Read nya huba Matta 9 Bible Online

Matta 9 - nya huba bible

Matta 9

¹Kəl Yesu tə gwa ku param ga ɓəl biyatə ya fa'a nda yo mələm nyi.

²Alenya nji tə shili na nyi ndə nda dza cha kuɗiyadza, tə sərpiya nyi. Manda Yesu tə la'a jirikur kənda, ngə cha nar nyi nə ndə nda, “Pinda ɗufwa ka, zər ɗa, fartə nji bikə ngha.”

³Kəl ngə alenya maləm gadlagadla tə na ku ɗufwa nda, “Ndə nə kwa həyatə Hyel!”

⁴Nda Yesu zəndə sənda nda kwa jigadəma, ngə cha na, “Mya gwa'atə hyo jigadəma chul səɗimi wi ngə ku ɗufwa hya?

⁵Manə ngə kusa lya, nja na, ‘A fartə nji bikə nghə zəma,’ aa nja na, ‘Hya'atə ka ma'i?’

⁶Kəl ja, ga hya zəndə ənda gyalkur farbikər səpəla'a da tsa zər ndə tə dunəya na.” Ngə cha nar nyi nə ndə nda dza cha kuɗiyadzə nda, “Hya'ati, hətə sərpiya ngha ka təra kyo ki.”

⁷Ngə ndə nda hya'atə ga təra kyo ki.

⁸Nda dlama nji tə la'a ənga, ngə ləvər tə səya nda, nda fal Hyel, nda nənyi gyalkur nə nji ənga.

⁹Yesu tə ngyar mbwa nda, aku sakanda cho ma'i ti, ngə cha la'a ndər tsəm tsachi, tləm nyi Matta, atə mbwar tsəm tsachi. Ngə Cha nar nyi “Nəu ɗa.” Ngə Matta tə hya'atə ga nəu nyi.

¹⁰Vanya bəji Yesu ka shawa nyi kwa səm sərsum ku ki Matta, njir tsəm tsachi ka njir mər səpəla'a ɗang tə shili, nda kwa səm sərsum kə'i nda.

¹¹Nda njir Farisi tə la'a ənga, nda jau ka shawa nyi, “Mya gwa'atə maləm kəhi kwa səm sə ka njir tsəm tsachi ka njir mər səpəla'a?”

¹²Manda Yesu tə ngatə ənga, ngə cha na, “Nji yiying do gwa'a ndər kuzəkə wa, Kəl njir shiləka.

¹³Ma'i ma hya ki gwa'abiya sənda Likatəkatə kwa cha, ‘Təhuɗə ngə ya ndiya i, a da hatəmachi wa.’ A da ya shili ka ga ya nga njir mər sə tsa'atsa'a wa, kəl nda njir mər səpəla'a.”

¹⁴Kəl ngə ka shawa Yohana ndər mər baɓtisma tə shili ga jau nyi, “Ma ngə na ea nəkəea ka njir Farisi kwa səmdzən wa'atanyi ya ka shawa nghə da kwa səmdzən wa?”

¹⁵Ngə Yesu tə wuma, “Ama ka bazhinya sal gambəl kwa mər huɗətla ya tsəu tanda ka sal gambəla? Bəji kwa shili nda njo hənda sal gambəl tsa nda, sakanda ngə nda kwa dzəgwa səmdzən.

¹⁶“A ndə nda kwa səbiya ləkutə halhal ana taɗənyi wa, aka macha mər ənga taɗənyi nda kwa tanda halhalənyi nda, ya cho tsakətə kutla 'ualəu matsa nda haaɗa.

¹⁷Ya a ndə nda kwa pəu taɗər ɓitir anap ku salakam halhal wa. Macha mər ənga salakam nda kwa pətla, ɓitir anap tsəu kwa pəa, ya salakam nda tsəu kwa pətla. Taɗər ɓitir anap kəl ku taɗər salakam, təwa ənga mbəɗandə tənji kya'a.”

