Read nya huba Luka 11 Bible Online

Luka 11 - nya huba bible

Luka 11

¹Vanya pəchi, Yesu kwa pətlənya tə vanya mbwa, nda cha wura ngə zhang ku huɗa shawa nyi inda tə nar nyi, “Tlakəu, dlədləɓar ea, ənda eo pətlənya, tang wi nda Yohana tə dlədləɓar nyi nə shawa nyi.”

²Ngə Yesu tə nar nda, “Ma hyo pətlənya hya na, ‘Ada, tləm nghə karti, təlkur nghə shili,

³Nə ea sərsum ɓupəchi nə ənya.

⁴Farbikər səpəla'a kəea, aka kwa far ea bikər dəhə ndə nda kwa zandə ea səu. Ngwa ka da yi na ea tə mbwar sərmbukə wa.[3]’ ”

⁵Cha nar nda tsəu, “Ma cha ɗa, bazhi da tsa zhang ku pama hi, cha yi dəgə nyavi kəra cha adala vu'i ga nar nyi, ‘Zama, yavəbiya ɗa gwazhilakə makərəu,

⁶jan vanya bazhi ɗa a təkəra ma'i, ngə cha ta'i ku kiɗa sakana, ya a sərsum da tsa ya nda yo nənyi wa.’

⁷“Ngə bazhi nyi nda wum ku ta vi ga na, ‘Ngwa ka da wendə ɗa wa, a haɗənda təya nyavi, a piya taɗa tə ya ka ngulisha'a ɗa, a da ya kwa nau hya'ati ka ya nənghə vanya sə wa.’

⁸Yo nar hi, mada a da cho hya'ati aka ndə nda bazhi nyi wa, cho hya'ati cho nənyi madami sənda cho gwa'a, aka cha mbabiyadzər gədi a kuzhi da wa.

⁹“Yo nar hi, gədi ma njo nə hi, gwa'a ma hyo uya, tsa ma nyavi njo mbəɗiya hi.

¹⁰Aka dəhə ndə nda gədi njo nə nyi, dəhə ndə nda gwa'a cho uya, ya dəhə ndə nda tsa nyavi njo mbəɗiya nyi.

¹¹“Ada manə ngə ku pama hi nda ma zər nyi tə gədi kalfi cho nənyi pwabwa?

¹²Nda cha gədi hihi, cho nənyi idah?

¹³Macha ma'a nahi ngə nji pəla'a kwa zəndə ənda hyo nənyi sə mənakə nə ngulisha'a kəhi ya, abiyakata Adan hi nda kya huɗamələm nda kwa nənyi Shanguɗə Karti nə nji'inda gədi tsa cha ya?”

¹⁴Vanya bəji, Yesu kwa gədlə məlləm nda katə ndə tsa ndəra, nda məlləm nda biya təma ndə nda ghəya na ndəra, ngə dlama nji'inda mər məngəl.

¹⁵Kəl ja, alenya nji tə na, “Ana gyalkur Ba'alzabul[4] təl məlləm ngə cho gədlə məlləm.”

¹⁶Alenya nji tsəu, aka ga nda dzə nyi, nda gwa'a cha char nda vanya sər muniya hya'atə kya huɗamələm.

¹⁷Yesu tsəu zəndəbiyatə sənda ku ɗufwa nda cha nar nda, “Kala təlkur nda təkəbiyadzə təkəra dawa, cho dla. Əngə tanyi tsəu ma ki tə təkəbiyadzə cho dla.

¹⁸Macha Shantan tə təkəbiyadzə kwa mər dawa na kərnyi ya, aman təlkur nyi kwa ɗana taea? Jan hya natə ənda ana gyalkur Ba'alzabul ngə yo gədlə məlləm.

¹⁹Sakan ja ya, macha ana gyalkur Ba'alzabul ngə yo gədlə məlləm, yau, ana mi shawa kəhi kwa gədla? Aka ənga ja, sənda nda kwa məra ɗatə ka sər tla nəuma nə hi.

²⁰Naya tsəu macha ana gyalkur Hyel nə ya kwa gədlə məlləm, təlkur Hyel shili tə da hi ndani.

²¹Ma gyal tə mbabiyadzə mənakə cho ɓəla ki nyi, sər ki nyi kwa ngya ɓəlaɓəlanyi.

²²Ma ndə nda ndiya nyi tə shili ga ndəɗə nyi dunama, cho dləuya balmi inda cho ta'i kari inda, ba'a təkənda sə'inda cha fa'aya.

²³Ndə nda pa'a na'a, ndər dawa ɗa nda. Ya ndə nda pa'a kwa tsəm naya, wiɗənda nda cho wiɗənda.”

²⁴“Ma məlləm tə biya ku kəra ndəu, cho ma'i kyatə mbwa ul'ula cho gwa'a mbwar ɓəlsar. Ma'a ɗa cha tari, cho nar nyi nə kərnyi, ‘Yo ɓəl taɗa yo kiɗa nda ya hya'atə kwa.’

²⁵Ma cha shili həya ki nda tsəkətsəkənyi, ya madami tsəkətsəkə ku nda.

²⁶Kəl cho ɓəla biya ki shili na alenya məlləm məɗəfa, inda ndəɗə nyi na pəla'akur, nda kwa gwa ngya ku nda. Ngyar ndə nda kwa ɗa ɗimi matsa ənda cha ɗaka ɗa.”

²⁷Nda Yesu tə wur na ɓwanya nga, vanya malakə tə har kurakə ku dlama nji ga na, “Ndər papa'akur ngə mala nda yah ngha, nda ka sa 'ua cha.”

