Read nya huba Luka 12 Bible Online

Luka 12 - nya huba bible

Luka 12

¹Nda dlama nji ɗang tə tsəmtədzə nda kwa dərɓə ma'a dərɓə kərnənda, tangərma Yesu tə ghəya na ndər na shawa nyi, cha na, “Gəla ma na tləlam njir Farisi, nacha ngə dəmənkur.

²A vanya səda nja mbuya nda pa'a njo mbəɗənda wa, ya a sə da tə ɗəwa nda pa'a do chabiyadzə wa.

³Aka əngə ja, dəhə sənda nja pə ku kutla njo ngatə nyi tə vimbəlmbəla, madami nja pə chihəchihə tə ɗəwa ku vi tsəu njo bəzəya kya nya məa.”

⁴“Yo nar hi ka bazhi ɗa, ngwa hya da ləvər nji'inda kwa nau tsəya kumər dza, ya sə da nda kwa nau mərtə matsa ngə wa.

⁵Yo char hi ndə nda hyo kina ləvəra; ləvər ma Hyel, nda ahir cha tsəya, gyalkur da tsa cha nda cho bəzəu gu hu'u. Dləukər ma səngə ya dəkə na, nacha ngə ndə nda tə ɗa tuku hya ləvər nyi!”

⁶“A kwa ɗəlnda nji kwambirata tufu təkəra kwaba mətlə ma? Dəhə ka ənga a Hyel da kwa far na mada zhang kənda wa.

⁷Ma'a shishir kəra hi a jigabiya tə nji. Aka ənga ngwa hya da ləvər wa, səli kəhi ndiya tə nə kwambirata ɗanghəu!”

⁸“Yo nar hi, madawa tə char ənda a dləutsə ɗa tə cha biyamar nji, Zər Ndə kwa da char ənda a dləutsə nyi tə cha biyamar chama Hyel i.

⁹Ndə nda tə kəpal zəndə ɗa tsəu biyamar nji, naya tsəu yo da kəpal zəndə nyi biyamar chama Hyel i.

¹⁰“Dəhə ndə nda tə pə ɓwanya ɗimi təkəra Zər Ndə nja kwa farbikə nyi, kəl ja, ndə nda tə pə ɓwanya ɗimi təkəra Shanguɗə Karti a da nja kwa farbikə nyi pa'a wa.

¹¹“Ma nja yi nahi mar vi pətlənya ndara biyamar nji təltəl ka njirawawa'a, ngwa hya ɗəngha təkəra nda aman hyo həbiya kərnəhi ana nda mi sənda hyo pə wa.

¹²Aka Shanguɗə Karti kwa dlədləɓar hi sənda hyo pə aku ndawa bəji.”

¹³Ngə vanya ndə ku pama dlama nji'inda nar nyi nə Yesu, “Maləm, nar nyi nə zamə ɗa cha na'a ba na'ana sər fa'aki.”

¹⁴Yesu tə wum nənyi, “Zaah, wa fiya ɗa ka ndər nəuma ndara ndər təkə sər fa'aki kəhya?”

¹⁵Ngə cha tsakətə ɓwanya na nji ga na, “Gəla ma, hya ɗa naɗə tsa huɓərsəu mada chul mani, aka a da ɗangkura sənda ndə tə tsəmtə ngə pi wa.”

¹⁶Cha mərtə nda ba'ada ga na, “Vanya ndər gəna da ɗaka ɗa, fa nyi tə mər sakəda gagaɗa.

¹⁷Cha ghəya na jigadəma ku ɗufwa cha cha na, ‘A mbwar fiya sə zwazwa nə da tsa ya wa. Aman ngə yo ɗa nganə ja?’

¹⁸“Ngə cha nar nyi nə kərnyi, ‘Yau! A zəndətə ya sənda yo məra. Yo huhuɓənda val ina ba'a həriya wawa'anyi yo pəu dəhə sənda ya uya ku fa ɗa ana dəhə sənda tsa ya kwa.

