Read nya huba Luka 18 Bible Online

Luka 18 - nya huba bible

Luka 18

¹Kəl Yesu tə nənyi ba'ada nə shawa nyi ga cha dlədləɓətə nda ənda nda kwa kina pətlənya wa'atanyi ngwa nda da ba'a həɗa wa.

²Cha na, “Aku vanya mələm, ndər nəuma da, a da cha kwa ləvər Hyel wa, ya a da cha kwa la'a alenya nji wi sə wa.

³Aku mələm nda tsəu vanya malafi da, cho maka shili da ndər nəuma nda cho gədi nyi cho na, ‘Vala ɗa ka mər sənda jiri ku pama ea na ndər dawa ɗa.’

⁴Ndə nda ghəya ngyar səhimi da mala nda, a hi cha nda na ku ɗufwa cha, ‘Madangə a da ya kwa ləvər Hyel wa, ya a da ya kwa la'a alenya nji na səli wa,

⁵kəl ja, aka mala nə ɓwagu tə dzaya, yo mbabiyadzə ya la'a a uyatə cha sənda jiri, tsa cha da ba'a həɗandə ɗa na shili nyi ənya əzəkəu!’ ”

⁶Ngə Tlakə tə na, “Ngatə ma sənda ndər nəuma kəla jiri nga na!

⁷A Hyel da kwa char jiri nyi nə nji'inda cha ɗəmtsi, nji'inda kwa tiwi nənyi vu'i na pəchi, dəhə sənda nda gədi nyi ma? Aa cho tsəya dza cha tsa cha da ba'a vala nda ya?

⁸Yo nar hi, cho char nda jiri nyi kuskus ma'a. Kəl ja ya, ma Zər Ndə kwa da ɓəl shili, kwa həya cha jirikur ku dunəya ya?”

⁹Ngə Yesu tə mər ba'ada na nə nji'inda kwa bu kərnənda wi njir mər sə tsa'atsa'a nda, nda kwa həyatə ma'a həyatə alenya nji.

¹⁰Cha na, “Alenya nji mətlə tə gwa ku Mbwa'alə Hyel kanda pətlənya. Zhang ku pama nda ndər Farisi, zhang nda tsəu ndər tsəm tsachi.

¹¹“Ndər Farisi nda hya'atə tə ta'i ga tsaɗəndadza ga ghəya pətlənya cho na, ‘Usaku nghə təya Hyel, aka naya, a da ya wi alenya nji wa, njir həl, njir ɗa nji, njir mər kasali. A da ya mada wi ndər tsəm tsachi nə wa.

¹²Mətlə ku suku yo səmdzən, kwa həbiya ya zhang ku kuma ku dəhə sənda ya uya.’

¹³“Kəl ja, ndər tsəm tsachi nda ta'ita nyi naɗəu, a cha i har huɗəma cha shi wa. Aku huɗətla cho dəgə hatla cha cho na, ‘Ngatə təhuɗə ɗa Hyel, naya ndər mər səpəla'a ya!’ ”

¹⁴Yesu tə na, “Yo nar hi, ndər tsəm tsachi nda tə ɓəl kyo ki tsa'a na Hyel, a da wi ndər Farisi nda wa. Aka dəhə ndə nda tə həkəra kərnyi, njo tashiya nyi, ndə nda tə tashiya kərnyi tsəu njo hətə nyi səli.”

¹⁵Nji kwa shili na ngulisha'a shiɗəɗə nə Yesu ka cha səkənda papa'akur. Nda shawa nyi tə la'a ənga, ngə nda tsə nda.

¹⁶Ngə Yesu tə nga ngulisha'a inda ga na, “Ngyar ma ngulisha'a shiɗəɗə nda shili da ya, ngwa hya da ka nda wa, aka təlkur Hyel nə nji wi ingə nga.

¹⁷Jiri yo nar hi, ma'a ndə da dləutsə təlkur Hyel wi nə zər kushə wa, a da cha kwa uya gwa kwa pa'a wa.”

¹⁸Vanya dəgalər njir Yahuda tə jau Yesu, “Maləm duru, mi sənda yo mər ka ga ya uya pi nda ba'anawa?”

¹⁹Yesu tə jau nyi, “Ka mi ko nga ɗa ndə dura? A ndə dur da wa kəl Hyel zhang tanyi.