²⁸Kəl ja, Yesu tə ɓəlakə nyi, “Ah, kəl ja, papa'akur ndiya tə ɗa təkəra ndə nda tə ngatə ɓwanya Hyel ga mər sənda cho i.”

²⁹Nda dlama nji tə udə tsaka, ngə Yesu tə ghəya na ɓwanya ga na, “Aman chul pəla'akura njir bəji na? Nda kwa gwa'a la'a sər muniya! Kəl ja, a sə da njo char hi matsa ba'adar Yunana ndər mətakər wa.

³⁰Tang wi nda Yunana tə ɗa ka sər muniya nə njir Neneva, əngə tanyi Zər Ndə kwa ɗa nə nawa bəji.

³¹Pəshir nəuma, mala təltəl nə Sheba kwa hya'atə ka njir bəji na cho tlanda nda nəuma, aka cha hya'atə naɗə gagaɗa ga shili da Saloman ka ga cha səhimi da dəma nyi. Ya jan ndə nda ndəɗə Saloman tangna.

³²Pəshir nəuma, njir Neneva kwa hya'atə ka njir bəji na, ya njir Neneva kwa tlanda nyi nəuma nə njir bəji na, aka nda ngyar mər səpəla'a ga tubi ahir nda səhimi da mafakə Yunana. Ya jan ndə nda ndəɗə Yunana tangna.”

³³“A ndə da kwa ngiu hu'u ku təkəsə cho fəu gu ka'u nda cha mbuya na shala wa. A'a, kəl cha hakəya ka ga cha char nyi laku nə njir gwa'a gu ki.

³⁴Li nacha ngə təkəsər dza, macha lyakə mənakəu, dəhə dzakə kwa ɗa na vimbəlmbəla; kəl ja, macha lyakə səwasəwanyi, kəl dəhə dzaka kwa ɗa na kutla.

³⁵Aka əngə ja, ka gəla tsa vimbəlmbəl nda ku kə da ba'a ɗa ka kutla.

³⁶Macha dəhə dzakə nyitə na vimbəlmbəla a kutlə da pa'a wa, cho mbəla wi ngə vicham kwa mbəl təkəra ka.”

³⁷Nda Yesu tə wur na ndəra, vanya ndər Farisi tə nga nyi yo ki nyi ka səm sərsuma, ngə cha təra ga yi ngya ka səma.

³⁸Ndər Farisi nda mər məngəl nda cha la'a Yesu kwa səma ya ana cha chinda cha cha wi nda tsəl nda nə wa.

³⁹Ngə Tlakə tə na, “Nahi njir Farisi, hya kwa chinda dagərya ɗeɗika ka shala, ya ɗufwa hi chaɓə na kamu'a ana paha.

⁴⁰Nji kəkəng! Ada Hyel zhang na mər sənda ku ta ana sənda biya wa ya?

⁴¹Ma hya nənyi sənda tsa hi nə nji ɗaliɗali, dəhə sə kwa ɗa cham nə hi.

⁴²“Kirpəu nahi njir Farisi, hya kwa həbiya nyi zhang ku kumə nə Hyel ku heli səkwar kəhi, ga ngyar nəu jiri ana nyida Hyel. Kwa kina hi mər sə'inga, a da kəl hya ngyar mər alenyi wa.

⁴³“Kirpəu nahi njir Farisi! Hyo i mbwar ngya mənakə ku vi pətlənya ana nja usa hi na səli tə suku.

⁴⁴“Kirpəu nahi! Aka wi hu hi nda nji kwa ma'i tə ya a da nda kwa zəndə wa.”

⁴⁵Zhang ku huɗa maləm gadlagadla tə nar nyi nə Yesu, “Maləm, ma'a naea ngə ko ngəl ma ko pə sə'ina!”

⁴⁶Ngə cha wuma, “Sər təhuɗə nahi ma'a nahi njir zəndə gadlagadla! Hyo həkənyi zəmər sə nə nji nda ha, ya a da hi kwa hagwa nda chi mada kush wa.

⁴⁷“Kirpəu nahi! Hya kwa hərtə hu njir mətakər nə Hyel mənakəu, nji'inda ka jival kəhi tə kuɗənda.

⁴⁸Təwa ənga, a char təhi ənda nahi na kərnəhi dləukərtə na sənda ka jival kəhi tə məra, nda kuɗənda njir mətakər nə Hyel, ngə hya hərtə hu kənda.

⁴⁹Aka ənga, Hyel tə na təwa dəma nyi, ‘Yo sətə njir mətakər ana changhabal i, nda kwa kuɗənda alenyi, nda kwa ɗa məndza'u na alenyi.’

⁵⁰Əja, njo nənyi ɓwaɓwatə nə njir bəji na, aka njir mətakər nə Hyel inda nja kuɗənda, fwatə tə ghəyar dunəya,

⁵¹ghəya təkəra Habila yi tsa'a tə Zakariya nda nja tsəya ku pama dzəgana ana mbwa Karti. Jiri yo nar hi tuku njo nənyi ɓwaɓwatə nə njir nəna bəji!

⁵²“Kirpəu nahi njir zəndə gadlagadla, hyo ka nji tsa nda da zəndəbiya lakur jiri, nahi tə kərnəhi da kwa gwa wa, ya a hyo ngyar nji'inda kwa gwa'a lakur gwa nda gwa wa.”

⁵³Nda Yesu tə ngyar mbwa nda, ka maləm gadlagadla ana njir Farisi inda ghəya pə ɓwanya təkəra cha, nda kwa ngəl nyi, nda kwa jau sə ɗang tsa cha,

⁵⁴nda kwa gwa'a nda ngəya nyi ləbam nda gwa'atə cha dəkə sənda pa'ada tsa'atsa'a.