¹⁸Sakanda Yesu kwa ɓwanya nə Shawa Yohana ndər mər baɓtisma, kəl ngə vanya ndəradəgal nə Isra'ila tə shili da cha, ga uzhi huɗə nyi ga na, “Saka nənna pya kwa ɗa tə biya, anda ka fəkənyi chi ga pya cha ɓəla shili.”

¹⁹Kəl Yesu ka Shawa nyi tə hya'atə ga nəu nyi.

²⁰Vanya mala da fa kwabəu mətlə ana ɓwaɓwatəu, mashi kwa nəu nyi, tə shili hir Yesu ga tsəkar nyachira ləkutə nyi.

²¹Cha na ku ɗufwa cha, “Ma ya kur tsəkar mada'a nya cha ləkutə nyi, yo mbəa.”

²²Nda Yesu tə sha ga la'a nyi, ndə cha, “Kwa ɗa fiya ɗufəu! Jirikur nghə mbandə nghə ti.” Təma mala nda mbəa.

²³Kəl ngə Yesu tə təra yo ki ndəradəgal nda. Nda cha la'a nji kwa ləlla nda kwa jiga dəla tangnda,

²⁴ngə cha na, “Təra ma biya! A kwan da tə wa, hanyi ngə cho nja!” Kəl ngə dəhə nda tə gyaɗənda nyi.

²⁵Ahir nda nja gədləbiya dlama nji'inda biya, cha gwa gəzəya cha kwa nda, ngə kwa nda hya'ati.

²⁶Ngə ɓwanya nda tə wiɗə tə hə'i nda dəhəu.

²⁷Nda Yesu tə ngyar mbwa nda, kəl ngə njir wuləfə mətləu tə nəu hi nyi ana kurakəu nda kwa na “Zər Dauda, ngatə təhuɗə kəea!”

²⁸Nda Yesu tə gwa ku ki, ngə njir wuləfə inda tə shili da cha, ngə cha jau nda, “A nənyi təhi jiri ənda kwa nau ya mbandə hi ya?” Ngə nda na, “A, Tlakəu.”

²⁹Ngə Yesu tə tsəkar lya nda ga na, “Cha ɗa nə hi tsa'atsa'a na jirikur kəhi!”

³⁰Ngə lya nda tə mbəɗa. Ngə Yesu tə tsau nda bar, “Ngwa hya da dəkar nyi səna nə madawa wa!”

³¹Kəl ja, nda təra ga ki bəzəya tə hə'i nda dəhəu.

³²Nda njir wuləfə mətlə inda nja mbandə nda kwa təra, kəl nja shili na nyi vanya ndə təngtəng, ndə nda pa'a kwa nau ndəra, nda na məlləm ku kəra cha.

³³Yesu tə gədləbiya məlləm nda ku kəra cha, kəl ndə nda nau ndəra. Ngə dlama nji'inda mər məngəl ga na, “Adda! A mən taa la'a chul sənə ku Isra'ila wa.”

³⁴Kəl ja, njir Farisi tə na, “Təl məlləm ngə tə nənyi gyalkur gədləbiya məlləm.”

³⁵Ngə Yesu tə biya zhulitə dəhə məlləm inda tangnda. Cho dlədləɓə nə nji ku vi pətlənya kənda i, cho bəzə Mafakə Mənakə təkəra təlkur, ana cho mbandə nji na kala shiləka ana tar yiyingkur.

³⁶Kəl ja, nda cha la'a dlama nji, ngə cha ngatə təhuɗə kənda, aka nda kwa wi na kərnənda, a ndər vala nda da wa, tang wi kətəng kəla ndər ɓəla.

³⁷Ngə cha nar nyi nə shawa nyi inda, “Ja tlər bwaɓəu, ya njir mər tlər tsaɗəu.

³⁸Gədi ma tlakə nda təkəra tləra, aka ga cha sətə njir mər tlər gu fa nyi.”