Read nya huba Markus 10 Bible Online

Markus 10 - nya huba bible

Markus 10

¹Ngə Yesu ka shawa nyi tə ngyar mbwa nda ga təra yatə hə'i Yahudiya, ga təra biya tə ya dəl Urdun. Ngə dlama nji tə ɓəla tsəmtədzə shili da cha, ngə cha dlədləɓə nə nda wi nda cha tsəl ni.

²Ngə alenya njir Farisi tə shili da cha ka ga nda ngəya nyi ləbam təwa jawa, “Tsaubar kəmən dləukərtə ndə gədlənda mala nyi ya?”

³Ngə cha ɓəlakə nda na jawa, “Mi sənda gadlagadla Musa tə na hya məra?”

⁴Ngə nda nar nyi, “Musa nə nyi tə laku nə ndəu cha ɓəliya sar təkə na mala cha nənyi.”

⁵Ngə Yesu tə wum ga nar nda, “Ɓaɓalkura kəra hi nga gwa'atə Musa tsəfətə hi chul ngawa gadlagadla.

⁶Kəl ja, aku tangərmar ɓatlə dunəya, Hyel tə ‘Ɓatlə nda sal ana mala.’

⁷‘Aka ənga, ndə kwa ngyar ada nyi ana ama nyi,[14] nda kwa daɓətə dzə na mala nyi, nji mətlə inda nda kwa ɗa zhang.’

⁸Aka ənga a tsə'u da nda nji mətlə wa, kəl nda dzə zhang nda.

⁹Aka sənda Hyel na kərnyi tə daɓəya, ngwa ndə da təkəbiya wa.”

¹⁰Nda Yesu ka shawa nyi tə ɓəl gu ta ki səkəu, ngə shawa inda jau Yesu təkəra ɓwanya nda.

¹¹Ngə cha nar nda, “Dəhə ndə nda gədlənda mala nyi, ga həbiya vanyi, kasalikur nda cho məra.

¹²Ma mala tə təkə na sal nyi tsəu, cha ki hə vanya ndə paməu, a mərtə cha kasalikur ndani.”

¹³Vanya pəchi, nji kwa shili na ngulisha'a shiɗəɗə nə Yesu ka cha səkənda papa'akur, kəl ngə shawa nyi tə tsə nda.

¹⁴Nda Yesu tə la'a ənga, huɗa cha tla, cha nar nda, “Ngyar ma ngulisha'a shiɗəɗə nda shili da ya, ngwa hya da ka nda wa, aka təlkur Hyel nə nji wi ingə nga.

¹⁵Jiri yo nar hi, ma'a ndə da dləutsi təlkur Hyel wi nə zər kushu wa, a da cha kwa uya gwa kwa pa'a wa.”

¹⁶Ngə cha hətə ngulisha'a inda ku cha cha, cha fəkə nda cha cha, cho səkə nyi papa'akur nə madawa ku pama nda.

¹⁷Nda Yesu ka shawa nyi a hya'atə kanda təra, kəl jan vanya ndə tə shili na hwi, cha uzhi mar Yesu, ga jau nyi, “Maləm dura, mi sənda yo mər ka ga ya uya pi nda ba'anawa?”

¹⁸Ngə Yesu tə jau nyi, “Ka mi ko nga ɗa ndə dura? A ndə dur da wa kəl Hyel zhang tanyi.

¹⁹A zəndəbiya təkə sənda gadlagadla tə na, ‘Ngwa tsa ndə wa. Ngwa mər kasalikur wa. Ngwa həl wa. Ngwa pə ɓwanya gəzhi təkəra ndə wa. Ngwa ɗiya ndə wa. Ka hətə nyi səli nə ada ngha ana ama ngha.’[15] ”

²⁰Ngə ndə nda na, malləm, “A ɓəlatə tiya dəhə sə'ingə tsə'u ya zər.”

²¹Yesu tə ndzamar nyi ana nyida ga nar nyi, “Sə zhang tanyi ngə tar ka. Ma'i ka ki ɗəlnda dəhə sənda tsa ka, ka nənyi nə njir ɗali, ko uya gəna 'ualəu kya huɗamələm. Ga dzəgwa shili nəu ɗa.”

²²Nda ndə nda ngatə ngəna ɓwanya cha ndaltə huɗəma cha, ga təra na huɗətla, aka ndər gəna cha gagaɗa ya a da cho i cha təkə na gəna nyi wa.

²³Ngə Yesu tə ndzamar nda ga nar nyi nə shawa nyi, “Cho ɗa dza'u gagaɗa, ndər gəna gwa ku təlkur Hyel!”

²⁴Ngə ɓwanya nga tsəya dza shawa nyi inda. Ngə Yesu tə tsakətə nar nda, “Nguli ɗa, uya gwa ku təlkur Hyel dza'u gagaɗa![16]

²⁵Kusə dləgwam tərabiya ku chira libəra, tsa ndər gəna kwa gwa ku təlkur Hyel.”

²⁶Nda shawa inda ngatə ənga, nda tsakətə mər məngəl nda kwa na nə kərnənda, “Ya macha əngə ya, wa kwa uya mbəɗa?”

²⁷Ngə Yesu tə ndzamar nda ga na, “Anə ndəu, sənda pa'a kwa nau ɗa nga, kəl ja, anə Hyel dəhə sə kwa nau ɗa.”

²⁸Ngə Bitrus tə nar nyi, “Jan ea ngyar tə dəhə sə ga nəu ngha.”

