Read nya huba Luka 10 Bible Online

Luka 10 - nya huba bible

Luka 10

¹Ahir nga, Tlakə tə ɗəmtsə alenya nji məɗəfəkumnyi parnya mətləu.[2] Cha sə nda kərmətlə kər mətləu, kyo dəhə mələm ana mbwa inda kərnyi kwa da ma'i.

²Cha nar nda, “Uhi ɗatə ka məra, ya jan njir mər tlər da ɗang wa. Gədi ma tlakər fa ga cha mbəlatə njir mər tləra ka ga nda mərəya nyi uhi.

³Ma'i ma ja, jan ya sə hi tə wi nguli gam ku pama ularvwa.

⁴Ngwa hya da ba'a hə pərti mada mbəl, ndara ɓiɓi wa, ya ngwa hya da ba'a usar madawa hya ɓə nə ku laku wa.”

⁵“Ma hya gu ki, hya na ‘Piyarɗufəu təkəra ki na.’

⁶Ma cha ɗa ndər piyarɗufəu ku nda, piyarɗufəu kəhi ngya kə'i cha, ma a da wa kwa ɓəl shili dahi.

⁷Hya ngya ku ki nda, hya səma, hya sa dəhə sənda nda nə hi, aka ndər mər tlər a kiti nja kinda nyi wazəba nyi. Ngwa hya da bəla mbwar hanyi kəhi wa.

⁸Dəhə mələm nda hya gwa kwa, ya ngə nda dləutsə hi, hya səm dəhə chul sərsum nda nja shili nə nəhi.

⁹Hya mbandə njir shiləkə inda tangnda, ana hya nar nda, ‘Təlkur Hyel shili tə ləhə dzən hi.’

¹⁰Kəl ja, mələm nda nja ngyar dləu hi kwa, hya biya təkəra laku mələm nda hyo na,

¹¹‘Jan eo tsa nda mada bərbər mələm kəhi nda gəziya ɓiɓi kəea.’ Kəl ja, dəhə ka ənga, hya zəndi, ‘Təlkur Hyel ɗatə ləhəu.’

¹²Yo nar hi a tə bəjir nəuma, njo ndiya ngatə təhuɗə mələm Sodom atsa nda.”

¹³“Sər təhuɗə nakə Korasinu! Sər təhuɗə nakə Betsaida! Macha a mərtə nji səshinshin inə nja mər ku mələm kəhi inə ku mələm Taya ana Sidon, ta'ir ngyar tənda mər səpəla'a nda pəndzə guzhalguzhal ga ngya ku pətsəɗəu.

¹⁴Kəl ja, pəshir nəuma, njo ndiya ngatə təhuɗə mələm Taya ana Sidon ma tsa hi.

¹⁵Nakə tsəu Kafarnahum, ko ɗari njo hətə nghə sha huɗamələm ya? A'a njo tashiya nghə səyo mbwar ngya njikə mambəl.”

¹⁶“Dəhə ndər səhimi da hi, a da ya nda cho səhimi. Ndə nda ngya hi tsəu, naya nda cha ngyari. Dəhə ndə nda ngya ɗa tsəu ndər sə ɗa nda ngyar cha.”

¹⁷Kəl shawa məɗəfəkumnyi parnya mətlə inda tə ɓəl shili ana hirgyaɗi nda na, “Tlakəu, ma'a məlləm kwa həsəli nə ea aka tləm ngha!”

¹⁸Ngə cha ɓəlakə nda, “Ya la'a Shantan tə təɗə hya'atə kya huɗamələm tang wi ngə par kwa nghənghəɗi.

¹⁹Jan ya nə hi tə gyalkur ka ga hya ma'itə ma'i təkəra pwabu ana idah, ya hyo ɗa na gyalkur təkəra dəhə gyalkur sərtakəu, ndər dawa kəhi, a vanya sə da nda kwa nau ɗiya hi pa'a wa.

²⁰Dəhə ka ənga, ngwa hya da mər hirgyaɗi ənda məlləm i kwa həsəli nə hi wa, kəl nda hya mər hirgyaɗi aka tləmən hi tsəfətsəfə nyi kya huɗamələm.”

²¹Aku bəji nda, cha mər hirgyaɗi təwa Shanguɗə Karti, cha na, “A usaku nghə tə ya Ada, Tlakə huɗamələm ana dunəya, aka ka ɗəwanda sə'ino ɗana nə njir dəma ka njir zəndə ga chabiyanyi nə njir tar zəndi wi ngulisha'a. Ada, əngə nga ɗa mənakə nə ngha ka məra.

