Read nya huba Markus 8 Bible Online

Markus 8 - nya huba bible

Markus 8

¹A da hətə bəji wa, ngə dlama nji tə ɓəla daɓətə dza, ya a sərsum da ka nda səm wa. Ngə Yesu tə nga shawa nyi shili da cha ga nar nda,

²“Yo ngatə təhuɗə nji'ina aka hanyi makər nə ea kə'i nda tangna, janə a nda uya madami ga səm wa.

³Ya ma ya wiɗənda nda na huɓwa, ndo dla ku laku, aka alenya nji ku pama nda hya'atə naɗəu.”

⁴Shawa nyi inda tə wuma, “A nji da na ngya tangnə wa. Aman njo uya sərsum nda kwa nji chul nji'ina?”

⁵Yesu tə jau nda, “Takwara yiɗawa ngə tsa hya?” Ngə nda ɓəlakə nyi, “Məɗəfa.”

⁶Ngə cha nar nyi nə dlama nji'inda nda uya vir ngya hu'i. Cha hətə takwara məɗəfə inda ga mərtə nyi usaku nə Hyel, ngə cha pəpasəu, ga nənyi nə shawa nyi ka nda nənyi nə dlama nji'inda, ngə nda tətəkəya nda.

⁷Ətsə'u, kalfi shiɗəɗə da tsa nda yiɗau. Ahir cha usaku Hyel təkəri, cha nar nyi nə shawa nyi nda təkəya nyi nə nji'inda tsə'u.

⁸Dəhə nji tə səma ga nyi. Ngə shawa inda tə tsəmtə sənda həyadza, tsəla məɗəfa.

⁹Ɗangkura nji'inda səm sərsum nda, kwa ɗa nji dəbu fwaɗəu. Ngə Yesu tə səu nda ku laku.

¹⁰Təma cha gwa ku param ka shawa nyi, ga təra yatə hə'i Dalmanuta.

¹¹Ngə alenya njir Farisi tə shili ngə nda ghəya tlə kəpal na Yesu. Nda kwa gwa'a nda ngəya nyi ləbam, ngə nda gədi nyi cha mərtə səshinshin ga cha chari ənda Hyel nga sənyi.

¹²Yesu tə səbiya pi, ga na, “Mya gwa'atə njir bəji nə kwa gwa'a səshishina? Jiri yo nar hi, a sər muniya da yo char nyi nə njir bəji nə wa.”

¹³Ngə cha ngya nda. Ngə Yesu ka shawa nyi a gwa ku param ga təra biya tə ya ya fa'a nda.

¹⁴Shawa Yesu tə far hətə gwazhilakə kəl nda zhang tanyi tsa nda ku param.

¹⁵Ngə Yesu tə təɗəhima nda tsa'anyata ga na, “Gəla ma tsa tləlam njir Farisi ana nə Hiridus.”

¹⁶Ngə shawa nyi inda ghəya ɓwanya ku pama kərnənda, “Aa mangə a gwazhilakə da tsamən wa nga gwa'atə cha na əngə ya?”

¹⁷Yesu zəndətə sənda nda kwa ɓwanya təkəri, ngə cha jau nda, “Mya gwa'atə hyo ɓwanya təkəra ənda a gwazhilakə da tsahi wa? A da təkər ngə ya ɓwanya wa. Mi nga katə tsahi da la'a hya ngabiya səngə ba'a sakana? Ɗufwa hi ɗatə ɓaɓal ya?

¹⁸Li ku kəra hi, a da hyo la'a sə ma? Himi dza kəra hi a da hyo ngatə ndər wa ya? A tsə'u hyo ɗənghatə ma?

¹⁹Aku bəji nda ya pəpasəu hi gwazhilakə takwara tufu nə nji dəbu tufu ya, tsəla yiɗawa hya tsəmtə sənda həyadza?” Ngə nda nar nyi, “Tsəla kwabəmətləu.”

