Read nya huba Markus 14 Bible Online

Markus 14 - nya huba bible

Markus 14

¹Həyadzə hanyi mətləu təvi Ladər Dləgəlnda ana Ladər Gwazhilakə kəla Tləlam,[25] tsə'u tanyi wawa'ar fərist ka maləm gadlagadla Musa kwa gwa'a lakur səya Yesu atə ɗəwa ka nda tsəya nyi.

²Kəl ja, nda na, “Ada ku bəjir ladər nə wa, nja da ba'a tliya mwali.”

³Yesu kwa səm sərsuma hi Baitanya ku ki vanya ndəu njo nga Shiman nda bibi tə ɗaka səya. Ngə vanya malakə tə səgwa ana təkə mal nda kwa shi'uni kwitkwitəu, nja ɗəl ana kwaba 'ualəu, nja mər na nardi tsa'amunyi. Cha mbəɗiya təkə nda ga pəu nyi mal nda ku kəra Yesu ga cha hətə nyi səli.

⁴Alenya nji'inda kwa səmə kə'i Yesu inda mər huɗətla ga na nə kərnənda, “Ka mi njo ɗahurnda mal nja ɗəl na kwaba 'ual əna?

⁵Kwa kina nji ɗəlnda təkəra kwaba nda ndə kwa uya ku tlər nyi nə fa zhang, nja nənyi nə njir ɗali.” Nda tsə mala nda gagaɗa.

⁶Yesu tə ɓəlakə nda ga na, “Ngyar ma mala ngə tsəka'a. Ka mi hyo tsənya? Sə mənakə gagaɗə ngə cha mər na'a.

⁷Tangnə nji ɗaliɗali kə'i hi, hyo nau vala nda dəhə bəji nda hyo i ti. Kəl nda naya, a da yo ngya wa'atanyi kə'i hi wa.

⁸Sənda cho nau ngə mər cha, cha pəu ɗa mal ka cha ɓatliya dzaya ka haɗa təvi bəji ɗa.

⁹Jiri yo nar hi, dəhə mbwa nda njo bəzə Mafakə Mənakə tə aku dəhə dunəya, njo ɗənghatə na səngə mala na mər nga njo ɓwanya təkəri.”

¹⁰Ngə Yahuda Iskərayoti zhang ku huɗa shawa kwabəmətlə inda təra yada ka wawa'ar fərist ka nda yi ɓwanya təkəra ənda cho tləɗanda nda Yesu.

¹¹Nda nda ngatə ənga, nda mər hirgyaɗi ga mər alkawal ənda ndo nənyi kwaba. Ngə Yahuda Iskərayoti tə ghəya gwa'a lakur tləɗanda Yesu.

¹²Pəshir tangərmar pəchi nə Ladər gwazhilakə kəla tləlam, pəchir hatəmachi na kətəng ladər Dləgəlnda, shawa Yesu tə jau nyi, “Tangman ko i ea ɓatliya mən sərsum Ladər Dləgəlnda?”

¹³Ngə Yesu tə sə nji mətlə ku huɗa shawa nyi cha nar nda, “Ma hya gu ta mələm Urshalima, hyo ɓə na vanya ndə kwa hə giɗa ɓiti. Hya nəu nyi.

¹⁴Ma ki nda cha gwa kwa, hya nar nyi nə tlakər ki nda, ‘Maləm kwa jau ya, tangman ngə vi mihiɓi nda yo səm sərsum Ladər Dləgəlnda naya ka shawa ɗa kwa?’

¹⁵Cho təra na hi gyo vanya vi bang da kyatə kəra vanyi, madami ɓatləɓatlənyi kwa. A tangnda hyo ɓatliya mən sərsuma.”

¹⁶Ngə shawa mətlə inda təra gu ta mələm ga həya madami tang wi nda Yesu tə na, ngə nda ɓatliya sərsum Ladər Dləgəlnda hinda.

¹⁷A ba akəu, Yesu tə shili ka shawa nyi kwabəmətləu.

¹⁸Nda nda kwa səm sərsuma, Yesu tə na, “Jiri yo nar hi, ndə zhang ku pama hi nda kwa səmə naya tangna, kwa tləɗanda ɗa.”

¹⁹Aku huɗətla gagaɗa, madawa ku pama nda kwa jawa, “A da naya ngə ko na nganə ya?”

²⁰Cha ɓəlakə nda, “Zhang ku pama hi kwabəmətləu ina, nahi inda kwa səma ku shala nənnə na ya.

²¹Tuku Zər Ndə kwa tə wi nda cha tsəfətsəfə nyi ɗəɗəməu. Kəl ja, cho ɗa sər tiwi nə ndər tləɗa nyi. Bəliya a nja nda ya nyi wa!”

²²Nda nda kwa səm sərsuma, Yesu tə hətə gwazhilakəu, cha səkər papa'akur. Cha pəpasəu ga nənyi nə shawa inda cho na, “Dləutsə ma, nənna, dzaya na.”

