Read nya huba Markus 5 Bible Online

Markus 5 - nya huba bible

Markus 5

¹Ngə Yesu ka shawa nyi inda dləgəlbiya fa'a nda ga təra yatə hə'i njir Garasina.

²A biyatə ya fa'a nda vanya ndər məlləm nda, ndə nga atə hwa ana pama mə cho ngya, vu'i na pəchi cho ləlla cho tla dza cha ana mangu. Zhaka ɗang tanyi njo mbiya cha cha ka hya cha ana dzəra lyang, kəl cho tlətləu. A tsə'u ndə da kwa nau mbiya nyi wa, aka a ndə da na dunamar nəu na cha wa. Səyakura ka Yesu na shawa nyi ku param, ndər məlləm nda la'a Yesu naɗəu, ngə cha hya'atə tə hu na hwi ga yi uzhi mar Yesu.

⁷Ngə Yesu tə nar nyi, “Məlləm, təkə na ndə na!” Ndə nda ləlla ana kurakə dzəgaməu, cha na, “Yesu Zər Hyel nda ndiya na səli, mya həu nghə naya? Yo gədi nghə ana tləmər Hyel, əngwa ka da ba'a na'a ɓwaɓwatə wa.”

⁹Yesu tə jau nyi, “Wa tləm ngha?” Ngə cha na, “Tləm ɗa dlama, aka ɗang ta ea.”

¹⁰Ngə cha gədi Yesu tsa'anyata, tsa cha da ba'a gədlənda nda tangnda.

¹¹Ləhə tangnda, vanya biri dəgal da nə dagəla kwa ɓəla tə dəgəl.

¹²Məlləm nda gədi tsa Yesu, “Mbəlatə ea yi da dagəla inga, ngya ea, ea gwa kwa.”

¹³Ngə Yesu tə ngya nda. Ngə Məlləm inda biya ku ndə nda ga gwa ku dagəla. Ngə dagəla inda mə na hwi səyo fa'a ga kuɗə ku ɓiti. Biri dagəla inda kwa ɗa dəbu mətləu.

¹⁴Nda njir ɓəla dagəla inda la'a ənga, ngə nda hwi gu ta mələm ka giwa inda ləhə dza mələm kənda ga gwa par sənda ɗa. Ngə nja zəbiya kanda la'a sənda ɗa.

¹⁵Nda shili da Yesu ga la'a ndə nda na məlləm ɗang ku kəra cha haaɗa nda tsatlə tangnda ana ləkutə dzə nyi ya jigadəma nyi tsa'atsa'a, ngə ləvəra səya nda.

¹⁶Nji'inda la'a sənda ɗa na ndər məlləm ba'a dagəla inda tə par nyi nə alenya nji.

¹⁷Ngə nji'inda gədi Yesu “Maki, ngyar hə'i kəea.”

¹⁸Nda Yesu kwa gwa'a gu param ngə ndə nda na məlləm ku kəra cha haaɗa nda nar nyi, “Ngya ɗa ya nəu ngha!”

¹⁹Kəl ja, Yesu tə nar nyi, “Ɓəl kyo ki, yada ka njir njikə hi, ka yi par nda dəhə sə wawa'a inda Tlaka mərtə ngha ana ənda cha ngatə təhuɗə ngha.”

²⁰Ngə ndə nda təra, cha tahəya vanya hə'i nda na Mələm Kuma, cho ɓwanya təkəra sə wawa'a inda Yesu tə mərtə nyi. Dəhə nji'inda tə ngati, tə mər məngəl.

²¹Ahir nga Yesu ka shawa nyi a ɓəla təra biya tə ya fa'a nda aku param, cha ta'i nya fa'a ngə dlama nji ɗang tə shili dzə nyi.

