Read nya huba Luka 19 Bible Online

Luka 19 - nya huba bible

Luka 19

¹Yesu tə gwa Jariko, cho tərabiya ku ta mələm,

²kəl jan vanya dəgalər njir tsəm tsachi na tləm nyi Zakka, nacha tsəu ndər gəna cha.

³Cha gwa'a ka cha la'a nda wa ngə Yesu, kəl ja, a da cha nau wa aka ndə tashə cha gagaɗa, ya ba'a nji ɗanghəu.

⁴Aka ənga, cha təra biyama na hwi, ga gitanyi gyo vanya wur mbuɗa ka ga cha la'a Yesu, aka təwa ba nda cho shili tərabiya.

⁵Nda Yesu tə həya mbwa nda, kəl cha har kər ga na, “Kusa səya Zakka! Aka ənya, tuku yo ɗa ka mihiɓi ku ki ngha.”

⁶Zakka kusa səya, ga dləutsə nyi na hirgyaɗi.

⁷Nda nja la'a ənga, kəl dəhə nda ghəya na jiganya ga na, “Aku ki ndər mər səpəla'a nə ngə cho mər mihiɓikur!”

⁸Ngə Zakka tə hya'atə tə ta'i ga nar nyi nə Tlakəu, “Ngatə Tlakəu, yo nənyi mar gəna ɗa nə njir ɗali. Dəhə ndə nda ya ɗaka ɗiya tsəu yo ɓəlandənyi sənda ya ɗaka dləutsə zhaka fwaɗəu.”

⁹Ngə Yesu tə nar nyi, “Mbəɗə shilitə ku ki nə ənya, aka nacha ma'a nyandəla Ibrahim cha.

¹⁰Aka Zər Ndə tə shili ka cha gwa'a sənda sa, cha dləuya nyi.”

¹¹Tsə'u tanda kwa səhimi da Yesu, ngə cha tsakətə par nda vanya ba'ada, aka a ɗa təcha ləhə dza Urshalima, nji tsəu kwa la'a wi təlkur Hyel kwa chabiyadzə ɗəɗəu tanyi.

¹²Ngə cha nar nda, “Vanya ndər gəna da haaɗa, cho təra kyo vanya mələm naɗə ka ga nja ki mbanda nyi kər təlkur ga cha ɓəla shili.

¹³Nda cho təra, cha nga mavi'i nyi kuma ga nənyi nə madawa ku pama nda, 'ualkura kwaba nda ndər mər tlər wazəba kwa uya ku hya makərəu ga nar nda, ‘Sha ma fəli ni, kəl ya ɓəla shili.’

¹⁴Ndə nga, njir mələm kənda da kwa i nyi pa'a wa. Aka ənga nda sətə nyi nji ahir cha təra, nda na, ‘A da eo gwa'a ndə nə ɗa ka təl kəea wa.’

¹⁵“Nda nja mbanda nyi kər təlkur nə ndə nda, cha ɓəl kyo ki. Gwakura cha, ngə cha nga mavi'i inda ka ga cha la'a zhar nda nda uya anya kwaba nda cha nənda ka shafəli nda.

¹⁶Ndə tangərma shili ga na, ‘Tlakəu, a sha təya fəli na kwaba nda ka na'a nda, ya uya təya zhar zhaka kuma anya nyacha.’

¹⁷Kəl tlakə nyi tə nar nyi, ‘Yawa nakə mava mənakə ɗa! Aka ka ɗa na jiri təkəra sə kushiu, ya kwa fiya nghə dəgal təkəra mələm kuma.’

¹⁸Mətləkunya mava shili ga na, ‘Tlakəu, a sha təya fəli na kwaba nda ka na'a nda, ga uya zhar zhaka tufu anya nyacha.’

¹⁹Tlakə nyi nda nar nyi nə ndə na, ‘Ko ɗa dəgal təkəra mələm tufu.’

²⁰“Kəl vanyi mava nda tə shili ga na, ‘Tlakəu, janə kwaba nghə nda. Ya baɗəu ku sə ga ɗəwanda.

²¹Ləvəra səya ɗa tsa ka, aka naka ndə dzau ka. Ko hə sənda pa'a ka fiya, ko mərəya sənda pa'a ka tləkəya.’

²²Ngə tlakə nyi tə ɓəlakə nyi, ‘Nakə mava pəla'a! Yo mərtə nghə nəuma təkəra sənda ka dəkə na nya ka. Kwa zəndə kə ənda ndə dzau ya, yo hə sə tə mbwa nda pa'a ya fiya, ana yo mərəya tə mbwa nda pa'a naya tləkəya.

²³Ya macha a zəndəbiya təkə əngə ya, mi sənda katə nghə tsa pəu gəna ɗa ku məɗəwa, tsa'aka ma ya ɓəla shili, yo dləutsə na zhara?’

