Read nya huba Markus 13 Bible Online

Markus 13 - nya huba bible

Markus 13

¹Yesu ka shawa nyi kwa ngyar Mbwa'alə Hyel, ngə zhang ku huɗa shawa nyi tə nar nyi, “Maləm, ndzamar chul gumaguma kura hər ina! La'a chul hangu mənakə inda ku bangu ina.”

²Yesu tə nar nyi, “Kwa la'a kə hər wawa'a ina? Njo huhuɓənda dəhəu, a da njo ngyar mada hangu zhang təkəra vanyi wa.”

³Ahir nga, Yesu tə gi ngyata nyi kyatə Dəgəl Zaitun, nda kwa ndzam dzə na Mbwa'alə Hyel, ngə Bitrus, Yakubu, Yohana ba'a Andrawus tə jau nyi bəji nda cha zhang tanyi ti,

⁴“Dəkar ea, sakamanə sə'ingə kwa ɗa? Mi sənda kwa char ea ənda kaɗə sə'ingə ɗa?”

⁵Ngə Yesu tə nar nda, “Gəla ma tsa madawa da shandə hi kər.

⁶Nji ɗang kwa nda shili ku tləm ɗa, nda kwa na ‘Naya ngə nacha,’ Əngə nda kwa shandə nyi kər nə nji ɗanghəu.

⁷Ma hya ngatə nja kwa pa ana nja kwa pə ɓwanyar pa, ngwa hya da ləvər wa. Tuku ngə sə'ingə kwa ɗa, kəl ja, batəbatər bəji da taa ɗa gwadagə wa.

⁸Vanya hə'i kwa pa na vanya hə'i, ka təl ka təl tsəu kwa pa kərnənda, huɓa kwa tla, ana hə'i kwa dzədzə tə mbwa pampaməu. Kəl ja, dəhə sə'ingə wi tangərmar ɓwaɓwatər ɓəlakərya tanyi nga.

⁹“Ma sə'ingə dəhə kwa ɗa, hya ngya na ɓəla! Njo yi na hi ku vi nəuma njirawawa'a njo dəgə hi na wuɗa ku vi pətlənya. Hyo ta'i biyamar nji təltəl aka nahi njir nəu ɗa hi. Kəl ja, aku bəji nə ngə hyo ɓwanya təkəra ya.

¹⁰Tuku kəl nja ghəya na bəzə Mafakə Mənakə nə dəhə nji.

¹¹Ma nda səya hi ga shili na hi ka nja jau hi, ngwa hya da ɗəngha təkəra sə nda hyo pə wa. Kəl nda hya pə dəhə sənda nja fəu ku nya hi ku ngawa bəji, aka Shanguɗə Karti ngə kwa ɓwanya, a da nahi wa.

¹²“Aku bəji nda, ndə kwa tləɗanda zamə nyi ka nja tsəya nyi, Ada tsəu kwa mərtə nyi tang wi nga nə zər nyi, ngulisha'a tsəu kwa tlə mwali nə njir yanda, kwa gwa'atə njo tsəya nda.

¹³Dəhə nji kwa ngya hi, aka tləm ɗa. Kəl ja, ndə nda tə səsə'uti tsa'a ya tə udiya, cho uya mbəɗa.

¹⁴“Aku bəji nda hyo la'a səɗimi nda kwa dyaɓəndə Mbwa'alə Hyel nda ta'i tə mbwa nda pa'a cho kina ta'i ti. Yau, nji'inda na ngya ku hə'i Yahudiya tuku nda təra na hwi gyo mə i.

¹⁵Ndə nda kyatə kəra vi ngwa cha da həɗa səya ka fa'a sə'inda ku ki nyi wa.

¹⁶Ndə nda kwa takəu, ngwa cha da ɓəla shi ka hə daura nyi wa.

¹⁷Sər təhuɗə na mahi'i huɗəu ana mahi'i nda na ngulisha'a nya 'ua nda ku bəji nga.

¹⁸Hya pətlənya ngwa sə'ingə da ɗa vuya wa.

¹⁹Aka ku bəji nga njo sa ɓwaɓwatə gagaɗa, nda fwatə tə bəji nda Hyel tə ɓatlə dunəya nji da ta ɓə nə wa, ya a da kwa tsakətə ɗa wa.

²⁰Ma pa'a Tlakə tə həya hanyi ingə wa, mada ndə zhang da kwa mbəɗə wa. Kəl ja, aka nji ɗəmɗəm nda cha ɗəmətsi, cha həya hanyi inga.

²¹Aka əngə ja, madawa tə nar hi, ‘Ndzam ma, janə Kəristi!’ Ndara, ‘Ndzam ma, wula cha hina nda!’ ngwa hya da nənyi jiri wa.

²²Aka Kəristi nə gəzhi ana njir mətakər gəzhi kwa chabiyadza, nda kwa shili mər səshinshin ana sər muniya ka ga nda shandə nyi kər nə nji ɗəmɗəm nə Hyel, macha kwa nau nda.

²³Hya ngya na ɓəla ja, wurtə ya dəkar hi dəhə sə'ingə kaɗəu təvi ndo ɗa.”

²⁴“Ahir bəjir ɓwaɓwatə inga, ‘Pəchi kwa gu kutla, A tsə'u hya da kwa mbəl wa,

²⁵sasəlga tsəu nda kwa pəpə səya kya huɗamələm, ana gyalkur huɗamələm i kwa dzədzi.’

²⁶“A tə bəji ngə ja, madawa kwa la'a Zər Ndə kwa səya ku ləmbəkə ana gyalkur ana səli.

²⁷Ətsəu, cho sətə chama nyi i nda kwa tsəmtə nji ɗəmɗəm nə Hyel ku dəhə məngum fwaɗə nə dunəya, fwatə ghəyar dunəya yi tsa'a tə ɓələr huɗamələm.

²⁸“Ndzam ma wur kanda, hya dlədləɓətə vanya sə tsari. Ma sakanda hya la'a cho dla'a kwa biyandə heli, a zəndətə hi ənda səyar jomən ɗatə ləhəu.

²⁹Əngə tanyi ja, ma sakanda hya la'a sə ingə kwa ɗa, hya zəndə ənda shilir Zər Ndə ɗatə ləhəu.

³⁰Jiri yo nar hi, a njir bəji nə da kwa kuɗə wa, kəl dəhə sə'ingə tə ɗa.

³¹Huɗamələm ana hə'i kwa zhazha, kəl ja, ɓwanya ɗa da kwa zhazhə pa'a wa.

³²“A ndə da zəndə pəchi ndara sakanda sə'ingə kwa ɗa wa, mada chama Hyel i, ndara zər, kəl nda Ada zhang tanyi.

³³Hya gəla hya ngya na ɓəla, aka a da hya kwa zəndə bəji nda sə'ingə kwa ɗa tə wa.

³⁴Shilir Zər Ndəu kwa pabiya da vanya ndə nda ma'i naɗəu. Nda cho təra, cha təkəya nyi tlər nə mavi'i nyi, madawa ana tlər nyi, ga nar nyi nə ndər ɓəla nyaki, cha ngya na ɓəla.

³⁵“Aka əngə ja, hya ngya na ɓəla aka a da hya zəndə pəchi nda tlakər ki kwa shili tə wa, ndara a ba akəu, ndara adala vu'i, ndara tiwir vəgəm, ndara ba mbudla.

³⁶Ngwa hya ba i cha shili ghahəya hi hyo njihanyi wa.

³⁷A nar hi təya sənda ya nar nyi nə madawa, ‘Hya ngya na ɓəla!’ ”