²⁰“Bəji nda ya pəpasəu takwara məɗəfə nə nji dəbu fwaɗə ya, tsəla wawa'a yiɗawa nda hya tsəmtə chaɓə na sənda həyadza?” Ngə nda nar nyi, “Tsəla məɗəfa.”

²¹Yesu tə nar nda, “A hi ta ngabiya nganə ja ba'aka sakanə wa?”

²²Ahir nga Yesu ka shawa nyi tə shili ku mələm Betsaida, ngə alenya nji tə shili na vanya ndər wuləfə ga gədi Yesu ka cha tsəka nyi cha mbandə nyi.

²³Cha gəzəya cha ndər wuləfə nda ga təra nacha biyahir mələm. Ngə cha təfəu tuli gu lya ndə nda, cha tsəkar lya ndə nda ga jau nyi, “Kwa la'a kə sə ya?”

²⁴Ngə ndə nda ndzamar sə ga na, “Ah, kwa la'a ya nji, kəl nda wi wu ingə kwa ma'i.”

²⁵Ngə Yesu tə ɓəla tsəkar lya ndə nda səkəu. Ngə ndə nda dədəngbiya lya cha, cha mbə ga ghəya la'a sə charasəu.

²⁶Yesu tə nar nyi nə ndə nda, “Sakanə ja, ko nau təra kyo ki, kəl nda ngwa ka da nəu tahə ta mələm wa.”

²⁷Ngə Yesu ka shawa nyi tə təra go giwa inda dzər mələm Kaisariya Filibi. Tsə'u nda ku huɗa ma'i, ngə cha jau shawa nyi, “Par ɗa ma, wa njo na naya?”

²⁸Ngə nda wum ga na, “Alenya nji kwa na Yohana ndər mər baɓtisma, alenya nji kwa na Iliya, alenya nji tsəu kwa na ənda zhang ku huɗa njir mətakər.”

²⁹Ngə cha jau nda, “Nahi nəkə hi ya, wa hyo na naya?” Ngə Bitrus tə wum ga na, “Nakə ngə Kəristi.”

³⁰Ngə Yesu tə təɗəhima nda, “Ngwa hya da ba'a par nyi nə madawa ndara wa ya wa.”

³¹Yesu tə ghəya dlədləɓə nə shawa nyi, ənda tuku Zər Ndə kwa sa ɓwaɓwatə pampaməu gagaɗa, njirawawa'a mələm, wawa'ar fərist ana ka maləm gadlagadla Musa kwa ngya nyi. Njo tsəya nyi, ahir hanyi makər cho hya'atə səkəu.

³²Cha dəkəbiya nda səngə bwabwa'a. Ngə Bitrus tə təɗənda nyi ga guhi nyi cha ngyar pə chul ɓwanya nga.

³³Kəl ja, Yesu tə sha ga ndzamar shawa nyi, ngə cha tsə Bitrus ga na, “Ɓəl hiɗa Shantan. Aka jigadəma nghə nə ndəkur nga, a da nə Hyel wa.”

³⁴Kəl ngə cha nga dlama nji ba'a shawa nyi shili da cha ga nar nda, “Dəhə ndə nda kwa i nəu ɗa, tuku ngə cha ngyar kərnyi, cha hətə taməngəla nyi cha nəu ɗa.

³⁵Dəhə ndə nda kwa i cha mbəɗandə pya cha cho tar pi nda ba'anawa. Kəl ja, dəhə ndə nda tar pya cha aka ya, ana Mafakə Mənakəu, cho uya pi nda ba'anawa.

³⁶Mi zhar nda ndə kwa uya, macha uya dəhə sər dunəya ga tar pya cha?

³⁷Aa mi sənda ndə kwa nau bəlabiya pya cha na?

³⁸Dəhə ndə nda kwa ngatə kuzhi ɗa ana kuzhir nəu ɓwanya ɗa aku bəjir nji pəla'a ana səpəla'a 'ual'ual na, Zər Ndə kwa da ngatə kuzhi nyi aku bəji nda cho da shili aku səlir Ada nyi tsa'a na Chama Hyel inda karti.”