²²Vanya ndə da ana tləm nyi Yayirus, dəgal cha ku vi pətlənya, cha shili la'a Yesu ngə cha dla ma nyi,

²³ga gədi nyi na jiri, cho na, “Kwa ɗa, kwa kushiu kwa gwa'a tah. Maki andə ka fəkənyi chi ga cha mbəa.”

²⁴Ngə Yesu tə təra kə'i cha. Nji ɗang tsəu tə nəu nyi nda kwa hikənyi.

²⁵Vanya mala da, cha mər fa kwabəmətlə mashi kwa nəu nyi.

²⁶A satə cha ɓwaɓwatə ku cha njir kuzəkəu, cha tsəya dəhə sənda tsa cha. Ya ana cha uya mbə wa, kəl tsakə tanyi shiləkə nda kwa tsaka.

²⁷Nda cha ngatə sə təkəra Yesu, ngə cha na nə kərnyi, “Ma ya tsəkar mada ləkutə nyi tanyi, yo uya mbəa.” Ngə cha shili ku pama dlama nji təwa hir Yesu ga tsəkar ləkutə nyi.

²⁹Təma mashi nda ta'i. Cha ngatə ku dza cha ənda a mbəɗandə nyi tə nji tsa ɓwaɓwatə nyi.

³⁰Təma Yesu tə zəndəbiya ənda gyalkur da tə biya ku dza cha. Ngə cha sha ga jawa, “Wa nga tsəkar ləkutə ɗa?”

³¹Shawa nya nar nyi, “Kwa la'a kə ənda dlama nji kwa hikə ngha, nə ko na, ‘Wa tsəka ɗa?’ ”

³²Kəl ja, Yesu kwa ndzama ka cha la'a ndara wanga mər sənga.

³³Mala nda ngabiya tə sənda ɗa nacha, ngə cha shili ana ləvəra, cho dzədzi, cha uzhi manyi ga par nyi dəhə jiri.

³⁴Ngə cha nar nyi, “Kwa ɗa, jirikur nghə mbandə nghə ti. Ma'i na piyarɗufəu, mbandə nghə tə nji tsa ɓwaɓwatə ngha.”

³⁵Tsə'u tanyi kwa ɓwanya na mala nda, kəl jan nji hya'atə ku ki Yayirus ndəradəgal nə vi pətlənya tə shili ga na, “Kwa nghə təti. Anyar mi ko ɓəla həɗandə Maləma?”

³⁶Nda Yesu tə ngatə sənda nji'inda pa, cha nar nyi nə Yayirus ndəradəgal nə vi pətlənya, “Ngwa kə da ləvər wa, nənyi tanghə jiri.”

³⁷A cha i madawa nəu nda wa, kəl nda ka Bitrus, Yakubu ana Yohana zamənya Yakubu.

³⁸Nda nda yo ki Yayirus ndəradəgal nə vi pətlənya, Yesu tə la'a ənda nji witə nda kwa tiwi nda kwa ləlla.

³⁹Cha gu ta ki ga nar nda, “Mya gwa'atə hyo wendə kərnəhi hyo lələ əna? A kwa nghə da tə wa, hanyi ngə cho nja.”

⁴⁰Kəl ja, nda gyaɗi kənyi gyaɗi həyatəvi. Nacha tsəu cha gədləbiya dəhə nji biya, ga ngyar kəl adanya kwa nda ana ama nyi ba'a shawa inda cha shili kə'iri, cha təra gu mbwa nda nja pinda kwa nda ti.

⁴¹Cha gəzəya cha kwa nda ga nar nyi, “Talita kumi,” nacha ngə, “Kwa kushiu, hya'ati.”

⁴²Təma kwa nda hya'ati ga ghəya ma'i. Sənga gwa'atə nda mər məngəl gagaɗa. (Fa kwa nda kwabəmətləu.)

⁴³Ngə Yesu tə təɗəhima nda, tsa vanya ndə da ba'a ngatə sənda ɗa. Cha nar nda tsəu, nda nənyi sərsum nə kwa nda.