Read nya huba Markus 6 Bible Online

Markus 6 - nya huba bible

Markus 6

¹Ngə Yesu tə ngyar mbwa nda ga shili ku mələm nyi, shawa nyi tsəu tə shili kə'i cha.

²Nda Pəchir Ngyaməngya njir Yahuda tə shili, cha gu vi pətlənya ga ghəya dlədləɓə nə nji. Nji ɗang ku huɗa nji'inda ngatə dlədləɓə nyi tə mər məngəl nda kwa na, “Aman ngə cha uya dəhə sə'ina? Chul dəma mangə nja nənyi əna? Aman cha uya gyalkur mər səshinshin wawa'a ina?

³“A ndər fiɗə wu nda ma, zər Maryamu, zamənya ka Yakubu, Yusufu, Yahuda ba'a Shiman? A jan ka kwamə nyi i tangnə kə'i mən wa ya?” Ngə nda ngyar dləu nyi.

⁴Ngə Yesu tə nar nda, “A vi da kəla njo la'a səlir ndər mətakər Hyel tə wa, kəl nda ku mələm nyi ana ku huɗa njikə nda ba'a ki kərnyi.”

⁵A Yesu da mər səshinshin ɗang hinda wa, kəl njir shiləkə yiɗau inda cha fəkə nda chi ga mbandə nda.

⁶Cha mər məngəl ana tar jiri kənda. Ngə Yesu tə zhulitə giwa i, cho dlədləɓə nə nji.

⁷Ngə Yesu tə nga shawa kwabəmətlə inda, ga sənda kərmətlə kər mətləu, cha nənda gyalkur təkəra məlləm i.

⁸Cha səu nda bar tsə'u, “Ngwa hya hə vanya sə ka ma'i ngə wa, ndara sərsuma, mbəl, ndara kwaba ku hipə kəhi wa, hya gəzəya kəl zəwa.

⁹Hya hau ɓiɓi, ngwa hi da hə vanya ləkutə pam matsa nda dzən hi wa.

¹⁰Dəhə mbwa nda nja dləutsə hi ti, hya ngya kunda kəl bəji nda hyo da ngyar mələm nda.

¹¹Dəhə mbwa nda nja ngyar dləu hi ga ngyar səhimi da hi, ma hyo təra, hya dəgənda bərbər nda tə hya hi, ga cha ɗa matauli kəhi.”

¹²Ngə nda təra nda kwa bəzə mafakə Hyel nda kwa na, nja ngyar mər səpəla'a nda sha shili da Hyel.

¹³Nda gədləbiya məlləm ɗanghəu, ga ɓəsəndzə nyi mal nə njir shiləkə ɗanghəu, ga mbandə nda.

¹⁴Ngə mafakə sə'inda Yesu kwa məra həya təl Hiridus, aka tləmər Yesu kwa ma'i mada abari. Alenya nji kwa na, “Yohana ndər mər baɓtisma nga hya'atə ku hwa, nacha gwa'atə chul səshinshin inga kwa ɗa təwa nyi.”

¹⁵Alenya nji tsə'u kwa na, “Iliya nga.” Ndə alenya nji, “Ndər mətakər, wi zhang ku huɗa njir mətakər Hyel inda haaɗa.”

¹⁶Nda Hiridus tə ngatə ənga cha na, “Yohana ndər mər baɓtisma nda ya tlanda kəra cha nda nga hya'atə ku hwa!”

¹⁷Hiridus tə kərnyi nga ɗaka nənyi gadlagadla nə nji, nda ki səya Yohana nja tsau nyi ku jarum. Hiridus a mər ənga a təkəra Hirudiya mala Filibus zamə nyi, nda cha dləuya ga həbiya sənyi.

¹⁸Yohana kwa ɗaka na nə Hiridus, “A da ɗa tsa'atsa'a ka hə mala zamə nghə wa.”