²⁰A zəndəbiya təkə sənda gadlagadla tə na, ‘Ngwa tsa ndə wa. Ngwa mər kasalikur wa. Ngwa həl wa. Ngwa pə ɓwanya gəzhi təkəra ndə wa. Ngwa ɗa ndə wa. Ka hətə nyi səli nə ada ngha ana ama ngha.’ ”

²¹Ngə ndə nda na, “A ɓəlatə təya dəhə sə'ingə tsəu ya zər.”

²²Nda Yesu ngatə ənga, cha na, “Sə zhang tanyi ngə tar ka. Ma'i ka ki ɗəlnda dəhə sənda tsa ka, ka nənyi nə njir ɗali, ko uya gəna 'ualəu kya huɗamələm. Ga ka dzəgwa shili nəu ɗa.”

²³Nda cha ngatə ənga, huɗa cha tla gagaɗa, aka ndər gəna cha gagaɗa.

²⁴Ngə Yesu tə ndzamar ndə nda ga na, “Cho ɗa dzau gagaɗə ndər gəna gwa ku təlkur Hyel!

²⁵Vəlvəl, kusə dləgwam kwa tərabiya ku chira libəra, tsa ndər gəna kwa gwa ku təlkur Hyel.”

²⁶Nji'inda ngatə ɓwanya nga jau nyi, “Ya macha əngə ya, wa kwa uya mbəɗə ja?”

²⁷Ngə Yesu tə wum ga na, “Sənda pa'a kwa nau ɗa nə ndəu, kwa nau ɗa nə Hyel.”

²⁸Ngə Bitrus tə na, “Jan ea ngyar tə dəhə sənda tsa ea ga nəu ngha.”

²⁹Yesu tə nar nda, “Jiri yo nar hi, a ndə da kwa ngyar ki nyi, ndara mala, ndara ka zama, ndara njir yah, ndara ngulisha'a aka təlkur Hyel,

³⁰nda pa'a kwa uya sə'ingə zhaka ɗang ənya, bəji ngə zəkə tsəu pi nda ba'anawa wa.”

³¹Ngə Yesu tə nga nda kwabəmətlə inda ga nar nda, “Gwa Urshalima nə mən, a hinda, dəhə sənda njir mətakər nə Hyel tə na təkəra Zər Ndə kwa nyabiyadza.

³²Njo nənyi nyi nə nji'inda pa'a njir Yahuda, nda kwa par nyi sər kuzhi ana ɓwanya həyatəvi, nda kwa izza nyi, nda kwa təfəndzə nyi tuli.

³³Nda kwa dəgə nyi, nda kwa tsəya nyi, kəl ja, cho hya'atə pəshir hanyi makərkunyi.”

³⁴Kəl ja, a shawa inda da ngabiya ɓwanya ngə wa, tə ɗəwandadzə tsa nda, ya a da nda zəndəbiya səngə Yesu tə pə ngə wa.

³⁵Nda Yesu tə shili ləhə dza Jariko, kəl jan vanya ndər wuləfəu tə ngya anya laku cho gədi.

³⁶Nda cha ngatə dlama nji kwa tərabiya, ngə cha jau ndara mi sənda kwa ma'i.

³⁷Nda nar nyi, “Yesu ndər Nazarat ngə kwa tərabiya.”

³⁸Ngə cha har kurakə ga na, “Yesu! Zər Dauda! Ngatə təhuɗə ɗa!”

³⁹Nji'inda biyama tə tsə nyi ənda cha bəgə ɗiyu. Kəl ja, cha tsakətə har kurakə cho na, “Zər Dauda, ngatə təhuɗə ɗa!”

⁴⁰Ngə Yesu tə ta'i, ga na nja shili na cha. Nda cha shili ləhəu, Yesu tə jau nyi,

⁴¹“Mi sənda ko i ya mərtə ngha?” Ngə ndər wuləfə nda na, “Tlakəu, yo i ya la'a səu.”

⁴²Yesu tə nar nyi, “Yau, sər ka la'a sə ja! Jirikur nghə mbandə nghə ti.”

⁴³Təma cha ghəya la'a səu, ga nəu Yesu, cho fal Hyel. Nda nja la'a sənda ɗa, dəhə nda tə fal Hyel.