Read nya huba Matta 8 Bible Online

Matta 8 - nya huba bible

Matta 8

¹Nda Yesu tə səya kyatə dəgəl nda, kəl ngə dlama nji tə nəu nyi.

²Kəl janə vanya ndər bibi tə shili uzhi huɗə nyi ga na, “Tlakəu, macha kwa i ka, kwa nau kə mbandə ɗa ya ɗa chaməu.[5]”

³Ngə Yesu tə ha cha cha ga tsəka nyi ni, ga na, “A i tiya, mbə ja.” Təma ndə nda tə mbə na bibi nda.

⁴Ngə Yesu tə nar nyi, “Səya himi, ngwa ka dəkə nə madawa wa, kəl ja, ka ki char nyi kərngha nə fərist, ana ka handa təmachi, tang wi nda gadlagadla Musa tə na, ga char nyi nə dəhə nji ənda mbətə ka.”

⁵Nda Yesu tə dzəva vu Kafarnahum, kəl vanya midala nə njir Roma tə shili ga gədi nyi.

⁶“Tlakəu mava ɗa tə piya dza cha kuɗiyadza, ku ɓwaɓwatə cha gagaɗa.”

⁷Ngə Yesu tə wum ga nar nyi, “A mi'i ya yi mbandə nyi.”

⁸Ngə midala nda ɓəlakə nyi, “Tlakəu a da ya nji ka ko gwa ku ki ɗa wa. Pə tanghə ɓwanya, mava ɗo mba.

⁹Aka naya ma'a atə kiɗa gyalkur vanyi ndə ya, ya tsəu, ləvaləva da tə kiɗa ya i. Ya kwa nar nyi nə nənna, ‘Ma'i,’ ya cho ma'i, ya kwa nar nyi nə ndanda nda, ‘Shili,’ ya cho shili. Ətsəu, ya kwa nar nyi nə mava ɗa, ‘Ɗa əna,’ ya cho məra.”

¹⁰Manda Yesu tə ngatə ənga cha mər məngəl, kəl cha nar nyi nə dlama nji'inda kwa nəu nyi nda, “Jiri yo nar hi, a da ya ta uya ndər jirikur wi ndə na mada vu Isra'ila wa.

¹¹Yo nar hi, ɗang nji kwa shili təwa zədər pəchi ana təɗər pəchi, kwa shili ngya ka Ibrahim, Ishaku ana Jakop ku ladər təlkur huɗamələm.

¹²Kəl ja, nji'inda tatlər kwa nda gwa ku təlkur na, njo gədləbiya nda gwa ku kutlə ɗimi, tangnda nja kwa tiwi ana ɗəhir.”

¹³Ngə Yesu tə nar nyi nə midala nda, “Ma'i, cha ɗa nənghə wi ngə ka nənyi jiri nga.” Aku bəji nda tanyi mava midala nda tə mbəa.

¹⁴Nda Yesu tə gwa ku ki Bitrus, ngə cha la'a amanya mala Bitrus tə piya na gyang.

¹⁵Ngə cha gəziya cha cha təma gyang nda wuniya nyi. Ngə mala nda hya'atə ga mərtə nyi sərsuma.

¹⁶Manda akə tə ɗa, nja shili na nyi njir məlləm ɗang nə Yesu, Ngə Yesu tə gədləbiya mələm inda ku kəra nda na ɓwanya tanyi, ga mbandə dəhə nji'inda na shiləka.

¹⁷Cha mər ənga ka ga cha nyabiya sənda Ishaya ndər mətakər tə na, “Nacha təkərnyi tə hənda tar yiyingkur kəmən, ga hənda shiləkə kəmən.”

¹⁸Manda Yesu tə la'a dlama nji tə ɓandə nyi, ngə cha nar nyi nə shawa nyi nda təra biya tiya fa'a nda.

¹⁹Kəl ngə vanyi maləm gadlagadla tə shili nar nyi nə Yesu, “Maləm ya kwa nəu ngha mada abari.”

²⁰Ngə Yesu tə wum ga nar nyi, “Hyawi, ka'u kənda da, eakə tsəu ki kənda da, kəl ja, a mbwar fiya kər da tsa Zər Ndəu wa.”

²¹Vanya ndə ku pama shawa nyi tə na, “Tlakəu, ngya ɗa ya ki haɗənda ada ɗa gwadagəu.”

²²Kəl ngə Yesu tə nar nyi, “Nəu ɗa, ngyar nji kuɗəkuɗa nda haɗə nji kuɗəkuɗə kənda.”

²³Yesu tə gwa ku param nda ngə Shawa nyi tə nəu nyi.

²⁴Ɗəɗəu tanyi, kəl Gyang par tə hya'atə gagaɗa kwa fi, ngə ɓiti tə ghəya kətsaɗə gu param nda kwa gwa'a nyandi, kəl ja, Yesu tə piya ku hanyi.

²⁵Kəl ngə shawa nyi tə yi hya'andə nyi, ga na, “Tlakəu dləuya mən! Janə məno gwa'a kuɗa!”

²⁶Ngə Yesu tə wum ga nar nda, “Na hi njir kushir jiri, mya gwa'atə ləvəra səya hya?” Kəl ngə cha hya'atə ga tsə gyang nda ana fa'a nda, kəl mbwa nda bəgə ɗiu.

²⁷Nji'inda tə mər məngəl nda kwa na, “Chul ndə manə nə əna? Ma'a gyang ana fa'a kwa ngatə nya cha!”

²⁸Manda Yesu tə shili tə hə'i Gadara biyatə ya fa'a nda, ngə cha ɓə na njir məlləm tsa'a mətləu tə zəbiya ku tləl haɗə nji, nja kwa ləvər nda gagaɗa a tsə'u nji da kwa nau nəu laku nda wa.

²⁹Təma ngə nda hya'andə kurakəu, “Mi sənda həu nghə na ea Zər Hyel? Ka shili tangnə ka ga ka nə ea ɓwaɓwatə tsəu bəji kəea kəla ɗa ya?”

³⁰Ləhə tangnda biri dagəla da nja kwa ɓəla.

³¹Ngə məlləm inda tə gədi Yesu, “Ma cha ko gədləbiya ea ku kəra nji na, gədləu ea yo biri dagəla inga.”

³²Yesu tə nar nda, “Yau ma'i ma ja.” Kəl ngə nda biya ga təra yo dagəla inda. Dəhəkura biri dagəla inda tə məna hwi səya kyatə dəgəl nda, ga pəpə go fa'a, ngə nda sa.

³³Njir ɓəla dagəla inda tə təra na hwi gu ta mələm, nda gwa dəkar dəhə sənda ɗa na njir məlləm inda.

³⁴Kəl dəhə njir mələm tə biya ga nda ɓə na Yesu. Manda nda la'a nyi, nda gədi nyi cha ngyar hə'i kənda.