¹⁹Yo nar nyi nə kərɗa, “Sərsum da tsa ka 'ualəu nda ko səmə nə fa ɗang gagaɗa. Ɓəliya sar, ka səma, ka sa, ka ngatə məsəɗakəkur ngha.” ’

²⁰“Kəl ja, Hyel tə nar nyi, ‘Ndə kəkəng! Əvu'i nə ko tah. Wa ngo fa'atə dəhə sə'inə ka tsəmtə nyi nə kərnghə nə ja?’ ”

²¹Yesu tə udiya ɓwanya ngə ga na, “Əngə tanyi sənda kwa ɗa na dəhə ndə nda tsəmtə nyi gəna nə kərnyi, ya a səda tsa cha mar Hyel wa.”

²²Kəl Yesu tə nar nyi nə shawa nyi, “Aka əngə yo nar hi, ngwa hya da ɗəngha təkəra ngya kəhi, sərsum nda hyo səma, ndara dza hi ana dzaki nda hyo pəndzə wa.

²³Aka pi ndiya tə sərsuma, dzə tsəu ndiya tə dzaki.

²⁴Kwa la'a hi salakə ina? A nda kwa tləka wa, ya a nda kwa mər wa, a məɗəwa ndara val da tsa nda wa, dəhə ka ənga Hyel kwa nə nda sərsuma. Ya a ndiya təhi eakəu na səli zhaka ɗang tanyi.

²⁵Wa ku pama hi, nda aka ɗəngha, kwa nau təɗar pya cha nə mada saka zhang nə kərnya?

²⁶Yau, macha a da hyo nau mərtə mada zər sə kushu wi nə wa ya, aka mi hyo ɗəngha təkəra alenya?

²⁷“Ndzam ma ənda mambəl kwa həa kwa takəu. A nda kwa mər tlər ndara nda mbəndzənyi dzaki nə kərnənda wa, kəl ja, yo nar hi, mada təl Saloman ana dəhə səli nyi, a da ta pəndzə dzaki gumaguma wi nə zhang ku huɗa nda wa.

²⁸Na hi njir kushir jiri, macha Hyel kwa pəndzə nyi dzaki gumaguma nə ma jigwal, nanda nda tangnə ənya, əzəkə nginda tənji ya, abiyakata nahi ya?”

²⁹Ngwa hya da ɗəngha təkəra sənda hyo səma ndara sənda hyo sa wa, ngwa hya da ba'a ɗəngha ma'a pa'a wa.

³⁰Aka njir dunəya inda pa'a kwa zəndə Hyel kwa gwa'a dəhə sə'inga. Ya Adan hi zəndətə ənda kwa i hi sə'inga.

³¹Kəl ja, hya gwa'a təlkur nyi, dəhə alenya sə'ingə cho nə hi.

³²“Əngwa hya da ləvər nahi kushir ɓəla wa, Aka Adan hi kwa i cha cha nə hi təlkur nyi.

³³Ɗəlnda ma dəhə sənda tsahi, hya nənyi nə njir ɗali. Hya uya nyi pərti nda pa'a kwa hala nə kərnəhi, gəna nda pa'a da kwa wura kya huɗamələm, mbwa nda a ndər həl da kwa həlbiya wa, ya a favə da kwa tsəɗiya wa.

³⁴Aka mbwa nda gəna ndə ti, tangnda ɗufwa cha tsəu.

³⁵“Ngya ma na mbadza ana təkəsə kəhi gəɗəgəɗə nyi.

³⁶Hya ngya wi mavi'i inda kwa səkə tlakən nda kwa ɓəla shili hya'atə tə vir ladər nə gha mala. Ma cha shili tsa nyavi kəra nda, nda kusa mbəɗiya nyi.

³⁷Cho ɗa ka sər hirgyaɗi nə mavi'i inda, ma tlakən nda tə shili həya nda a da nda kwa njihanyi wa. Jiri yo nar hi, cho mbabiya sara cha ka cha nə nda sərsuma, cho nar nda nda uya mbwar ngya, cho nənda sərsum təkərnyi.

³⁸Njir papa'akur ngə mavi'i inda macha ɓəl shili, mada adala vu'i ndara a ba mbudla cho həya nda nda kwa səka.

³⁹Kəl ja, hya zəndi, macha tlakər ki kwa zəndə sakanda ndər həl kwa shili ti, a da cho ngyar ndər həl gu ki nyi wa.