¹⁹Hirudiya ndani, kwa ɗa tsa Yohana aku ɗufwa cha, cha gwa'a ma'a lakur tsa nyi, kəl ja, a da cha uya wa,

²⁰aka Hiridus kwa ləvəra ana cho la'a səlir Yohana. A zəndəbiya təcha ənda Yohana ndə karti ana ndər mər sə tsa'atsa'a cha, ngə cha gəgakənyi wua. Dəhə bəji nda cho səhimi da Yohana, jigadəma nyi kwa hya'atə gagaɗa, dəhə ka ənga cho i ka cha maka səhimi da ɓwanya Yohana.

²¹Vanya pəchi, nda bəjir yar Hiridus tə ɓəla shili, ngə cha ɓatliya ladər ga nga nji təltəl, wawa'ar ləvaləva ana njirawawa'a nə Galili. A tangnə ngə Hirudiya uya laku ka cha tsəya Yohana.

²²Nda kwar Hirudiya gwa utsa, Hiridus ka nji'inda cha kə'iri inda tə ngatə məsəɗakə nacha. Ngə təl Hiridus tə nar nyi nə kwa nda, “Mi sənda ko ea? Dəhə sənda ka gədi yo nə ngha.”

²³Ana ma'a səmfəla, təl tə nar nyi nə kwa nda, “Dəhə sənda ka gədi yo nə ngha, mada mar təlkur ɗa.”

²⁴Ngə kwa nda biya jau ama nyi, “Mi sənda yo kina gədya?” Amanya nar nyi, “Kəra Yohana ndər mər baɓtisma.”

²⁵Təma cha ɓəl gwa da təl ana hwi ga nar nyi, “Yo i ka na'a kəra Yohana ndər mər baɓtisma tə pəli sakanə sakana.”

²⁶Huɗa təl tə tla gagaɗa, kəl ja, aka səmfəla nda cha mər mar mihiɓi ladər nyi nda, a da cha i kəpaliya kwa nda wa.

²⁷Təma cha sə ləvaləva ana gadlagadla, nda yi tlanda kəra Yohana nda shili ni. Ngə ndə nda yi tlanda kəra Yohana ku jarum.

²⁸Cha shili na kər nda tə pəli ga nənyi nə kwa nda, ngə kwa nda nənyi nə ama nyi.

²⁹Nda shawa Yohana tə ngatə ənga, ngə nda shili hətə gundəɓər dza cha ga ki haɗiya ku hwa.

³⁰Changhabal inda Yesu tə sə inda ɓəl shili da cha ga par nyi dəhə sənda nda məra ana sə'inda nda dlədləɓə nə nji.

³¹Aka zurzur kura dlama nji, a Yesu ka shawa nyi da uya lakur səm sərsum wa, ngə cha nar nyi nə shawa nyi, “A mən ki gwa'ar mbwa nda a nji da wa, mən ɓəliyasar kushiu.”

³²Ngə nda go param nanda səkənda ga ki gwa'ar mbwa nda a nji da wa.

³³Nji ɗang tə la'a ənda nda kwa təra ga ngabiya ənda nanda inga, nji hya'atə ku mələm pampamə tsəu tə ghəya ma'i na hi, ga həya mbwa nda təvi Yesu ka shawa nyi inda shili.

³⁴Manda Yesu tə biya ku param ga la'a dlama nji'inda, ngə cha ngatə təhuɗə kənda. Aka wi kətəng kəla ndər ɓəla nda. Ngə cha ghəya dlədləɓə sə ɗang nənda.

³⁵Aku bəji nga kaɗə akə ɗa, ngə shawa nyi tə shili da cha ga na, “Akə wurta ɗa, ya takə na, nar nyi nə nji'inə nda təra kyo giwa inga, nda ki gwa'a sərsuma ka kərnənda.

³⁶Səu nji'inə ku lakəu, nda təra kyo giwa ka mbwa nda biya tə ya mələm inda lələhəu, nda ɗəlbiya nyi sərsum nə kərnənda.”

