Read nya huba Luka 2 Bible Online

Luka 2 - nya huba bible

Luka 2

¹Aku hanyi inda, Kaisar Agustus tə fiya gadlagadla ənda njo jiga nji'inda da kiɗa təlkur Roma.

²Nənnə ngə jiga nji nə tangərma nda nja mər ku bəji nda Kiriniyus kwa səm təlkur tə hə'i njir Suriya.

³Kəl ngə dəhə nji tə təra, madawa kyo mələm nyi aka ga nja fəu nyi ku jiga.

⁴Yusufu tsəu tə hya'atə hyo mələm Nazarat tə hə'i Galili ga təra yi Baitalami tə hə'i Yahudiya, mələm təl Dauda, aka nacha nyandəla Dauda cha.

⁵Cha yi nda aka ga nja jigabiya nda nanda na Maryamu nda nda mbandər aka ga nda hədza, ya Maryamu ana huɗə cha tə bəji nda.

⁶Aku bəji nda nda yi nda kəl ɓəlakər yah tə səya nyi,

⁷ngə cha yah zər tangərmanyi, ga baɗəu nyi ku pahuɗə mba zər, ngə cha pinda nyi ku ngaɓa sərshishi, aka nanda uya mbwa ku vi dləu mihiɓi wa.

⁸Atə hə'i nda alenya njir ɓəla sərshishi da kwa hanyi tə babal nda kwa ɓəla sərshishi kənda.

⁹Kəl jan Chama Hyel tə shili təkəra nda, ngə səlir Tlakə tə mbəl kəra nda, ngə ləvər tə səya nda 'ual'ualəu,

¹⁰kəl Chama Hyel nda nar nda, “Ngwa ləvər da səya hi wa, aka ya shili na hi Mafakə Mənakə nda ɗa ka sər hirgyaɗi nə dəhə nji.

¹¹Ənya nənna, aku mələm Dauda, nja yiya hi zər, Ndər Dləuya, Kəristi Tlakəu.

¹²Anə sənda kwa ɗa aka sər ba'ada nə hi, hyo həya nyi, nja baɗəu nyi ku pahuɗə mba zər dizəu tə piya ku ngaɓa sərshishi.”

¹³Kəl jan daɓədzər chama Hyel hya'ati kya huɗamələm, nda chabiyadza ana tangərmar chama nda, nda kwa na miya fal Hyel,

¹⁴“Səli nə Hyel nda kya huɗamələm, atə dunəya tsəu piyarɗufəu cha ɗa tsa'a na nji'inda Hyel kwa mər hirgyaɗi na nda.”

¹⁵Nda chama Hyel inda ɓəl gya huɗamələm, kəl njir ɓəla sərshishi inda tə nar nyi nə kərnənda, “Mən təra yi Baitalami mən ki la'a sənga ɗa Tlakə tə nar mən nga.”

¹⁶Kəl ngə nda təra na kusa, nda yi la'a Maryamu ana Yusufu, nda la'a zərdizə nda tə piya ku ngaɓa sərshishi.

¹⁷Nda njir ɓəla sərshishi inda tə la'a zər nda, ngə nda dəkar dəhə sənda chama Hyel tə na təkəra zər nda.

¹⁸Dəhə nji'inda ngatə sənda njir ɓəla sərshishi inda na, nda mər məngəl na ɓwanya nda njir ɓəla sərshishi tə nar nda.

¹⁹Maryamu tsəu tə gəziya sə'inda dəhə ku ɗufwa cha, cha kwa jigadəma təkəri.

²⁰Njir ɓəla sərshishi inda tsəu nda ɓələu, nda kwa na miya i'i nə fal Hyel, aka dəhə sənda nda ngatə ga la'a, dəhə sə tə ɗa wi nda Chama Hyel tə nar nda.

²¹Nda zər nda hanyi chisəu, nja tlanda nyi bədzang, ngə nja fəndzə nyi Yesu, tləm nda chama Hyel tə na təvi nja hə huɗə nyi nda.

²²Nda bəji tə ɗa Maryamu ana Yusufu tə hətə Yesu yi Urshalima ka nda yi lətə nyi nə Tlakəu, aka ga nda mər sənda gadlagadla Musa tə na nja mər aka chinda dza.

²³Əngə tsəfətsəfə nyi ku gadlagadla Tlakəu, ənda, “Dəhə zər sal tangərma, dzəvədzəvənyi cha nə Tlakəu.”

²⁴Əngə nda nənyi ga'a wi nda gadlagadla Tlakə tə na, mbətla mətləu ma'a da wa mbətla Masar mətləu nja kwa handa təmachi ni.

²⁵Aku bəji nga vanya ndə da na ngya vu Urshalima nda nja kwa nga Simion. Nacha ndər mər sə tsa'atsa'a cha, cho həsəlir Hyel 'ual'ualəu, ya cho səkə bəji nda nja kwa dləuya njir Isra'ila ti. Shanguɗə Karti tsəu tsa'a nacha.

