Read nya huba Luka 13 Bible Online

Luka 13 - nya huba bible

Luka 13

¹Aku bəji nda, alenya nji tə nar nyi sə nə Yesu təkəra alenya njir Galili inda Bilatus tə na nja kuɗənda aku bəji nda nda kwa hatəmachi nə Hyel kənda.

²Yesu tə wum nənda, “Aka nja kuɗənda nji ingə əngə ya, hyo la'a wi nanda nga ndəɗə na mər səpəla'a ku huɗa njir Galili ya?

³A da wa! Yo nar hi, pa'a hya ngyar mər səpəla'a wa, dəhə hyo kuɗə wi ngə nda kuɗə nga.

⁴Aa hyo la'a wi nji kwabəchisəu inda vi tə dla kəra nda ga kuɗənda nda hi Siləwam inda nga ndəɗə na mər səpəla'a vu Urshalima ya?

⁵A da wa! Yo nar hi, pa'a hya ngyar mər səpəla'a wa hyo kuɗə tang wi nga.”

⁶Ngə Yesu tə nənda ba'ada ga na, “Vanya ndə da ɗaka ɗa, cha chiya wur kanda ku fa anap nyi. Ngə cha shili ka cha tlaɗiya yayar wu nda, kəl ja, a nacha uya mada zhang wa.

⁷Ngə cha nar nyi nə ndər mər tlər fa nda, ‘Fa makərkunyi nə nda yo shili gwa'a yayar kanda na, ya a sə da ya ta uya wa. Gəganda! Ka mi cho sanya mbwa ɓwa'atanya?’

⁸“Kəl ja, ndər mər tlər nda na, ‘Tlakəu, ngya nyi nji, yo ndzənda dza cha, ba'a pəndzə nyi kuɓa aku fa na.

⁹Ma'a ɗa cha ya, yau, ma'a ɗa a cha ya wa, ba'a gəganda.’ ”

¹⁰Vanya pəchi nda Yesu kwa dlədləɓə nə nji aku vi pətlənya Pəchir Ngyaməngya,

¹¹kəl janə vanya malakə nda Sərtakə tə mbiya na shiləka, fa kwabəchisəu atə uzhi cho ma'i, a cha kwa nau hya'abiya kərnyi tirap wa.

¹²Nda Yesu tə la'a nyi, cha nga nyi ga na, “Malakəu, a mbəɗandə nghə tənji tsa tar yiyingkur ngha.”

¹³Kəl cha fəkər cha cha təkəra mala nda, təma cha hya'abiya kərnyi, ga fal Hyel.

¹⁴Ngə ndəradəgal nə vi pətlənya nda mər huɗətla, aka Yesu tə mbandə mala nda tə Pəchir Ngyaməngya. Ngə cha na nə nji'inda tangnda, “Hanyi da i kwah, nda njo kina mər tləra, hya shili ku hanyi inga nja mbandə hi, a da pəshir ngyaməngya wa.”

¹⁵Kəl ja, Tlakə tə nar nyi, “Nji dəmən! A madawa ku pama hi da kwa pələya tla ndara kwara nyi cha yi na cha tə mbwar sa ɓiti pəshir ngyaməngya wa ya?

¹⁶Mala na, kwar jul Ibrahim nda Shantan tə mbiya, ənya fa kwabəchisəu. A da ɗa tsa'atsa'a nja mbəɗandə nyi pəshir ngyaməngya ma?”

¹⁷Ɓwanya ngə cha pə nga, a fəu dəhə njir ngya nyi ku kuzhi. Alenya nji dəhə tsəu tə mər hirgyaɗi aka dəhə sər məngəl inda cha məra.

¹⁸Ngə Yesu tə na, “Pabiya da mi təlkur Hyella? Ana mi ngə yo məməlandə nya?

¹⁹Təlkur Hyel pabiya da məlar mustad cha, nda ndəɗə na kush ku huɗa dəhə miya wua, nda vanya nda hətə ga tləkəya ku fa nyi, a həa, ga sha ka wua, eakə tə shili latə ki kənda tə cha wu nda.”

²⁰Yesu tə ɓəla jawa, “Ana mi ya kwa məməla təlkur Hyella?

²¹Pabiya da tləlam, nda vanya malakə tə zəkutə upə 'ual ni, ngə dəhə upə nda tə bu gagaɗa.”

²²Nda Yesu tə hya'atə ka cho təra yi Urshalima, ngə cha tahəya mələm wawa'a ka shiɗəɗənyi cho dlədləɓə nə nji.

²³Ngə vanya ndə tə jau nyi, “Tlakəu, abəra nji yiɗau tanyi ngo uya mbəɗa?” Yesu tə nar nda,

²⁴“Mbabiya ma dzə hya gwa təwa nyavi kiratləu, aka nji ɗang kwa gwa'a gwa ya a da nda kwa nau wa.

²⁵Ma tlakər ki tə wur hya'atə ga haɗənda nyaki, nahi tsəu hyo shili ta'i nya nyaki, hyo tsa nyaki hyo gədi, ‘Tlakəu, mbəɗiya ea nyaki!’ Nacha tsəu cho wum nə hi, ‘A da yo zəndə hi ndara mbwa nda hya hya'atə tə wa!’

²⁶Kəl hyo na, ‘Mi, na ea nda səm ga sa kə'i ka, ka dlədləɓə ma'a sə nə nji ku mələm kəea.’

²⁷Kəl cho na, ‘A ya zəndə mbwa nda biya hi tə wa, təgwa ma dzə ɗa njir mər səɗimi!’

²⁸Ma hya da la'a Ibrahim, Ishaku, Jakop ana dəhə njir mətakər ku təlkur Hyel, daɓə njo gədlə hi, bəji nda ngə nja kwa tiwi ana ɗəhir.

²⁹Nji kwa shili təwa zədər pəchi ana təɗər pəchi, vwa ana holma, nda kwa shili ngya ka mər ladər təlkur Hyel.

³⁰Vəlvəl alenya nji batəbatə da nda kwa ɗa ka nji tangərma, nji tangərma tsəu kwa ɗa ka nji batəbata.”

³¹Aku bəji nda, alenya njir Farisi tə shili da Yesu ga nar nyi, “Bəliya ka ngyar mbwa na, aka Hiridus kwa gwa'a nghə ka tsa.”

³²Ngə cha nar nda, “Ma'i ma hya yi nar nyi nə gakə nga, ‘Yo gədlə məlləm ana mbandə njir shiləkə ənya ana əzəkəu, fərpəchinghə zəkə ngə yo wurandə tlər ɗa.’

³³Dəhə ka ənga, tuku ngə yo təra biyama na ma'i ənya ana zəkə ba'a fərpəchinghə zəkəu. Aka a da ɗa ndər mətakər Hyel kwa tah, macha a da vu Urshalima nja kwa tsəya nyi wa.

³⁴“Njir Urshalima, njir Urshalima! Hya dlənda njir mətakər ga vəvakənda nji'inda Hyel tə sə na hangu! Zhaka yiɗawa ya gwa'a ya gapətə hi wi ngə təga kwa tsəməu nguli nyi gu babəka cha, ya a da hya i wa!

³⁵Jan nja ngya hi tə na ki kəhi a ndə da kwa wa! Jan yo nar hi, a tsə'u hyo tsakətə la'a ɗa wa, kəl sakanda hya na, ‘Ndər papa'akur ngə ndə ngə kwa shili ku tləmər Tlakə nga!’ ”