Read nya huba Markus 3 Bible Online

Markus 3 - nya huba bible

Markus 3

¹Vanya bəji cha ɓəla gwa ku vi pətlənya, kəl jan vanya ndə ana cha cha tətənyi tangnda.

²Alenya nji da ku pama nda kwa gwa'a laku nda nda kwa səya Yesu na bikəu, aka ənga, nda kwa ndzam nyi nda la'a nda cho mbandə ndə nda tə Pəchir Ngyaməngya.

³Ngə Yesu tə nar nyi nə ndə nda cha cha tətənyi nda, “Zəbiya ka ta'i tə bama madawa.”

⁴Ngə Yesu tə jawar nda, “Mi sənda gadlagadla na nja mər tə Pəchir Ngyaməngya? Sə mənakə zəma, aa səɗimi? Nja mbəɗandə pi zəma aa nja tsəya?” Kəl ja, a nji da ɓəlakə nyi wa.

⁵Ngə cha ndzamtə nda na huɗətla, cho mər huɗətla na ɓaɓalkura ɗufwa nda, ngə cha nar nyi nə ndə nda na cha cha tətənyi nda, “Ndəɗabiya cha ka.” Ngə cha ndəɗabiya, təma cha cha nda mbəa.

⁶Ngə njir Farisi inda biya ga ki ghəya mbanya ka njir nəu hir Hiridus a təkəra laku nda nda kwa tsəya Yesu.

⁷Kəl Yesu ka shawa nyi tə hya'ati ga təra gwa nya fa'a Galili. Nji ɗang gagaɗa tə nəu nyi hya'atə vu Galili ana ma'a njir hə'i Yahudiya,

⁸ana hə'i Urshalima, ana hə'i Idumiya, ana nji'inda biyatə ya dəl Urdun, ana nji'inda təwa mələm Taya ana Sidon. Nji ɗang tə ngatə dəhə sə'inda cho məra, ngə nda shili ka nda la'a nyi.

⁹Aka ɗangkura nji, ngə Yesu tə nar nyi nə shawa nyi nda shili na nyi zər param tsa nja da hikətə nyi.

¹⁰Cha mər ənga aka a wurtə cha mbandə nji ɗanghəu, ngə a ɗa dəhə njir shiləkə kwa tsaɗə kərnənda shili da cha aka nda tsəka nyi.

¹¹Dəhə bəji nda nji'inda na məlləm ku kəra nda tə la'a nyi, kəl nda kwa dla ma nyi na ləlla nda kwa na, “Nakə ngə Zər Hyel.”

¹²Kəl ja, cha tsau nda bar, ngwa nda da dəkarnyi nə madawa ndara wa cha wa.

¹³Ahir nga, Yesu tə təra gyo ma, cha nga nji'inda cho i, ngə nda shili da cha.

¹⁴Ngə cha ɗəmtsə nji kwabəmətləu ga nga nda changhabal. Cho i nda maka ma'i kə'i cha ana cha sənda nda ki bəzə Mafakə Mənakəu,

¹⁵ana cha nənda gyalkur gədləbiya məlləm.

¹⁶Jan nji kwabəmətlə inda cha ɗəmtsə. Shiman nda Yesu tə fəndzə nyi tləm Bitrus,

¹⁷Yakubu ana zamə nyi Yohana nguli Zabadi, nanda ingə cha fəndzə nda tləm, Buwarnajis, nacha ngə “Nguli Dəradla.”

¹⁸Andrawus, Filibus, Batalamaus, Matta, Toma, Yakubu zər Halfa, Tadawus, Shiman ndər nyida hə'i nyi,

¹⁹ba'a Yahuda Iskərayoti ndər tləɗa nyi.

²⁰Yesu ka shawa nyi a gu ki nda cha na ngya kwa, aka ɗangkura dlama ɓəla daɓətə dza, a Yesu ka shawa nyi da uya lakur səm sərsum wa.

²¹Nda njir ki kənda ngatə ənga, ngə nda shili kanda səya nyi, aka nda kwa na, “Kəra cha gwaɗəti!”

²²Ka maləm gadlagadla Musa inda hya'atə vu Urshalima tə na, “Ba'alzabul təl məlləm nga gu kəra cha! Ya ana gyalkur nyi ngə cho gədlə məlləm.”

²³Ngə Yesu tə nga nji'inda shili da cha ga ɓwanya nənda ana ba'ada, “Aman Shantan kwa gədlə Shantana?

²⁴Ma təlkur tə təkə mətləu, zhang kwa mər dawa na zhang, təlkur nda do ta'i wa.

²⁵Əngə tanyi tsə'u ma ki tə təkəbiyadzə mətləu, zhang kwa mər dawa na zhang, a ki nda nda kwa ta'i wa.

²⁶Ya macha Shantan kwa mər dawa na kərnyi ga təkəbiyadza, a da cho ta'i wa, ba nənyi wurtə ndani.

²⁷“Jiri a ndə da kwa nau gwa ku ki gyal kwa gwa fa'aya ki nyi wa, kəl nda cha ghəya mbiya gyal nda gwadagəu, təvi cho nau fa'aya ki nyi.

²⁸“Jiri yo nar hi, njo far na dəhə səpəla'a ana ɓwanya ɗimi nda nja pə təkəra Hyel.

²⁹Kəl ja, madawa tə pə ɓwanya ɗimi təkəra Shanguɗə Karti, a da njo farbikə nyi ba'anawa wa. Səpəla'a nyi ngya tə təkəra cha ba'anawa.”

³⁰Yesu tə pə ənga aka nda na, “Məlləm ku kəra cha.”

³¹Kəl ka zamənya Yesu ka ama nyi tə shili. Nda ta'i biya ga sə vanya ndəu cha gwa nga nyi.

³²Dlama nji tə ngya ga ɓandə nyi, ngə nda nar nyi, “Jan ama nghə ka zamə nghə kwa gwa'a nghə biya.”

³³Ngə cha jau nda, “Ka wa ngə ama ɗa ka zamə ɗa?”

³⁴Ngə cha ndzamar nji'inda tə ngya dzə nyi ga na, “Ja'inə ka ama ɗa ka zamə ɗa!

³⁵Dəhə ndə nda mər sənda Hyel kwa i, nacha ngə zamə ɗa, kwamə ɗa ana ama ɗa.”