Read nya huba Markus 7 Bible Online

Markus 7 - nya huba bible

Markus 7

¹Vanya pəchi njir Farisi ana alenya maləm gadlagadla Musa hya'atə vu Urshalima tə shili da Yesu.

²Ngə nda la'a alenya shawa Yesu kwa səm sərsuma ana chi kəla cha, a da wi sənda sər jival tə char wa.

³Aka njir Farisi ana dəhə njir Yahuda do səm sə wa, kəl nda chinda cha nda wi nda ngyar jival kənda tə chari.

⁴Ma nda shi kwa suku a da nda kwa səm sə wa kəl nda chinda cha nda ana hya nda. Ya kwa nəu nda alenya sər jival kənda ɗanghəu, wi ka, chi ɗeɗika, giɗa ba'a bəng.[7]

⁵Ngə njir Farisi ana ka maləm gadlagadla Musa jau Yesu, “Mya gwa'atə a shawa nghə do nəu sənda sər jival tə na wa? Jan nda kwa səm na chi hiɗahiɗa!”

⁶Ngə cha nar nda, “Nahi nji dəmən, tsa'atsa'a tanyi ngə Ishaya ndər mətakər tə tsəfətə təkəra hi ənda Hyel tə na, Nji'ina atə chimər nya tanyi nə nda kwa fal ɗa, kəl ja, ɗufwa nda naɗə tsa ya.

⁷Ɓwa'atanyi ngə nda kwa həsəli na'a, aka nda kwa dlədləɓə tsaubar nji, abəra gadlagadla Hyel.

⁸Hya ngyar mər sənda gadlagadla Hyel tə na nja məra, hyo nəu sənda nji kwa dlədləɓa.”

⁹Ngə cha ɓəla nar nda, “Kəkəngkur ngə mər hi ga ngyar gadlagadla Hyel, aka ga hya nəu dlədləɓə kəhi!

¹⁰Aka Musa tə na, ‘Ka hətə nyi səli nə ada ngha ana ama ngha, dəhə ndə nda ngəliya ada nyi ndara ama nyi, tuku nja tsəya nyi.’

¹¹Kəl ja, nahi, hyo na tsa'atsa'a tanyi ma ndə tə na nə njir ya nyi, ‘A da ya kwa nau vala hi wa. Aka a wurtə ya mbatə ndəra ənda yo nənyi dəhə sənda hyo kina uya tsa ya nə Hyel.’

¹²Təwa ənga, hya katə nji tsa nda da ba'a vala ama nyi ana ada nyi.

¹³Aka sər jival kəhi hya fiya ɓwanya Hyel ka sə ɓwa'atanyi. Ɗang tanyi sə wi nga nda hyo məra.”

¹⁴Yesu tə ɓəla nga dlama nji shili da cha ga nar nda, “Səya ma himi da ya hya ngabiya mənakəu.

¹⁵A da sənda kwa gwa ku ta ndə ngə kwa mərtə nyi ‘hiɗahiɗa’ mar Hyel wa. Kəl nda səɗimi inda kwa biya ku ɗufwa ndəu, na nda ingə kwa mərtə ndə ‘hiɗahiɗa’ mar Hyel.”[8]

¹⁷Nda cha ngyar dlama nji ga təra go ta ki, ngə shawa nyi tə jau nyi, nda mi sənda dlədləɓə ngə kwa cha.

¹⁸Ngə cha nar nda, “Ma'a nahi a na hya ngabiya nda nə wa ya? Aka sənda kwa gwa ku ta ndə da kwa mərtə nyi hiɗahiɗa mar Hyel wa.

¹⁹Aka a da cho gwa ku ɗufwa cha wa kəl nda ta cha, ya cho təbiya.” (Aku ɓwanya nga, Yesu kwa na ənda dəhə chul sərsum chaməu.)

²⁰Cha tsakətə na, “Sənda kwa biya ku ɗufwa ndəu, nacha ngə kwa mərtə nyi hiɗahiɗa.

²¹Aka ku ɗufwa ndə ngə jigadəma ɗimi kwa biya, shi'ushi'ukur, həl, tsa ndəu,

²²kasalikur, huɓərsəu, paha, shakər, həyakur, shishi, səwa tləm, həkər, ana kəkəngkur.

²³Dəhə səɗimi ina aku ɗufwa ndə nda kwa biya, ya kwa mərtə ndə hiɗahiɗa.”

²⁴Nda Yesu tə ngyar mbwa nda ga təra yatə hə'i Taya. Cha gu vanya ki, ana cha i madawa zəndəbiya wa. Dəhə ka ənga a da cha nau mbu tanyi wa.

²⁵Vanya mala da ana kwa nyi kushiu nda məlləm kwa chi nyi. Nda cha uya mafakə təkəra Yesu, təma cha shili vakənda kərnyi biyamar Yesu.

²⁶Mala nda kwa Heleni cha, kwa Finikiya atə hə'i njir Suriya. Ngə cha gədi Yesu ka cha gədləbiya məlləm nda ku kəra kwa nyi.

²⁷Yesu tə wum nənyi ana ba'ada, “A da tsa'atsa'a nja hətə sərsum ngulisha'a nja sətə nyi nə həya wa. Kəl nda nja ghəya ngyar ngulisha'a nda səm gwadagəu.”

²⁸Mala nda na, “Jiri ngə Tlakəu. Kəl ja, həya kwa səm nda sə'inda pəpə ku nya ngulisha'a.”

²⁹Ngə Yesu tə nar nyi, “Jiri ka, ma'i ja, məlləm nda təkətə na kwa ngha.”

³⁰Cha ɓəl kyo ki ga həya kwa nyi tə sərpiya cho ɓəlsar, məlləm nda ngya nyi ti.

³¹Ngə Yesu ka shawa nyi tə ngyar hə'i nda ɓandə mələm Taya, ga təra tahə mələm Sidon, cha tahəya hə'i nda na Mələm Kuma ga təra gwa nya fa'a Galili.

³²Nja shili na nyi vanya ndə dada himi nda kwa ndər dzaudza'u, nda gədi nyi cha fəkə nyi chi ga cha mbandə nyi.

³³Ngə Yesu tə təɗənda ndə nda tsa dlama nji ya tə mbwa nda a ndə da wa. Cha fəu cha cha ku hima ndə nda, ngə cha təftə tuli tə cha cha ga tsəkar kyara ndə nda ni.

³⁴Ngə cha ndzamar shi huɗamələm ga səbiya pi, ga nar nyi nə ndə nda, “Ifata!” Nacha ngə “Mɓəɗiya dza!”

³⁵Təma hima ndə nda mbəɗa, kyara cha nda wala, cha ghəya na ndər mənakəu.

³⁶Yesu tə tsau nyi bar nə nji'inda atəvanyi atəvanyi, tsa nda da par nyi nə madawa, dəhə ka ənga kəl nda ɓwanya nga wiɗa.

³⁷Dəhə nji'inda ngatə, tə mər məngəl nda kwa na, “Dəhə sənda cho mər mənakəu! Cha mərtə ma'a nji dada himi kwa ngatə ɓwanya ga waliya kyara nji'inda pa'a kwa nau ndəra.”