Read nya huba Matta 7 Bible Online

Matta 7 - nya huba bible

Matta 7

¹“Ngwa hya da tla nəuma təkəra madawa wa, tsa nja da tlanda hi nəuma ma'a nahi.

²Aka wi nda hyo mba bikə nə alenya nji, əngə nja kwa mərtə hi tsəu, shala nda hya dəkə kwa nə alenya nji, nacha njo dəkəu hi ni.

³Mya gwa'atə ko ndzam zər ngəɗəkə nda tə lya kuvangha, ya a da ko ɗəngha na zəmər gang nda tə lyakə wa?

⁴A da ko nau nar nyi nə kuvangha, ‘Zama, ta'i ya hənda nghə ngəɗəkə tə lya ka,’ ya ba'a kə na gang ku lya ka wa.

⁵Ndə dəmən, ka ghəya hənda gang nda tə lya ka, tsa'aka ko nau la'a sə mənakəu ko hənda nyi ngəɗəkə tə lya kuvangha.

⁶“Ngwa hya da ɗahurnda sənda cham nə həya wa, nda kwa nda shakə hi na pa. Ngwa hya da pətə nyi sə mbəlmbəl mar dagəla wa, aka nda kwa dərɓə nda na hya nda.”

⁷“Gədi ma njo nə hi, gwa'a ma hyo uya, tsa ma nyavi njo mbəɗiya hi.

⁸Aka dəhə ndə nda gədi njo nənyi, dəhə ndə nda gwa'a cho uya, ya dəhə ndə nda tsa nyavi njo mbəɗiya nyi.

⁹Wa Ada nda ku pama hi nda ma zər nyi tə gədi gwazhilakə cho nənyi hangwa?

¹⁰Ndara cha gədi kalfi cho nənyi pwabwa?

¹¹Macha ma'a nahi ngə nji pəla'a kwa zəndə ənda hyo nənyi sə mənakə nə ngulisha'a kəhi ya, abiyakata Adanə hi nda kya huɗamələm nda kwa nənyi sə mənakə nə nji'inda gədi tsa cha ya!

¹²Mərtə nyi ma nə nji wi sənda hyo i nja mər nə hi. Na cha ngə sənda gadlagadla Musa ana dlədləɓə njir mətakər təkəri.

¹³“Gwa ma ku təlkur Hyel təwa nyavi kiratləu, aka nyavi yo hu'u kəla tah bang ya laku nda kwa yi nda kustanyi, nji ɗang kwa nəuwa.

¹⁴Kəl ja, nyavi pi kiratləu, ya lakur yi nda dza'u, nji tsaɗə tanyi kwa uya.

¹⁵“Gəla ma na njir mətakər gəzhi nda kwa shili da hi ku chi kətəng, ya wi ularvwa nda ku ɗufwa nda.

¹⁶Atə tlər kənda hya kwa zəndəbiya nda. Kwa uya nji yayar Anap ku wur shikəɗi ya? Aa kwa uya nji yayar kanda ku wur gədləla?

¹⁷Kala wu mənakə kwa yah nguli mənakəu, ya wu ɗimi kwa yah nguli ɗimi.

¹⁸A wu mənakə da kwa yah nguli ɗimi wa, ya wu ɗimi da kwa yah nguli mənakə wa.

¹⁹Dəhə wu nda a da kwa yah nguli mənakə wa, njo gəganda ba'a nginda.

²⁰Əngə tanyi ja, hya kwa zəndəbiya njir mətakər gəzhi təwa tlər kənda.

²¹“A da dəhə ndə nda kwa nga ɗa, ‘Tlakəu, Tlakəu,’ ngə kwa gwa ku təlkur huɗamələm wa, kəl nda ndə nda tə mər sə nda Ada ɗa nda kya huɗamələm kwa i.

²²Ma pəchir nəuma tə gəla, nji ɗanghə kwa nar ɗa, ‘Tlakəu, Tlakəu! A ea takər ku tləm nghə ma? A ea gədləbiya məlləm ku kəra nji ku tləm nghə ma? A ea mər səshinshin ɗang ku tləm nghə ma?’

²³Kəl yo nar nda tə babal, ‘A ya ta zəndə hi wa. Təra ma dzə ɗa njir mər səɗimi!’

²⁴“Aka əngə ja, dəhə ndə nda səndzə himi da ɓwanya ɗa na, ga mər tlər ni, tang wi ndər dəma cha, nda hərtə ki nyi tə fafa.

²⁵Manda par tə təɗa, dəl tə səya, gyang tə səa ga dəgə ki nda, ya a da dla wa. Aka nja səya hya cha tə fafa.

²⁶“Kəl ja, dəhə ndə nda ngatə ɓwanya ɗa na, ya a da cha mər tlər nə wa, tang wi ndə kəkəng cha, nda hərtə ki nyi tə məshishi'ua.

²⁷Manda par tə təɗa, dəl tə səya, gyang tə səa ga dəgə ki nda nga dla. Ya dladlanyi ɗimiɗimi!”

²⁸Manda Yesu tə wurandə dəkə sə'inga, kəl ngə dlama nji'inda tə mər məngəl na dlədləɓə nyi.

²⁹Aka cha dlədləɓə nənda na gyalkur, a da wi nə ka maləm gadlagadla kənda wa.