Read nya huba Markus 16 Bible Online

Markus 16 - nya huba bible

Markus 16

¹Ahir Pəchir Ngyaməngya, Salomi ana Maryamu hya'atə vu Magdala ba'a Maryamu amanya Yakubu tə ɗəlbiya sə'inda kwa shi'uni kwitkwitə ka nda yi ɓəsəya nyi nə dza Yesu.

²Tsəɗakə mbudla pəshir tangərmar hanyi ku suku, nda pəchi tə har kər, nda təra ya tə hu nda.

³Aku lakəu nda kwa jau kərnənda, “Wa ngo dangəlnda mən hangu nda nya hu nda ja?”

⁴Manda yi har kər, nda la'a a dangəlnda tə nji hangu dəgal nda nya hu nda.

⁵Nda gu hu nda, ga la'a vanya tlakala tə ngya təwa chisəm ana ləkutə pərtə dzə nyi, ngə ləvəra səya nda.[31]

⁶Ngə Chama Hyel nda na, “Ngwa hya da ləvər wa. A zəndətə ya, Yesu ndər Nazarat nda nja kukwanda nda ngə hyo gwa'a. A da cha tangnə wa! A hya'atə tə cha ku hwa! Ndzam ma, jan vi nda nja pinda dza cha ti

⁷Ma'i ma hya yi nar nyi nə ka shawa nyi, ana ma'a Bitrus, ənda Yesu kwa təra yi Galili təvi hya yi. A hinda hyo la'a nyi tang wi nda cha nar hi təvi cha tah.”

⁸Ngə mahi'i inda biya na hwi ku hu nda, sənga wendə nda, dza nda kwa tsamətlaɗəu, a nda shau madawa ku laku wa aka ləvəra səya nda gagaɗa[32].

⁹Ahir Yesu tə hya'atə ku hwa, tsəɗakə mbudla pəshir tangərmar hanyi ku suku, Maryamu hya'atə vu Magdala nda cha gədləbiya məlləm məɗəfə ku kəra cha ngə tangərmar ndə nda cha chabiya nyi kərnyi.

¹⁰Ngə Maryamu tə yi nar nyi sənda ɗa nə alenya njir nəu Yesu inda kwa mər sə'ingu.

¹¹Kəl ja, nda cha par nda ənda Yesu hya'atə tə ya a la'a nyi tə cha, ngə nda ngyar nənyi jiri.

¹²Ahir nga Yesu tə chabiya kərnyi nə mətlə ku huɗa njir nəu nyi pam matsa wi nda nda zəndə nyi. Nji inga hya'atə vu Urshalima nda, nda kwa təra biya tə ya mələm.

¹³Ngə nda kusa ɓəla shili ga par nyi nə alenya nji'inda, kəl ja, a ndə da dləukəri ɓwanya kənda wa.

¹⁴Ahir ngə səkəu, cha chabiya nyi kərnyi nə shawa kwabəzhang inda aku bəji nda nda kwa səm sərsuma. Cha tsə nda a təkəra tar jiri kənda ana ɓaɓalkura ɗufwa nda, aka nda ngyar dləukər ɓwanya nji'inda tə la'a nyi na pi.

¹⁵Ngə cha nar nda, “Ma'i ma kyo dəhə dunəya hya bəzə Mafakə Mənakə anə madawa.

¹⁶Madawa tə nənyi jiri ya nja mərtə nyi baɓtisma cho uya mbəɗa. Kəl ja, madawa tə ngyar nənyi jiri njo tlanda nyi nəumar tah.

¹⁷Nji'inda nənyi jiri kwa nau mər sər muniya ina, nda kwa gədləbiya məlləm ana tləm ɗa, nda kwa ɓwanya ana taɗər nya i.

¹⁸Mada nanda gəzəya pwabu na cha nda, a da cho takasiya nda wa, ma nja ngəya nda ku sərsuma, a sənda kwa ɗa na nda wa. Nda kwa fəkənyi chi nə njir shiləka, ya nda kwa mbəa.”

¹⁹Nda Yesu tə wur na ɓwanya nə nda, ngə nja hənda nyi shi huɗamələm, gyatə vir ngya nda na səli atə chisəma Hyel.

²⁰Ngə shawa inda ma'i mada a bar nda kwa bəzə Mafakə Mənakəu, Tlakə tə char təkəɗəkura Mafakə Mənakə nda nda kwa bəzə təwa nənda gyalkur nə mər səshinshin i.