³⁷Kəl ngə Yesu tə wum ga nar nda, “Nənda ma sərsum nəkə hi nda səma.” Ngə nda nar nyi, “Mi! Ana mya? Kəl nda ea mər tləra nə hya chisəu, eo dzəgwa uya kwaba nda kwa nji ka ɗəlbiya nyi sərsum nə chul nji ɗang wi na!”

³⁸Ngə cha jau nda, “Aman 'ualkura gwazhilakə nda tsa hya, ma'i ma hya ki ndzamari.” Nda nda ndzamari ngə nda na, “Takwara tufu ana kalfi mətləu.”

³⁹Ngə Yesu tə nar nyi nə shawa nyi, “Nar nyi ma nə nji ingə nda uya vir ngya ka dzuk ka dzuk atə sar miɗakəu.”

⁴⁰Ngə nji'inda ngya ku dzukə pampaməu, alenyi nji gharəu gharəu ana tufkumnyi tufkumnyi.

⁴¹Ngə cha hətə takwara tufu ana kalfi mətləu nda, cho ndzam shi huɗamələm cha usaku Hyel təkəri. Ngə cha pəpasəu takwara inda ga nənyi nə shawa nyi nda təkənda nyi nə dlama nji, əngə cha mər na kalfi inda tsəu.

⁴²Madawa tə səma ga nyi.

⁴³Ngə shawa inda tə tsəmtə sənda həyadza, tsəla kwabəmətləu. Gwazhilakə ana kalfi nda, tsəla kwabəmətləu.

⁴⁴Ɗangkura nji'inda tə səm sərsum nda, ba shili tanyi kwa ɗa dəbu tufu.

⁴⁵Təma Yesu tə pəu shawa nyi ku param aka ga nda təra yi Betsaida təvi cha nəu nda, tsa'aka cho wiɗənda dlama nji'inda.

⁴⁶Ahir cha səu dlama nji'inda ku laku, ngə cha hya'atə ga təra gyatə sara mə ka cha gi pətlənya.

⁴⁷Nda akə tə ɗa, param nda kwa tə ghadar fa'a, Yesu tsə'u kyatə dəgəl zhang tanyi.

⁴⁸Yesu tə har lya cha, ngə cha la'a shawa inda naɗə kwa sa ɓwaɓwatə ana param, aka gyang kwa mbəla nda ka yahi. Aku pama saka makər ana kwah nə wurəvi cho ma'i təkəra ɓiti, kaɗə cha shili dzən nda.

⁴⁹Kəl ja, manda nda la'a nyi cho ma'i təkəra ɓiti, nda har ndara mambəl nda, ngə nda ləlla,

⁵⁰aka a la'a nyi tənda dəhə nda, ngə nda məa. Ngə Yesu tə kusa ndər nənda ga na, “Səda wa! Naya na, ngwa hya da ləvər wa!”

⁵¹Ngə cha gu param kə'i nda, ngə gyang nda ta'i. Ngə nda mər məngəl gagaɗa,

⁵²madangə a la'atə nda səshinshin takwara tufu nda, dəhə ka ənga anda ngabiya ənda gyalkur mər səshinshin da tsa Yesu wa, aka ɓaɓalkura ɗufwa nda.

⁵³Manda nda dləgəlbiya fa'a, nda ta'i vu Janisarata, ga mbiya param anya fa'a.

⁵⁴Səya kuranda ku param, təma nja ngabiya ənda Yesu nda.

⁵⁵Ngə nda ghəya na hwi mada təwabari aku mələm nda, kanda nar nyi nə alenya nji ənda Yesu shili ti, nda nja ngatə ənga, ngə nda shili na njir shiləkə a tə sərpiya kənda shili tə dəhə mbwa nda Yesu ti.

⁵⁶Ya dəhə ba nda cha ma'i, mələm dəgal ndara kushi nyi, ndara biyatə ya mələm, nda kwa pinda njir shiləka tə suku, nda kwa gədi nyi ka njir shiləkə inda tsəkar mada nyachira ləkutə nyi. Dəhə nji'inda tsəkari tə uya mbəa.