Read nya huba Markus 15 Bible Online

Markus 15 - nya huba bible

Markus 15

¹Tsəɗakə mbudla, wawa'ar fərist, njirawawa'a ana ka maləm gadlagadla tə tsəmtədzə ga mbatə ɓwanya. Ngə nda mbiya Yesu ga yi nənyi nə Bilatus.

²Ngə Bilatus tə jau Yesu, “Nakə ngə təl njir Yahuda ya?” Yesu tə ɓəlakə nyi, “Janə ka nati.”

³Ngə wawa'ar fərist inda tsakətə wula Yesu a təkəra mər səɗimi ɗanghəu,

⁴ngə Bilatus tə jau nyi, “A da ko ɓəlakə nda ma? Mi ko na təkəra sə'inə nda kwa pə təkəra kə na?”

⁵Bilatus tə mər məngəl aka a Yesu da ɓəlakə nda wa.

⁶Dəhə bəjir ladər nə Dləgəlnda, Bilatus kwa maka dəliya nda ndə zhang ku jarum, madawa nja gədi nyi kari.

⁷Aku bəji nda zhang ku huɗa njir tlə mwali nda ku jarum, nacha ngə Barabas, cha tsəya ndə aku mwali nda nja ɗaka tliya.

⁸Ngə dlama nji tə yada Bilatus ga gədi nyi cha dəliya nda ndə ku jarum wi nda nja tsəl ni.

⁹Ngə Bilatus tə jau nda, “Kwa i hi ya dəliya hi təl njir Yahuda ya?”

¹⁰(Aka Bilatus ngabiya tə ənda wawa'ar fərist kwa mər səlkəkur na Yesu na cha gwa'atə nda wula nyi.)

¹¹Kəl ngə wawa'ar fərist inda tsukutə dlama nji'inda nda gədi Bilatus cha dəliya nda Barabas.

¹²Ngə Bilatus tə jau nda, “Aman yo ɗa na ndə nə hyo nga təl njir Yahuda nə ja?”

¹³Nda ɓəlakə nyi ana kurakəu, “Kukwanda nyi nji!”

¹⁴Ngə Bilatus tə jau nda, “Mya gwa'ata? Bikə mi mər cha?” Kəl kurakə nda kwa udə pəa, “Kukwanda nyi nji!”

¹⁵Bilatus kwa gwa'a cha mər sənda dlama nji kwa i ngə cha dəliya nda Barabas. Ga na nja dəgə Yesu ana wuɗa, ngə cha nənyi nyi nə ləvaləva njir Roma ka nja kukwanda nyi.

¹⁶Ngə ləvaləva inda təɗətə nyi gu ta ki dəgalər njir Roma, ga nga dəhə alenya ləvaləva inda tangnda.

¹⁷Ngə nda pəndzə nyi dzaki pabiya da nə nji təltəl, nda ləmətə shikəɗi ga mbanda nyi kər ni.

¹⁸Nda usa nyi, “Usi ja, təl njir Yahuda!”

¹⁹Nda kwa dəgə nyi ku kəra cha na zəwa kuvəkəu, nda təfəndzə nyi tuli, ga uzhi ma nyi nda kwa həsəli həyatəvi nənyi.

²⁰Ahir nda həɗa na gyaɗi nyi, ga səɗəya dzaki nji təltəl inda dzə nyi ga handzə nyi nənyi. Nda təra nacha ka nda ki kukwanda nyi.

²¹Vanya ndə ana tləm nyi Shiman ndər mələm Sayirin, adanya Alekzanda ana Rufus. Cha hya'ati biya tə ya mələm cho gwa'a tərabiya, ngə ləvaləva inda chiu nyi ka cha hə taməngəla Yesu.[27]

²²Ngə nda shili na Yesu tə vanya mbwa njo nga Golgota, (Nacha ngə “Mbwar Pəpənghər kər.”)

²³Nda nənyi ɓitir anap gwaɗəgwaɗə nyi na mur[28], kəl ja, a da cha sa wa.

²⁴Ngə nda kukwanda nyi ga təkəya dzaki nyi təwa ɓəlshi'u, ga nja la'a ndara wa kwa uya.

²⁵Nda kukwanda nyi bəji saka dlə nə mbudla.

²⁶Nja tsəfəya bikə nda nja kukwanda nyi təkəri gya kəra cha bəra, “Təl njir Yahuda.”

