Read nya huba Luka 15 Bible Online

Luka 15 - nya huba bible

Luka 15

¹Njir tsəm tsachi ka “njir mər səpəla'a,” kwa maka shili ka nda səhimi da Yesu.

²Ngə njir Farisi ana maləm gadlagadla ghəya jiganya, “Ndə na shandə kərnyi ka bazhinya njir mər səpəla'a, cho səm ma'a sersum ka nda.”

³Ngə Yesu tə nə nda ba'ada ga na.

⁴“Ma cha ɗa, kətəng da gharəu tsa zhang ku pama hi, ngə zhang tə satanyi, a da cho ngyar dləkumənyi parnya dlə inda tə vir ɓəla, cho təra ki gwa'a nda sa nda ma?

⁵Macha uya nyi, cho mər hirgyaɗi, cho hətə nyi tə wulya cha,

⁶cho yi na cha yo ki. Kəl cho nga bazhi nyi ka təwul nyi cho nar nda, ‘Vala ɗa ma na hirgyaɗi, aka a uya təya kətəng ɗa nda sa nda!’

⁷Yo nar hi, əngə tanyi njo mər hirgyaɗi kya huɗamələm təkəra ndər mər səpəla'a zhang nda tubi, ndiya matsa njir mər sə tsa'atsa'a dləkumənyi parnya dlə inda pa'a da kwa gwa'a tubi.

⁸“Ma cha ɗa, malakə da na kwaba ndzə kuma, ngə zhang tə sa, a da cho ngiu hu'u ku təkəsə cho tsəkəbiya ki nyi, cho gwa'a kwaba nda kəl cha uya ma?

⁹Macha uya, kəl cho nga bazhi nyi ka təwul nyi cho nar nda, ‘Vala ɗa ma na hirgyaɗi, aka a uya təya kwaba ɗa nda sa nda!’

¹⁰Əngə tanyi kwa ɗa ka sər hirgyaɗi nə chama Hyel i'i, ma mada ndə zhang tə tubi.”

¹¹Kəl Yesu tə na, “Vanya ndə da haaɗa, ana nguli shili nyi mətləu.

¹²Kushnyi nda nar nyi nə adan nda, ‘Ada, na'a ba na'ana sər fa'aki sakana.’ Kəl ngə adan nda təkəya nda gəna nyi.

¹³“Ahir hanyi yiɗau, zər kushə nda tə tsəmtə dəhə ba sənda nənyi ga ngyar ki. Cha təra kyo vanya mələm naɗəu. A hinda cha kikilnda kwaba nyi aku gyangkur.

¹⁴Nda cha tsəya dəhə sənda tsa cha, kəl vanya huɓa tə tlə ku mələm nda, nacha tsəu cha gwa ku ɗali.

¹⁵Ngə cha yi da vanya ndər mələm nda ka cha gwa'a tləra, kəl ndə nda mbəlatə nyi yatə vir ɓəla dagəla nyi ka cha yi ɓəla.

¹⁶Cha gwa'a ma'a sərsum dagəla inda ka cha səma, kəl ja, a ndə da nənyi wa.

¹⁷“Ahir nda cha shili ku jigadəma kərnyi, kəl cha na, ‘Kara! Dəhə mavi'i ada ɗa kwa la'a sərsum wi hə'i, jan ya kwa tə na huɓə tangna!

¹⁸Yo hya'ati, yo ɓəl yada ada ɗa yo yi na, Ada, a mər təya səpəla'a a huɗə Hyel, ya a mərtə nghə təya səpəla'a tsəu.

¹⁹A tsə'u ya kwa ki nja nga ɗa zər nghə wa. Shandə ɗa ya ɗa ka zhang ku huɗa njir mər tlər nə ngha.’

²⁰Kəl ngə cha hya'ati ga gəzəya lakur yada ada nyi. “Tsəu cha naɗəu, ada nyi tə ngabiya ənda nacha nga. Ɗufwa ada nyi tə nyi na təhuɗəu, cha hya'atə na hwi ga yi gəziya zər nyi cho gaɓə nyi.

²¹“Zər nda na, ‘Ada, a mər təya səpəla'a huɗə Hyel, ya a mərtə nghə təya səpəla'a tsəu. A tsə'u ya kwa ki nja nga ɗa zər nghə wa.’

²²“Kəl ja, ada nyi tə nar nyi nə mavi'i nyi, ‘Kusa ma! Hya shili na ləkutə nda ndiya na mənakəu hya handzə nyi. Hya hatə nyi tsəshiu, hya hau nyi ɓiɓi,

²³nja shili na daləu nda ngətləngətlənyi, nja tlakər wulya, mən ɗəa, mən mər hirgyaɗi.

²⁴Aka zər ɗa na, a tətə cha haaɗa, kəl ja, jan cha shili tə na pi, a satə cha haaɗa, jan ya uya nyi ti.’ Ngə nda mər hirgyaɗi gagaɗa.

²⁵“Aku bəji nda, zər nyi nda dəgal nda kwa takəu cho ɓəl shi. Nda cha ɗa ləhə dza ki, kəl cha ngatə njo tsa dang, njo utsa.

²⁶Ngə cha nga vanya mava ki nda ga jau nyi nda mi ngo ɗa.

²⁷Mava nda na, ‘Mishikər nghə na ɓəla shili, nacha ngə ada ngha na nja tsəya daləu ngətləngətlə nda, aka zamə nghə ɓəltə shili yiyinghəu.’

²⁸“Kəl ja, zər dəgal nda mər huɗətla gagaɗa, ga ngyar gu ta ki. Ada nyi tə zəbiya ndər nacha, ga gədi nyi cha təra gwa.

²⁹Ngə cha wum nə ada nyi ga na, ‘Ndzama, dəhə fa ina, yo mər tlər nənghə wi mava, a naya ta ngyar nəu tsaubar nghə wa. Dəhə ka ənga, a nakə ta na'a mada zər kua nda yo nga ka bazhi ɗa, ea tsəya ka ea ɗə wa!

³⁰Kəl nda zər nghə nda ki kikilnda kwaba nghə təkəra mahi'i tə ɓəl shili, ka tsəya nyi daləu ngətləngətla.’

³¹“Ngə ada nyi tə nar nyi, ‘Zər ɗa, tangnə ma nakə wa'atanyi, dəhə sənda tsa ya nənghə nda.

³²Kwa ki na mən mər ladər məna mər hirgyaɗi aka zamə nghə nə haaɗa cha tah, jan cha ɓəltə shili na pi, haaɗa a satə cha, jan nja uya nyi tə sakana.’ ”