²⁴“Ngə cha nar nyi nə nji'inda ta'i tangnda, ‘Dləuya ma kwaba ngə tsa cha, hya nənyi nə ndə nga uya zhar zhaka kuma nga.’

²⁵Ngə nda na, ‘Tlakəu, ndə ngə wurtə uya zhar zhaka kuma!’

²⁶Cha wuma, ‘Ya kwa nar hi, dəhə ndə nda na sə njo tsakətə nyi, ndə nda pa'a da na səu, mada sə kushə nda chanə ma'a njo dləuya.

²⁷Njir dawa ɗa ingə tsə'u, nji ingə pa'a kwa i ya səm təlkur təkəra nda nga, shili ma na nda, nja kuɗənda nda a biyama ɗa.’ ”

²⁸Nda Yesu tə wur na pə sə'inga, ngə cha gəzəya lakur yi Urshalima.

²⁹Nda cha yi ləhə dzər mələm inda njo nga Baitafaji ana Baitanya inda ləhə dza dəgəl Zaitun, ngə cha sə mətlə ku huɗa shawa nyi,

³⁰cha nar nda, “Ma'i ma gwa ku zər mələm ngə biyaman hi nga, hyo həya dalnjiɓa nda pa'a nja ta gyatə ya cha tə mba. Hya pəliya, hya shili nə tangna.

³¹Ma kala ndə tə jau hi, ‘Ka mi hyo pəl kwara nga?’ Hya nar nyi, ‘Tlakə ngə kwa gwa'a nyi.’ ”

³²Nji'inda nja sə inda ma'i ga ki la'a dəhə sə tang wi nda Yesu tə nar nda.

³³Aku huɗa pəl dalnjiɓa nda nda, ngə hyanjir kwara nda nar nda, “Mya gwa'atə hyo pəl kwara na?”

³⁴Nda na, “Tlakə ngə kwa gwa'a nyi.”

³⁵Ngə nda shili na dalnjiɓa nda nə Yesu, nda sətə sər tul kənda tə ya cha ga fətə Yesu gyati.

³⁶Nda cha ku huɗa ma'i, kəl nji kwa sə ləkutə kənda ku laku a biyama nyi.

³⁷Nda cha ɗa ləhə dza Urshalima, a dza laku nda kwa təra səya təwa dəgəl Zaitun, kəl dlama shawa nyi ɗanghəu tə mər hirgyaɗi nda kwa fal Hyel ana kurakə dzəgam dzəgaməu, a təkəra dəhə səshinshin inda nda la'a.

³⁸Nda kwa na, “Ndər papa'akur ngə təl nda kwa shili ku tləmər Tlakəu! Piyarɗufəu kya huɗamələm, səli ngya tə nə Hyel!”

³⁹Ngə alenya njir Farisi ku huɗa nji'inda tə nar nyi, “Maləm, tsə shawa nghə inə nda bəgəu!”

⁴⁰Cha wuma, “Mada na nji'inə bəgə ɗiyu, hangu inə kwa ghəya na pə kurakə nda kwa fal ɗa.”

⁴¹Nda cha shili ləhə ga la'a mələm Urshalima, ngə cha tiwi təkəri.

⁴²Cha na, “Cha nda ɗa ɗəm ja, kwa zəndəbiya hi sənda njo gwa'a aka ngya mənakə sakana! Ya jan ɗəwaɗəwanyi tsa hi.

⁴³Bəji kwa shili nda njir dawa kəhi kwa ɓundzənyi hə'i nə ɓangtili kəhi ga nda uya lakur gwa pa hi. Nda kwa ɓandə hi mada təwabari.

⁴⁴Nda kwa səwandə mələm kəhi, nda kwa kuɗənda njikə hi dəhəu. A da nda kwa ngyar hangu hər zhang təkəra vanyi wa. Əngə kwa ɗa aka a da hya ngabiya bəji nda Hyel tə shili ka cha dləuya hi wa.”

⁴⁵Ngə Yesu tə gwa ku babal Mbwa'alə Hyel ga ghəya gədlə njir shafəli,

⁴⁶cho na nənda, “Tsəftsəfənyi, ‘Njo nga ki ɗa ki pətlənya.’ Jan hya shandə ka tləl mbu njir fa'avi!”

⁴⁷Dəhə bəji cho dlədləɓə nə nji ku Mbwa'alə Hyel. Kəl ja, ka wawa'ar fərist, ka maləm gadlagadla, ka njirawawa'a tə gwa'a laku ka nda tsəya nyi.

⁴⁸Kəl ja, a da nda uya lakur tsəya nyi wa, aka ɓwanya nyi gwatə ku ɗufwa madawa, ya a da nda kwa i mada sə zhang tərabiya nda wa.