²³Ngə cha hətə ɗeɗika ɓitir anap, cha usaku Hyel təkəri. Cha nənda, ngə dəhə nda sa ku ɗeɗika nda.

²⁴Cha nar nda, “Nənna, mashi ɗa na, nda kwa nyabiya alkawal nda ku pama Hyel ana nənyi na nji. Nja pənda wi sər hatəmachi aka nji ɗanghəu.

²⁵Jiri yo nar hi, a tsə'u yo sa ɓitir anap səkə wa, kəl pəshinda yo sa taɗənyi aku təlkur Hyel.”

²⁶Ahir nda na miya, ngə nda biya təra gyatə Dəgəl Zaitun.

²⁷Aku laku Yesu tə na nə shawa nyi, “Dəhə hi kwa ngya ɗa. Aka ɓwanya Hyel tə na, ‘Hyel kwa tsəya ndər ɓəla, kətəng tsə'u kwa wiɗa.’

²⁸Kəl ja, ma ya hya'atə ku hwa, yo təra manə hi yi Galili, yo həya hi hinda.”

²⁹Bitrus tə nar nyi, “Mada na dəhə nji ngya ngha, a da ya kwa ngya nghə na'a wa.”

³⁰Yesu tə ɓəlakə nyi, “Jiri yo nar nghə Bitrus, əvu'i na, təvi mətləkunya tiwir vəgəm, ko kəpal zəndə ɗa zhaka makərəu.”

³¹Ngə Bitrus tə na kumə kuma, “A da wa! Mada nacha ɗa ka yo tə naka, a da ya kwa kəpal zəndə nghə pa'a wa!” Ngə alenya shawa inda na əngə tsə'u.

³²Ngə nda təra ya tə vanya mbwa njo nga Getsemani, ngə Yesu tə nar nyi nə alenya shawa nyi, “Ngya ma tangna, naya tsəu yo ki pətlənya.”

³³Cha təra ka Bitrus, Yakubu ba'a Yohana, ɗufwa cha ghəya gwa ku ɓwaɓwatə gagaɗa.

³⁴Cha nar nda, “Ɗufwa ya nyi tə na ɓwaɓwatəu, wi yo tah. Səkətə ɗa ma tangna hya ɓəla ana ya.”

³⁵Cha tsaɗar dzə biyama ga dla hu'i, cha pətlənya ga na, macha kwa ɗa cha nja hənda nyi ɓwaɓwatə nə kwa səkə nyi nga.

³⁶Cha na, “Abba[26], Ada, kwa nau kə mər dəhə səu. Maki, hənda ɗa ɗeɗika ɓwaɓwatə na. Əja, mər sənda ko i, a da sənda yo i wa.”

³⁷Cha shili həya nda nda kwa njihanyi, ngə cha nar nyi nə Bitrus, “Shiman, jan ko njihanyi! A da ko nau ngya lili'u mada nə saka zhang wa ya?

³⁸Ngya ma na ɓəla, hya pətlənya, hya da ba'a gwa ku sərmbukəu. Ɗufəu kwa i, kəl ja, dzə təutə ti.”

³⁹Ngə Yesu tə ɓəla ngya nda ga təra ki pətlənya wi nda cha mər tangərma nda.

⁴⁰Cha shili dzən nda səkəu, ga həya nda nda kwa njihanyi, aka a da nda kwa nau ngya lili'u wa, ya a da nda zəndə sənda nda kwa nar nyi wa.

⁴¹Cha ɓəla ki pətlənya ga shili həya nda səkəu makərkunya bəji, cha nar nda, “Tsə'u ta hi kwa njihanyi hyo ɓəlsar ya? A njitə ənga! Bəji ɗati, jan nja tləɗanda tə Zər Ndəu anə njir mər səpəla'a.

⁴²Hya'atə ma mən təra. Jan ndər tləɗa ɗa kwa shili!”

⁴³Tsə'u tanyi Yesu kwa ɓwanya, kəl Yahuda Iskərayoti, zhang ku huɗa shawa kwabəmətlə inda tə shili ka dlama nji ana katsakər ka zəwa i ku cha nda. Wawa'ar fərist ka maləm gadlagadla Musa ka njirawawa'a ingə tə sə nda.

⁴⁴Yahuda ndər tləɗa wurtə nar nda, “Ndə nda ya usar na gaɓə ngə ndə nda hyo gwa'a. Hya səya nyi, nja təra nacha njo ɓəla nyi.”

⁴⁵Tərkus nda shili, ngə Yahuda təra biyama ga na, “Usi Maləm!” Ngə cha gaɓətə nyi.

⁴⁶Ngə alenya nji'inda səya Yesu.

⁴⁷Ngə zhang ku huɗa nji'inda ka Yesu inda tə tsəbiya katsakər nyi, cha gəga mava gau fərist ga katsənda himya cha.

⁴⁸Ngə Yesu tə jau nda, “Ndər fa'avi ngə ya ɗa kari nə hya shili na katsakər ka zəwa ka hya səya ɗa ya?

