Read nya huba Markus 4 Bible Online

Markus 4 - nya huba bible

Markus 4

¹Yesu kwa dlədləɓə nə nji səkəu nya fa'a Galili. Dlama nji ɗang gagaɗə tə tsəmtədzə ga ɓandə nyi, ngə Yesu tə gwatanyi ku param ga gwa ngyata nyi, nji'inda tsəu biya nya bam.

²Cha dlədləɓar nda sə ɗang ana ba'ada i wi nənna, cho na:

³“Səya ma himi, vanya ndə tə biyar gwa tləka[5].

⁴Nda cho huɗa uchə chuli, ngə alenyi tə pəpə ku laku, ngə eakə tə shili tsakuti.

⁵Alenya chuli tə pəpə səya tə hya fafa mbwa nda a hə'i da dur wa. Ɗəɗəu tanyi nda tsa aka a hə'i da dur tangnda wa.

⁶Nda pəchi tə dəda, ngə nda titi'ua ga ula, aka a nanda chiya ngilang wa.

⁷Alenyi tsəu tə pəpə gu lya shikəɗi, ngə shikəɗi inda tə hə ga tsakə nda chi, aka ənga, anda mər sakəda wa.

⁸Kəl ja, alenyi tə səya tə hə'i mənakəu. Nda tsa ga ha, ga hətə kər, alenyi makərkumənyi, alenyi kwakumənyi ba'a alenyi gharəu gharəu.”

⁹Ngə cha na, “Ndə nda na himi ngati, cha ngati.”

¹⁰Ahir dlama nji'inda tə wiɗa, Yesu tə ngya ka shawa nyi ana alenya nji, ngə nda jau nyi sənda ba'ada inda kwa cha.

¹¹Ngə cha nar nda, “Nahi, a ngya hi tə nji hya zəndəbiya dəhə sə'inda tə ɗəwa ku təlkur Hyel, kəl ja, a nə nji'inda pa'a ku pama hi, madami kəl ana ba'ada.

¹²Ga cha ɗa wi nda likatəkatə tə na, ‘Nda kwa ndzama, ya a səda nda kwa la'a wa, nda kwa ngati, ya a da nda kwa ngabiya wa. Manda ngabiya, nda kwa shar ngya kənda ya njo farbikə kənda.’[6] ”

¹³Ngə Yesu tə nar nda, “Macha a da hya ngabiya ba'ada nə wa, aman ngə hyo ɗana ngabiya alenya?

¹⁴Ndər tləka nga, ɓwanya Hyel ngə cho ucha.

¹⁵Chuli inda səya ku laku, nanda ingə ba'adar nji'inda ngatə ɓwanya Hyel. Təma Shantan tə shili həbiya ɓwanya nda nja tləkəya ku ɗufwa nda.

¹⁶Əngə tanyi chuli inda səya tə hya fafa inda, nanda ingə ba'adar nji'inda ngatə ɓwanya Hyel, ga kusa dləutsə na hirgyaɗi.

¹⁷Kəl ja, manda a nda chiya ngilang ku ɓwanya Hyel wa, nda nənyi jiri nə bəji kushiu tanyi. Nda nda gwa ku ɓwaɓwatə ana izza aka ɓwanya Hyel, ɗəɗəu tanyi nda ɓəla yahi.

¹⁸Chuli inda pəpə ku lya shikəɗi nda, nanda ingə ba'adar nji'inda ngatə ɓwanya Hyel,

¹⁹kəl ɗəngha na ngyar dunəya, ana gwa'a gəna, daɓə huɓər alenya səu, tə tsakər chi təkəra ɓwanya nda ga katə nda tsa mər sakəda.

²⁰Chuli inda səya tə hə'i mənakəu, nanda ingə ba'adar nji'inda ngatə ɓwanya Hyel, ga dləutsi, ga mər sakəda, alenyi makərkumənyi makərkumənyi, alenyi tsəu kwakumnyi kwakumnyi, alenyi ma'a gharəu gharəu.”

²¹Ngə Yesu tə jau nda, “Ndər ngirnya hu'u da nya təkəsəu kwa nda mbuya na shala ndara cha fəu gwatə kiɗa gangər ya? A da wa, kəl nda nja hakəya tə chaka'i nyi, mbwa nda cho mbəl ti.

²²Dəhə sənda tə ɗəwa cho chabiyadzə tə babaləu, ya njo chabiya hi dəhə sənda pa'a hya ngabiya sakana tə vichaməu.

²³Ndə nda kwa i cha ngabiya, cha səya himi.”

²⁴Cha ɓəla nar nda, “Səya ma himi mənakəu, shala nda hya dəkə kwa nə alenya nji, nacha njo dəkəu hi ni, njo ma'a tsakə kəhi.

²⁵Ndə nda na ngabiya, njo tsakətə nyi, kəl ja, ndə nda pa'a da na ngabiya, njo dləuya mada kush nda cha ni.”

²⁶Yesu tə ɓəla na, “Təlkur Hyel kwa pabiya vanya ndə nda biya ka cha uchi chuli ku fah nyi.

²⁷Ahir nga, piya hya'ati, vu'i na pəchi, ngə chuli nda tsa ga həa, ya ana cha zəndə ndara aman sənda ɗa wa.

²⁸Hə'i ngə kwa biyandə sakəda tə kərnyi, tangərma chiva, cho nda həkər, ahir əngə tsə'u cho pə li.

²⁹Ma bəjir mər fa ɗa, tlakər fa kwa shili na tlaku nyi cho tliya.”

³⁰Cha ɓəla na, “Ana mi məno məməlandə təlkur Hyella? Ana ba'ada manə məno char ənda cha?

³¹Wi məlar Mustad cha, kush cha ku huɗa chuli, nda vanya ndə tə tləkəya.

³²Ahir nja tləkəya, cho həa cho ndəɗə na dəgaləu aku huɗa wu nda ku ngakəu, eakə tsəu kwa la ki kənda tə cha wu nda.”

³³Ana ba'ada ɗang Yesu tə par nda ɓwanya Hyel aku dəhə laku nda nda kwa ngabiya.

³⁴A da cha dəkə madami nənda wa, kəl nda ana ba'ada. Kəl ja, macha ka shawa nyi, cho dəkəbiya nda dəhə səu.

³⁵A ba akəu, Yesu tə nar nyi nə shawa nyi, “A mən təra biya tiya fa'a na.”

³⁶Ngə nda gwa ku param nda Yesu kwa nda, nda təra ga ngyar dlama nji'inda. Alenya param da nəu nda tsəu.

³⁷Gyang par tə hya'atə gagaɗa kwa fi, ngə ɓiti tə ghəya kətsaɗə gu param nda kwa gwa'a nyandi.

³⁸Yesu kwa njihanyi biyahir param nda, cha dəhətə kəra cha na sər dəhə kər. Shawa nyi tə yi hya'andənyi ga na, “Maləm, jan məno gwa'a kuɗa a da ko ɗəngha wa ya?”

³⁹Ngə Yesu tə hya'ati ga tsə gyang nda, ana cha nar nyi nə ɓitir fa'a nda “Ta'i! Ka bəgə ɗiyu!” Ngə gyang nda ta'i, ngə mbwa nda ɗa shwanghəu.

⁴⁰Ngə cha nar nyi nə shawa nyi, “Mya gwa'atə ləvəra səya hi əna? Ba'a sakanə a da hi na jirikur wa ya?”

⁴¹Ngə ləvəra udə səya nda, nda kwa na nə kərnənda, “Chul ndə manə nə əna? Ma'a gyang ana ɓitir fa'a kwa nəu nya cha!”