²⁹Yesu tə wum ga na, “Jiri yo nar hi, ndə nda ngyar ki nyi, ndara ka zamə nyi, ndara ka kwamə nyi, ndara ama nyi, ndara ada nyi, ndara ngulisha'a, ndara fa nyi i, aka ya ana Mafakə Mənakəu.

³⁰Sənda cho uya aku bəji na, kwa ndəya zhaka gharəu, nə ki i'i, ana ka zamə nyi, ka kwamə nyi, ana ama nyi, ana ngulisha'a ba'a fa i'i, tsa'a na izza. Ana bəjing zəkəu tsəu, cho uya pi nda ba'anawa.

³¹Kəl ja, ɗang tanyi, nji'inda tangərma, kwa ɗa ka nji batəbata, nji batəbatə tsəu kwa ɗa tangərma.”

³²Ngə nda gəzəya lakur gwa Urshalima, Yesu tə biyama daɓə shawa nyi kwa nəu hi nyi nda kwa mər məngəl ənda cho yi Urshalima. Ləvəra nyandə nji'inda kwa nəu nda a hi. Ngə Yesu tə nga nda shawa daɗədaɗə kwabəmətlə inda ga ɓəla par nda sənda kwa ɗa na cha.

³³“Gwa Urshalima nə mən. Njo tləɗanda Zər Ndə nə wawa'ar fərist ka maləm gadlagadla Musa. Nda kwa tlanda nyi nəumar tah, nda kwa nənyi nyi nə nji'inda pa'a njir Yahuda,

³⁴nanda tsəu ndo mərtə nyi gyaɗi həyatəvi, nda kwa təfəndzə nyi tuli. Nda kwa dəgənyi, ba'a tsəya nyi, ahir hanyi makərəu cho hya'atə na pi.”

³⁵Yakubu na Yohana nguli Zabadi tə shili da Yesu ga na, “Maləm, vanya sənda eo i ka mərtə ea.”

³⁶Cha nar nda, “Mi sənda hyo gwa'a ya mərtə hi ja?”

³⁷Ngə nda nar nyi, “Eo gədi, maka da gwa ku səlir təlkur ngha, ea ngya zhang tə chisəma ka, zhang tə matsala ka.”

³⁸Kəl ngə Yesu tə nar nda, “A da hyo zəndə səngə hyo gədi ngə pa'a wa. Kwa nau hi sa ku ɗeɗika ɓwaɓwatə nda yo sa ana nja mərtə hi baɓtisma ana ɓwaɓwatə nda njo mərtə ɗa baɓtisma nə ya?”

³⁹Ngə nda wuma, “Kwa nau ea.” Ngə Yesu tə nar nda, “Ah, hyo nau sa ku ɗeɗika nda yo sa, ana nja mərtə hi baɓtisma nda njo mərtə ɗa,

⁴⁰kəl nda nyar ngya tə chisəma ya ndara matsala ya, a da na'a ngə wa. Hyel ngə kwa nənyi nə nji'inda cha ɓatliya kari.”

⁴¹Nda alenya shawa kumə inda tə ngatə ngə na səu, kəl huɗa nda tə tla tsa ka Yakubu na Yohana.

⁴²Ngə Yesu tə nga nda dəhə nda ga na, “A zəndətə hi nji təltəl nə nji'inda pa'a njir Yahuda kwa cha təlkur, wawa'a kənda tsəu kwa cha gyalkur nənda.

⁴³A da əngə sənda kwa kina ɗa ku pama hi wa. Ma cha zhang ku pama hi kwa gwa'a ka na cha ɗa dəgaləu, tuku kəl cha ɗa mava kəhi.

⁴⁴Ndə nda kwa gwa'a ɗa gau tsəu, tuku cha ɗa ka mava kəhi dəhəu.

⁴⁵Aka mada Zər Ndə ma'a da shili ka nja mər mavakur nənyi wa, kəl nda ka ga cha mər mavakur ana cha sanda pya cha ka cha dləuya nji ɗanghəu.”

⁴⁶Ngə nda yi Jariko. Nda Yesu ka shawa nyi ba'a dlama nji kwa biya ku mələm Jariko, kəl jan vanya ndər wuləfə tə ngya nya laku cho gədi, tləm nyi Bartimawus, (nacha ngə Zər Timawus.)

⁴⁷Nda cha ngatə ənda Yesu ndər Nazarat ngə kwa tərabiya, ngə cha ghəya hya'a kurakəu cho na, “Yesu Zər Dauda, ngatə təhuɗə ɗa!”

⁴⁸Nji ɗang tə tsə nyi ənda cha bəgə ɗiyu. Kəl ja, cha tsakətə har kurakəu cho na, “Zər Dauda, ngatə təhuɗə ɗa!”

⁴⁹Ngə Yesu tə ta'i ga na, “Ngar ɗa ma ndə nga.” Ngə nda nga ndər wuləfə nda ga nar nyi, “Mər hirgyaɗi! Hya'ati jan cho nga ngha.”

⁵⁰Ngə cha bəzənda sər tul nyi ga hya'atə fwatəu, ga təra yada Yesu.

⁵¹Yesu tə jau nyi, “Mi ko i ya mərtə ngha?” Ndər wuləfə nda wuma, “Maləm, yo i ya la'a səu.”

⁵²Ngə Yesu tə nar nyi, “Ma'i, jirikur nghə mbandə nghə ti.” Təma cha ghəya la'a səu, cha nəu Yesu nda təra.