²²“Ada ɗa tsau ɗa tə dəhə sə ku cha ya. A ndər zəndə da ndara wa ngə zər wa, kəl nda Ada, ya ndər zəndə da ndara wa ngə Ada wa, kəl nda Zər ana dəhə ndə nda cha tabiya ga chabiya nyi.”

²³Ngə cha sha shili kəra shawa nyi inda nanda səkənda ga nar nda, “Njir papa'akur ngə nji'inda la'a sə'inə hya la'a na.

²⁴Yo nar hi, ɗang njir mətakər ka təl inda tə chim ka nda la'a sə'inə hyo la'a na, ya a da nda la'a wa, ana sə'inə hyo ngatə na, ya a da nda ngatə wa.”

²⁵Kəl vanya ndər zəndə gadlagadla Musa tə hya'atə cho dzə nyi, cha na, “Maləm, mi sənda yo mər ka ga ya uya pi nda ba'anawa?”

²⁶Ngə Yesu tə ɓəlakə nyi, “Mi nja tsəfətə ku gadlagadla Musa? Aman ka kəratsənta?”

²⁷Ngə ndə nda wuma, “Ka nyida Hyel Tlakə ngha ana dəhə ɗufwa ka, ana dəhə pya ka, ana dəhə dunama ngha, ana jigadəma ngha, ka nyida təwul nghə tsəu wi kərngha.”

²⁸Ngə Yesu tə nar nyi, a wum təkə tsa'atsa'a, “Mər ənga ko uya pi.”

²⁹Kəl ja, aka maləm nda kwa gwa'a char ənda kwa zəndə cha səu, cha ɓəla jau Yesu, “Wa ngə təwul ɗa?”

³⁰Ngə Yesu tə ɓəlakə nyi ga na, “Vanya ndə da tə hya'atə vu Urshalima cho yi Jariko, ngə njir fa'a laku tə tsatə nyi ga səɗənda nyi dura'a, nda tləndzə nyi mbəlkəu, ga ngya nyi ku pama pi ana tah.

³¹A ɗa vanya fərist da kwa nəu laku nda, nda cha shili la'a ndə nda, cha tlatənyi daladala ga ma'i tanyi.

³²Aku laku nda tsəu vanya ndər Levi da, nacha ma'a cha shili ndzamar ndə nda ga ma'i tanyi təwa vanya laku paməu.

³³Ngə ma'i tə shili na vanya ndər Samariya təwa laku nda, nda cha la'a ndə nda, ngə təhuɗə tə nyandə ɗufwa cha.

³⁴Ngə cha səya dzə nyi, cha pəu mal ana ɓitir anap ga mbanda nyi kəti inda, ngə cha fətə ndə nda tə ya sərshishi nyi ga yi fiya nyi ku ki mihiɓi ga cha shiləkə nyi.

³⁵Vanya zəkə cha nənyi kwaba nə tlakər ki nda ga na, ‘Ndzamar ɗa ndə na, maka tsəya sənda tə ndiya nənna, yo ɓəlandə nghə səngha ma yada sha.’

³⁶“Aku huɗa nji makər ingə ya, wa ngə ko har cho kina ɗa ka təwulnya ndə nda gu cha njir fa'a laku inda?”

³⁷Ndər zəndə gadlagadla Musa nda na, “Ndə nda ngatə təhuɗə nyi nda.” Yesu tə nar nyi, “Ma'i ka ki mər ənga.”

³⁸Yesu ka shawa nyi kwa ma'i, nda shili ku vanya zər mələm, a hinda vanya malakə tə dləutsə nyi go ki nyi, tləm nyi Marta.

³⁹Kwamə nyi da ana tləm nyi Maryamu nda tə ngya cho səhimi da sənda Tlakə kwa dəka.

⁴⁰Kəl ja, jigadəmar Marta tə təra ya təkəra mər sərsuma, ngə cha yi da Yesu ga na, “Tlaka, a da ko ɗəngha ənda kwamə ɗa ngya ɗa na tlər zhangta ɗa ma? Nar nyi cha shili hagwa ɗa chi.”

⁴¹Tlakə tə nar nyi, “Marta, Marta, ko wendə kərnghə ana ɗəngha a təkəra sə ɗanghəu,

⁴²ya sə zhang tanyi ngə njo gwa'a, Maryamu tabiya tə sənda tsa'atsa'a ya a ndə da kwa dləuya tsa cha wa.”