²⁶Shanguɗə Karti tə nar nyi, a da cho tə wa kəl cha la'a Kəristi nda Tlakə kwa səa.

²⁷Shanguɗə kwa maɗənyi cha gwa ku Mbwa'alə Hyel ku bəji nda njir yah Yesu tə shili nacha aka nda mər wi nda gadlagadla tə na nja məra.

²⁸Kəl ngə Simion tə hətə zər nda ku cha cha, ngə cha mərtə nyi usaku nə Hyel ga na,

²⁹“Sakanə ja Tlakəu, ləbiya mava ngha cha təra na piyarɗufəu, wi nda ka na,

³⁰aka lya ya la'atə dləuya ngha,

³¹dləuya nda ka ɓatliya aka nji dəhəu.

³²Nacha ngə vimbəlmbəl nda kwa chabiya nghə nə nji'inda pa'a njir Yahuda, nacha tsəu cha shili na səli nə njir Isra'ila.”

³³Ada nyi ana amanya zər nda tə mər məngəl na sənda Simion tə na təkəra zər nda.

³⁴Simion tə səkə nda papa'akur, cha nar nyi nə Maryamu, “Hyel tə tabiya zər na ka ga cha ɗa ka mətukutlə nə tləhi nə nji ɗanghəu, ana sər hya'atər nji ɗang ku Isra'ila. Cho ɗa ka ba'ada hya'atə tsa Hyel nda nji ɗang kwa ngyari.

³⁵Ana sənda tə ɗəwa ku ɗufwa nda kwa chabiyadza. Səngə tsəu cho tənghə wi katsakər tə dzaviya ɗufwa ka.”

³⁶Vanya mala madiya da, ndər mətakər nə Hyel, tləm nyi Hanatu, kwar Fanuwel ku nyavi Asha. Məɗəfə tanyi cha fa da sal,

³⁷ngə sal nyi tə tah. Aku bəji nga fa nyi chisəkumnyi parnya fwaɗəu. A cho ngyar Mbwa'alə Hyel wa cho həsəli nə Hyel, vu'i na pəchi cho pətlənya ana səmdzən.

³⁸Məlməl na bəji ngə cha gwa ku Mbwa'alə Hyel cho mərtə nyi usaku nə Hyel, ngə cha pə ɓwanya təkəra zər nda nə dəhə nji'inda kwa səkə Hyel cha nənyi məngyar Urshalima.

³⁹Manda Yusufu na Maryamu tə wurandə sənda gadlagadla Tlakə tə na nja məra, ngə nda ɓəl yi Nazarat mələm kənda atə hə'i Galili.

⁴⁰Zər nda tə həa, ga ɗa na dunama, ana dəma, ɗanghali Hyel tsəu tə ɗa tsa'a nacha.

⁴¹Kala va, njir yah Yesu kwa yi Urshalima ka Ladər Dləgəlnda.

⁴²Nda Yesu tə ɗa zər fa kwabəmətləu, ngə nda təra yi mər ladər wi nda nda tsəl ni.

⁴³Nda ladər tə wura, ngə nda gəzəya lakur ɓəl kyo ki, kəl ja, Yesu tə ngyata nyi vu Urshalima ya a da na zəndəkur njir yah nyi wa.

⁴⁴Nanda tsəu nda har ənda ku pama nji cha, aka ənga nda mər ma'i nə ɓupəchi patləu. Ahir nga nda ghəya gwa'a nyi ku pama ka njikə nda ka bazhin nda,

⁴⁵ya a da nda la'a nyi wa, aka ənga nda ɓəl yi Urshalima ka gwa'a nyi.

⁴⁶Ahir hanyi makərəu, nda uya nyi ku Mbwa'alə Hyel ku pama njir zəndi, cho səhimi da nda, cho jau nda.

⁴⁷Dəhə nji'inda ngatə nyi tə mər məngəl na zəndə nyi ana chul wum nda cho wum nə nda.

⁴⁸Njir yah nyi tə mər məngəl nda nda la'a nyi, ngə ama nyi tə nar nyi, “Zər ɗa, aka mi ka mərtə ea əna? Naea na ada ngha ea wi tə vir gwa'a ngha a da ea la'a nghə wa.”

⁴⁹Ngə cha nar nda, “Aka mi hyo gwa'a ɗa? A da hya zəndə a ɗati tsa'atsa'a ya ngya aku ki Ada ɗa ma?”

⁵⁰Kəl ja, a da nda ngabiya ndara mi sənda cha na wa.

⁵¹Ngə cha hya'atə ga nəu nda, nda ɓəl yi Nazarat dəhə nda, cho mər sənda njir yah nyi kwa na, ama nyi tsəu tə gəziya sə'ingə dəhəu ku ɗufwa cha.

⁵²Yesu tə həa ku dza ana dəma, cha uya papa'akur tsa Hyel ana nji tsəu.