Read nya huba Markus 11 Bible Online

Markus 11 - nya huba bible

Markus 11

¹Nda Yesu ka shawa nyi tə ɗa ləhə dza Urshalima, nda shili vu Baitafaji ana Baitanya a dza Dəgəl Zaitun, Yesu tə sə mətlə ku huɗa shawa nyi,

²cha nar nda, “Ma'i ma gwa ku zər mələm ngə biya manə hi nga. Gwakura hi, hyo la'a dalnjiɓa tə mba, a ndə da ta gyatə ya cha wa. Hya pələya hya shili ni.

³Ma kala ndə tə jau hi, ‘Ka mi hyo pəl nya?’ Hya nar nyi, ‘Tlakə ngə kwa gwa'a nə bəji kushiu, ya cho ɓəlandə nyi shili.’ ”

⁴Ngə nda təra, nda la'a dalnjiɓa nda tə mba, anya laku, anya nyaki. Nda nda kwa pəla,

⁵ngə alenya nji tə ta'i tangnda tə jau nda, “Mi ngə hyo məra? Mangə hyo pəl kwara nga?”

⁶Ngə nda ɓəlakə nda tang wi nda Yesu tə nar nda, ngə nji'inda ngya nda nda təra na kwara nda.

⁷Manda nda shili na dalnjiɓa nə Yesu, nda sətə ləkutə kənda tə ya cha ngə Yesu tə gi ngya ti.

⁸Nji ɗang tə səya ləkutə kənda ku laku, alenya nji tsəu tə ɓəltsə heli ku fa i ga səya ku laku.

⁹Nji'inda təra biyamar Yesu ana nji'inda a hi nyi, kwa pə kurakə nda kwa na, “Fala a nə Hyel! Ndər papa'akur ngə ndə ngə kwa shili ku tləmər Tlakə nga!

¹⁰Papa'akur ngya tə təkəra təlkur nda kwa shili nda pabiya da nə adan mən Dauda! Fala a nə Hyel nda kya huɗamələm.”

¹¹Nda Yesu tə dzəva Urshalima, ngə cha təra gu ta Mbwa'alə Hyel ga ndzamtə dəhə səu. Manda akə a ɗati ngə cha ɓəl yi Baitanya ka Shawa kwabəmətlə inda.

¹²Vanya zəkəu nda ndo ngyar Baitanya, ngə huɓa tə Yesu.

¹³Cha la'a wur kanda naɗəu ana heli, ngə cha təra yi cha la'a nda cho uya yayar kanda nda. Macha yi kəl heli, aka a bəjir yar kanda da ɗa wa.

¹⁴Ngə Yesu tə nar nyi nə wur Kanda nda, “A ndə da kwa tsakətə səmə nguli nghə pa'a wa!” Ya shawa nyi ngatə tə sənda cha na.

¹⁵Nda Yesu ka shawa nyi tə ɓəla gwa Urshalima, Yesu tə gwa ku babal Mbwa'alə Hyel ga gədləbiya njir shafəli. Ngə cha mbəlmbəl nda tyaɓər njir bəla kwaba ana hwakə njir ɗəlnda mbətla Masar,[17]

¹⁶Ga katə madawa tsa tərabiya tahə Mbwa'alə Hyel, ana sər shafəli.

¹⁷Ngə cha ghəya dlədləɓə nə nji cha na, “Tsəfətsəfə nyi, ‘Njo nga ki ɗa ki pətlənya nə dəhə nji.’[18] “Kəl ja, jan hya shandə tə ka ‘Tləl njir fa'avi.’[19] ”

¹⁸Nda wawa'ar fərist ka maləm gadlagadla Musa tə ngatə sənda Yesu tə məra, nda ghəya gwa'a lakur tsa nyi, aka nda kwa ləvər nyi, ənda njir nəu nyi kwa tsaka ya dəhə dlama nji kwa mər məngəl ana dlədləɓə nyi.

¹⁹Nda akə tə ɗa, Yesu ka shawa nyi tə ngyar ta mələm nda.

²⁰Vanya zəkəu, tsəɗakə mbudla, nda Yesu ka shawa nyi kwa ma'i ngə nda la'a wur kanda nda Yesu tə shu'unda nda uləti hwa'a bətə səya ku ngilangha cha.

²¹Bitrus tə ɗənghatə sənda Yesu tə pəa, ngə cha nar nyi nə Yesu, “Maləm, ndzama! Jan wur kanda nda ka shu'unda nda uləti!”

²²Ngə Yesu tə nar nda, “Ɗa ma na jirikur ku Hyel!

²³Jiri yo nar hi, ko nau nar nyi nə mə na, ‘Hya'atə ka bəzəu kərnghə gwatə fa'a,’ ya cho ɗa ənda, maka nənyi jiri nə Hyel ya a kəpal da ku ɗufwa ka a təkəra sənda ka na wa.

²⁴Aka ənga yo nar hi, dəhə sənda hya gədi ku pətlənya, hya nənyi jiri ənda hyo uya, ya cho ɗa ka nəkə hi.

²⁵Ma hyo pətlənya, tangərma, hya ghəya na farbikər ndə nda huɗa kə tlatlanyi tsari, ga Adan nə hi nda kya huɗamələm farbikə kəhi tsəu.”[20]

²⁷Ngə Yesu ka shawa nyi tə ɓəla gwa Urshalima, Nda Yesu kwa zhuli ku Mbwa'alə Hyel nda, ku sakanda cho dlədləɓa nə nji, ka wawa'ar fərist ana ka maləm gadlagadla ka njirawawa'a tə shili da cha.

²⁸Ngə nda jau nyi, “Ana gyalkur manə nə ko mər sə'ina? Wa nənghə gyalkur nə mər sə'inga?”

²⁹Yesu tə nar nda, “Yo nar hi ana gyalkur manə ngə ya kwa mər sə'ina. Ma hya wum na'a təkəra jau zhang nda yo jau hi.

³⁰Par ɗa ma, gyalkur mər baɓtisma Yohana ya, atsa Hyel uya cha zəma, aa tsa ndəu?”

³¹Nda ɓwanya ku pama kərnənda, “Ma məna na, ‘Hya'atə tsa Hyel,’ cho nar mən, ‘Ya kami hya ngyar nənyi jira?’

³²Ya a da mən kwa nau na hya'atə tsa ndə wa. Aka məno ləvər sənda njo mərtə mən, aka madawa tangnə nənyi tə jiri, ənda Yohana, ndər mətakər cha.”

³³Ngə nda nar nyi nə Yesu, “A da eo zəndə wa.” Yesu tə nar nda, “Naya tsəu, a da yo par hi nda ana gyalkur manə ngə yo mər sə'ingə wa.”