²⁷Nja kukwanda nyi ka alenya njir fa'avi mətləu, zhang təwa chisəma cha zhang təwa matsala cha.[29]

²⁸

²⁹Ma'a njir tərabiya tə həyatə cha nda kwa ngəl nyi nda kwa na. “Jan kə ja sakana! Ka na ko huɓənda Mbwa'alə Hyel ba'a ɓəla həriya ku hanyi makərəu.

³⁰Ya dləuya kərnghə ja, ka səya tə taməngəla nga.”

³¹Əngə tanyi tsəu, wawa'ar fərist ka maləm gadlagadla Musa tə gyaɗənda Yesu nda kwa na nə kərnənda, “A dləuya tə cha alenya nji, a da cha kwa nau dləuya kərnyi wa!

³²Cha səya kyatə taməngəla ngə ja, macha nacha ngə Kəristi təl njir Isra'ila, ga mən la'a mən nənyi jiri!” Ma'a nji'inda nja kukwanda kə'i cha tə ngəlnda nyi.

³³Pəchi tangkər, ngə kutlə tə haɗiya dəhə hə'i kəl saka makərəu nə akəu.

³⁴Nda saka makər nə akə tə ɗa, ngə Yesu tə nga na kurakəu dzəgam dzəgaməu, “Eloi, Eloi, lama sabaktani?” Nacha ngə, “Hyel ɗa, Hyel ɗa, ka mi ka ngya ɗa?”

³⁵Alenya nji'inda ta'i tangnda da ngabiya wa, ngə nda na “Jan cho nga Iliya.”

³⁶Zhang kənda mə na hwi ga yi baɗətə pahuɗə tə zəwa, cha chiu ku ɓitir anap mwamwaləu ga lətənyi gi ka cha sa, cho na, “Ta'i, mən la'a ndara Iliya kwa shili həya nyi səya!”

³⁷Kəl ja, Yesu tə ləlla ana kurakə dzəgaməu ga biya pi.

³⁸Təma miɗi nda nja tabiya vi nda ndiya na chichikur nə ku Mbwa'alə Hyel tə tau dzaɗə mətləu, fwatə kyo kər səya tsa'a ki hə'i.

³⁹Nda dəgalər ləvaləva njir Roma nda kwa ndzam Yesu tə la'a ənda cha tah, cha mər məngəl ga na, “Jiri, ndə na, Zər Hyel cha nda ni!”

⁴⁰Alenya mahi'i da tə ta'i naɗəu nda kwa ndzama, aku huɗa nda, Salomi, Maryamu hya'atə vu Magdala, ba'a Maryamu amanya ka Yakubu kushiu ana Yosi.

⁴¹Mahi'i ina nəu nyi nda kwa mər tlər nənyi bəji nda cha vu Galili, ana alenya mahi'i inda shili ku mələm Urshalima kə'i cha ɗanghəu.

⁴²Vanya ndər Arimatiya da ana tləm nyi Yusufu. Zhang cha ku huɗa nji'inda ku cham njirawawa'a ya njo la'a səli nyi gagaɗa, nacha tsəu cho səkə shilir təlkur Hyel. Cha mər salkur ga yada Bilatus, ga gədi nja nənyi dza Yesu. Cha mər ənga aka akə kwa ɗa ya pəshinda ngə njir Yahuda kwa ɓatlə kərnənda aka vanya zəkəu Pəchir Ngyaməngya,[30]

⁴³

⁴⁴A Bilatus da nənyi jiri ənda Yesu wurtə tə wa, ngə cha nga dəgalər ləvaləva njir Roma ga jawar nyi nda a tətə cha vəlvələu.

⁴⁵Dəgalər ləvaləva nda nar nyi ənda Yesu tə ti, ngə cha na nja nənyi dza Yesu nə Yusufu.

⁴⁶Yusufu tə ɗəlbiya pa'ua lilin, ngə nda həya dza Yesu ka alenya nji ga baɗəu nyi ku pa'ua lilin nda, ga pinda nyi ku hu nda nja dzəɗəbiya ku məa, ga dangəltə hangu ya nya hu nda.

⁴⁷Maryamu Magdaliya ana Maryamu amanya Yosi kwa ndzama ga la'a vi nda nja pinda dza Yesu ti.