⁴⁹Mya katə hi tsa səya ɗa aku Mbwa'alə Hyella? Hi nda taɗa ku pama hi yo dlədləɓə nə nji kala bəji. Kəl ja, dəhə sə'ingə kwa ɗa ka nja nyabiya sənda likatəkatə tə na təkəra ya.”

⁵⁰Ngə dəhə shawa nyi inda ngya nyi ga hwi tanda.

⁵¹Vanya tlakala da kwa nəu Yesu hi kəl ləkutə lilin tanyi dzə nyi, ngə nji'inda gwa'a nda səya nyi,

⁵²kəl ja, ngə cha səɗəbiya kərnyi ku ləkutə nda ga hwi tanyi dura'a.

⁵³Nda təra na Yesu yo ki gau fərist, hi nda dəhə wawa'ar fərist, gau i ka maləm gadlagadla Musa tə daɓa.

⁵⁴Bitrus tsəu kwa nəu hin nda naɗəu, tsa'a ku ki gau fərist nda. Cha ngya kə'i ləvaləva nda kwa tlər hu'u.

⁵⁵Wawa'ar fərist ana dəhə nji'inda ku patla njirawawa'a Yahuda, tə gwa'a sənda nda kwa uya Yesu na bikə təkəri, ka nda tsəya nyi, kəl ja, a da nda uya mada zhang wa.

⁵⁶Ɗang tanyi nji'inda pə ɓwanya gəzhi təkəra cha, kəl ja, anya nda da shili zhang wa.

⁵⁷Alenya nji tə hya'ati ga pə ɓwanya gəzhi nənnə təkəra cha, bəra;

⁵⁸“A ngatə nyi tə ea cha na, ‘Yo huɓənda Mbwa'alə Hyel nə nja həriya na chi na, ba'a həriya vanyi nda pa'a nja hər na chi ku hanyi makərəu.’ ”

⁵⁹Ba'aka sakana, anya nda da shili zhang wa.

⁶⁰Ngə gau fərist tə hya'atə biyamar madawa ga jau Yesu, “A ɓwanya da ko wum nə ma? Mi ko na ana sə'inə njo pə təkəra kə ina?”

⁶¹Kəl ja, da'atanyi. Ngə gau fərist nda ɓəla jau nyi, “Nakə ngə Kəristi Zər Hyel Ndə Papa'a ya?”

⁶²Ngə Yesu tə na, “Naya na, ya hyo la'a zər ndə tə ngya tə chisəma Hyel ndə nda na gyalkur dəhəu, ana ənda cho səya ku ləmbəkəu kya huɗamələm.”

⁶³Ngə gau fərist nda tau ləkutə nyi ka cha char huɗətla nyi, ga na, “Mi ɓwanya nda məno gwa'a səka?

⁶⁴A ngatə tə mən ɓwanya həyatə Hyel nda cha pəa. Mi sə nda hya na?” Ngə dəhə nda na, “Ndər bikə cha, kwa kina cha tah!”

⁶⁵Ngə alenya nji tə ghəya təfəndzə nyi tuli, ga mbiya lya cha, ga dəgənyi. Nda kwa na nənyi, “Pə ɓwanya mətakər, ka par ea ndə nda dəgə ngha.” Ngə njir ɓəla inda dəgə nyi ga təra nacha.

⁶⁶Aku bəji nda, Bitrus ku ta ki gau fərist nda, ngə zhang ku huɗa kwatəra inda kwa mər tlər nə gau fərist nda shili,

⁶⁷nda cha la'a Bitrus kwa tlər hu'u, ngə cha ndzamtə nyi ga na, “Nakə ma'a nahi ka Yesu ndər Nazarat ka.”

⁶⁸Kəl ngə Bitrus tə kəpal ga na, “A da yo zəndə səngə ko ɓwanya təkər ngə wa,” nda cha na ənga, cha təra yo nyaki. Təma vəgəm tə tiwi.

⁶⁹Nda kwatəra nda la'a nyi ta'i hinda ngə cha ghəya na nə nji'inda tə ta'i tangnda, “Kəpal da wa, zhang kənda nə ndə na!”

⁷⁰Kəl ja, Bitrus tə kəpal səkəu. Səkardzə kushəu, nji'inda tə ta'i nda nar nyi nə Bitrus, “Təkəɗəu, zhang kənda ka, aka ndər Galili ka.”

⁷¹Bitrus tə səmnda fəla ga na, “Macha gəzhi ya, ya ɗa ka ndə shu'ushu'ua, a da yo zəndə ndə ngə hyo ɓwanya təkər ngə wa!”

⁷²Təma vəgəm tə tiwi mətləkunyi. Ngə Bitrus tə ɗənghatə na ɓwanya Yesu nda; “Vu'i na, təvi mətləkunya tiwir vəgəm, ko kəpal zəndə ɗa zhaka makərəu.” Ngə cha tiwi gagaɗa.