⁴⁰Aka əngə ja, nahi tsəu hya ɓatlətə kərnəhi, aka Zər Ndə kwa shili tə bəji nda pa'a kəra hya har ti.”

⁴¹Bitrus tə na, “Tlaka, anə ea ngə ka mər ba'ada ngə zəma aa anə madawa?”

⁴²Ngə Tlakə tə ɓəlakə nyi, “Wa ngə mava jiri nda na dəma? Nacha ngə ndə nda tlakə nyi tə fəkənyi təkəra alenya mavi'i nda ku ki nyi, aka ga cha nə nda kwaba sərsum ku bəji tsa'atsa'a.

⁴³Ndər papa'akur ngə mava nga ma tlakə nyi tə shili həya nyi cho mər tlər nyi.

⁴⁴Jiri yo nar hi, tlakər mava ngə kwa shili fəkənyi təkəra dəhə sənyi nda da.

⁴⁵Kəl ja, ma mava nda na ku ɗufwa cha, ‘Jan tlakə ɗa tsəu shonghəu,’ ngə cha go dəgə bazhi mər tlər nyi, mahi'i ka shili, cha go səma cho sa sə sasa cho wi.

⁴⁶Kəl tlakər mava nda kwa ɓəla shili tə pəchi nda pa'a kəra cha hari ana a tə sakanda pa'a cha kwa zəndi. Cha kwa shili tsətsaunda nyi, kwa nənda mbaɗə zhang ka nji kəla nəu Hyel.”

⁴⁷“Mava nda kwa zəndə sənda tlakə nyi kwa i cha məra, ya cha ngyar məra, ya a nacha mər sənda njo i wa, njo dəgənyi gagaɗa.

⁴⁸Mava nda a da zəndə sənda tlakə nyi kwa i cha mər tsəu wa, ya cha mərtə sər dəga, njo dəgənyi kushiu. Ma ndə nda nja nənyi sə 'ualəu njo gwa'a sə 'ual tsa cha.”

⁴⁹“Hu'u ngə ya shili nə tə dunəya, chim ɗa gəɗiya tə nji sakana.

⁵⁰Vanya baɓtisma da njo mərtə ɗa, a wendə tə ɗufəu ya kəl ma sənga ɗa.

⁵¹Hyo har ya piyarɗufəu ngə ya shili nə tə dunəya ya? Laku da wa! Yo nar hi, ya shili ka ga ya təkəbiya pama nji.

⁵²A biyama, aku ki zhang, nji tufu kwa təkəbiya dzaɗə mətləu, nji makər kwa mər dawa ana nji mətləu, nji mətlə tsəu kwa mər dawa na nji makərəu.

⁵³Ada kwa mər dawa na zər nyi, zər tsəu kwa mər dawa na ada nyi. Ama kwa mər dawa na kwa nyi, kwapəlyakə tsəu kwa mər dawa na ama nyi. Amanya sal kwa mər dawa na mala zər nyi, mala zər tsəu kwa mər dawa na amanya sal nyi.”

⁵⁴Yesu tə ɓəla nar nyi nə dlama nji, “Ma hya la'a ləmbəkə tə ha təwa təɗər pəchi[5] təma hyo na, njo mər par, ya njo məra.

⁵⁵Ma hya ngatə gyang kwa fi təwa holma, hyo na njo mər vitəkwa, ya njo məra.

⁵⁶Nji dəmən! Kwa ngabiya hi ba'adar sənda huɗamələm ana hə'i kwa cha, ma ngə a da hyo nau ngabiya bəji nə nji kwa nə wa?”

⁵⁷“Mya gwa'atə a da hyo nau dəkətə nyi sə tsa'atsa'a nə kərnəhi wa?

⁵⁸Ma vanya ndə tə yi nakə ku vi nəuma, ka gwa'a hya ɓatliya tsəu hi ku laku. Maka ngyar cha təra nakə a ya mar ndər tla nəuma, ndər tla nəuma tsəu cho nənghə nyi nə ləvaləva. Ləvaləva tsəu cho fəu nghə gu jarum.

⁵⁹Yo nar ngha, a da ko biya kunda wa, kəl ka kinda dəhə sənda nja tlanda ngha a mada kwaba da kwa həyadzə wa.”