə wazəba kənda.

³Kəl ja, ma ko nənyi ga'a nə ndər tari, ngwa ka i vanya ndə la'a wa,

⁴ka mər tə ɗəuwa, ya Adan nghə nda kwa la'a dəhə sə nda tə ɗəwa, kwa nə nghə wazəba.

⁵“Ma sakanda ko pətlənya ti, ngwa ka da mər wi nə nji dəmən ingə wa, aka nda kwa nyida i nda hya'atə tə ta'i ku vi pətlənya ana ku mətəkər laku ka pətlənya ka ga madawa la'a nda. Jiri yo nar hi, a wurtə nda dləutsə wazəba kənda.

⁶Kəl ja, ma ko pətlənya, gwa tanghə ku vi ngha, ka haɗiya nyavi, ka pətlənya nə Ada nghə nda pa'a njo la'a. Ada nghə nda kwa la'a sənda tə ɗəuwa kwa nənghə wazəba.

⁷“Ma hyo pətlənya, gwa hya da ngya ka ɗa nya ɓwa'atanyi wi nji'inda pa'a kwa zəndə Hyel wa, nda kwa hari ənda zhi ɓwanya kwa gwa'atə Hyel kwa ngatə nda.

⁸Ngwa hya da ɗa wi nanda wa, aka Adan hi wurtə zəndə sənda hyo gwa'a təvi hya gədi nyi.

⁹“Aka ənga, janə ənda hyo kina pətlənya. ‘Adan ea nda kya huɗamələm, tləm nghə karti.

¹⁰Təlkur ngha shili, sənda ko i, nja mər tə dunəya, wi nda njo mər kya huɗamələm.

¹¹Ka nə ea sərsum ɓupəchi nə ənya.

¹²Ka farbikə kəea, wi nda ea kwa farbikər nji'inda kwa zandə ea səu.

¹³Ngwa ka da ngya ea ea gwa ku sərmbukə wa, kəl nda ka dləuya ea tsa sərtakəu.’

¹⁴“Aka ma hya farbikər nji'inda zandə hi səu, Adanə hi nda kya huɗamələm tsəu kwa farbikə kəhi.

¹⁵Kəl ja, ma a hya farbikər nji'inda zandə hi səu wa, Adanə hi da kwa farbikə kəhi tsəu wa.

¹⁶“Ma hyo səmdzən, ngwa hya da ndəkutə huɗəma hi wi ngə nji dəmən ingə kwa mər wa. Nda kwa ndəkutə huɗəma nda ga nda char nyi nə nji ənda nda kwa səmdzən. Jiri yo nar hi, a wurtə nda dləutsə wazəba kənda.

¹⁷Kəl ja, ma ko səmdzən, ka chinda maka, ka ɓəsəu mal ku kəra ka,

¹⁸tsa nja nda zəndə nda ko səmdzən, Adanə hi nda pa'a nja kwa la'a, nda kwa la'a sənda hya kwa mər tə ɗəuwa kwa nə hi wazəba.

¹⁹“Ngwa hya da tsəm gəna nə kərnəhi tə dunəya tangnda kətla ndara vuyavuya kwa səwandi, njir həl tsəu kwa gwa həltə wa.

²⁰A təvəra ənga, hya tsəmtə gəna nə kərnəhi kya huɗamələm, tangnda kətla ndara vuyavuya da kwa səwandə wa, ya njir həl da kwa nau gwa həltə wa.

²¹Aka mbwa nda gəna ndə ti tangnda ɗufwa cha tsə'u.

²²“Li nacha ngə təkəsər dza. Ma lya ka tə ɗa yiyinghəu, dəhə dzakə kwa ɗa na vimbəlmbəla.

²³Kəl ja, ma lya ka ɗa ɓwaɓwa'a, dəhəkura dzaka kwa ɗa na kutla. Ya ma vimbəlmbəl nə dzaka tə ɗa na kutla, aman chul ɗimiɗimikura ngəna kutla!

²⁴“A ndə da kwa nau mər mavakur nə tlakə mətlə wa. Kəl nda cha ngyar vanyi cha i vanyi, ndara cha nəu zhang na jiri cha həyatə zhang. Ya a laku da hya kwa nau fətə ɗufwa hi tə sənda nə Hyel ana gəna tsa'a kya'a wa.

²⁵“Aka əngə yo nar hi, ngwa hya da ɗəngha təkəra ngya kəhi, sərsum nda hyo səma, ndara sə nda hyo sa, ndara dza hi ana dzaki nda hyo pəndzə wa. A pi da ndiya sərsum ma? Aa kumər dzə da ndiya dzaki nda hyo pəndzə ma?

²⁶Ndzamar ma eakəu, a nda kwa tləka wa, ya a nda kwa mər wa, ya val da tsa nda wa, ya Adanə hi nda kya huɗamələm kwa nənda sərsuma. A da hya ndiya nda na səli ma?

²⁷Wa ku pama hi, nda aka ɗəngha, kwa nau təɗar pya cha nə mada saka zhang anə kərnya?

²⁸“Ətsəu ya, kami hyo ɗəngha təkəra dzaki nda hyo pəndza? Ndzam ma ənda mambəl jigwal takə kwa həa. A nda kwa mər tlər ndara nda mbəndzənyi dzaki nə kərnənda wa.

²⁹Kəl ja, yo nar hi ənda mada təl Saloman ana dəhə səli nyi, a da ta pəndzə dzaki gumaguma wi nə zhang ku huɗa nda wa.

³⁰Na hi njir kushir jiri, macha Hyel kwa pəndzə nyi dzaki gumaguma nə ma'a jigwal takəu, nda ənya a da nda, əzəkə nginda tənji ya, abiyakata nahi ya?

³¹“Aka əngə ja, ngwa hya da ɗəngha, hyo na, ‘Mi eo səma? Mi eo sa? Mi eo handza?’

³²Aka nji kəla zəndə Hyel ingə kwa gwa'a chul sə'inga, ya Adanə hi nda kya huɗamələm zəndətə ənda kwa i hi sə'inga.

³³Kəl ja, hya ghəya gwa'a təlkur nyi tangərma ana hya ngya ku tsa'atsa'akur, dəhə alenya sə'ingə cho nə hi.

³⁴Aka əngə ja, ngwa hya da ɗəngha təkəra zəkə wa, aka zəkə kwa shili tsa'a na ɓwaɓwatə nyi. Ɓwaɓwatə nda ənya, a njitə ka ənya.