Read nya huba Luka 20 Bible Online

Luka 20 - nya huba bible

Luka 20

¹Vanya pəchi Yesu kwa dlədləɓə ana bəzə Mafakə Mənakə nə nji ku Mbwa'alə Hyel, ngə wawa'ar fərist ka maləm gadlagadla ka njirawawa'a tə shili

²ga nar nyi, “Par ea, gyalkur mi ngə tsa ka nə mər sə'ina. Wa ngə tə nənghə gyalkur nga?”

³Yesu tə wum nənda, “Naya tsə'u yo jau hi, hya nar ɗa,

⁴wa ngə tə nənyi gyalkur mər baɓtisma nə Yohana? Hyel zəma ndəu?”

⁵Ngə nda ɓwanya ku pama kərnənda nda kwa na, “Ma məna na Hyel, cho na, ‘Ka mi hya ngar nənyi jira?’

⁶Nganə tsəu, ma məna na ndəu, dlama nji'inə kwa vəvakənda mən na hangu, aka dləukərtə nda ənda Yohana ndər mətakər nə Hyel cha.”

⁷Aka əngə nda nar nyi, “A da ea zəndə mbwa nda cha hya'atə tə wa.”

⁸Yesu tə nar nda, “Naya tsə'u a da ya kwa par hi ndara wanga na'a gyalkur mər sə'inə wa.”

⁹Kəl Yesu tə par nyi ba'ada nə nji, cha na, “Vanya ndə da tə zuya fa anap haaɗa, ga nənyi nə alenya njir zwa təkəra kwaba, ngə cha təra kyatə vanya hə'i naɗəu ga ki hanyar pəchi 'ualəu.

¹⁰Nda bəjir mər anap nda tə ɗa, kəl cha sə mava nyi yada njir mər tlər wazəba nda, ka cha dləutsə nyi nənyi na mbaɗər yayar anap nda. Ngə njir zwa inda dəgə nyi ga ɓəlandə nyi twa'atwa'a chi.

¹¹Ngə ndə nda ɓəla sə vanya mava nyi, ngə njir zwa inda dəgə nyi ga mərtə nyi sər kuzhi ga ɓəlandə nyi twa'atwa'a chi tsəu.

¹²Ba'aka sakana, ndə nda tsakətə sə makərkunya mava nyi, nacha tsəu nda tləndzə nyi mbəlkəu ga vakəbiya nyi biya.

¹³Ngə tlakər fa anap nda na, ‘Mi sənda yo mər ja sakana? Yo sətə zər ɗa nda yo nyida, a kəpal da wa nda kwa yi la'a səli nyi!’

¹⁴Nda nji'inda la'a nyi, nda na nə kərnənda, ‘Yau! Jan ndə nda kwa fa'aki na fa na, mən tsəya nyi ga sər fa'aki nyi ɗa ka nəkəmən!’

¹⁵Ngə nda vakəbiya nyi biya tiya fa nda ga tsəya nyi. “Mi sənda hyo har tlakər fa nda kwa shili mərtə nyi nə njir zwa inda?

¹⁶Cho shili kuɗənda nji'inda ba'a nənyi fa nda nə alenya njir zwa paməu.” Nda nji tə ngatə ənga, ngə nda na, “Hyella kanda sə wi ngə ɗa!”

¹⁷Ngə Yesu tə ndzamar nda ga na, “Mi sənda likatəkatə kwa cha? ‘Hangu nda njir hər tə ngyari, nacha nga ɗa na sakəda!’

¹⁸Madawa tə dla səya tə hangu na, cho ɗa kuchiɗəkuchiɗəu, madawa hangu na təɗə səya kər tsə'u, cho həha'agwa nyi kəɓətəu.”

¹⁹Təma, ka maləm gadlagadla Musa ka wawa'ar fərist tə gwa'a nda səya Yesu, aka a ngabiya tə nda ənda a təkəra nda ngə cha mər ba'ada nga, kəl nda ləvər kwa tə nda tsa nji.

²⁰Nda kwa gwa'a lakur səya Yesu na bikəu, ngə nda sə alenya nji ku pama nda, ka nda mərtə kərnənda wi nji dur. Nja sənda ka nda yi ngəya nyi ləbam nə Yesu ana chul jau nda nda kwa mərtə nyi, aka ga nda uya nyi na bikəu nda yi nacha huɗə ngwamna njir Roma nda na gyalkur.

²¹Ngə nji'inda nja sə inda yi nar nyi nə Yesu, “Maləm, a zəndəbiyatə ea ɓwanya ngha ana dlədləɓə nghə jiri, ya a da ko tazhira wa, ana ko dlədləɓə ɓwanya Hyel nə nji tsa'atsa'a.

²²Yau, ma ko la'a ya, tsa'atsa'a tanyi ea ki tsachi nə Kaisar[7] zəma aa a da tsa'atsa'a wa?”

²³Kəl ja, Yesu zəndəbiyatə kwakunakur kənda, ngə cha nar nda,

²⁴“Char ɗa ma kwaba. Səlirma wa ana tləmər wa ngə tə kwaba na?” Ngə nda na, “Nə Kaisar nga.”

²⁵Ngə cha nar nda, “Yau, nənyi ma sənda nə Kaisar nə Kaisar, sənda nə Hyel tsəu hya nənyi nə Hyel.”

²⁶A da nda nau səya nyi na ɓwanya mar nji wa. Nda bəgəu nda kwa mər məngəl ana chul wum nda cha wum nənda.

²⁷Alenya njir Saduki, inda kwa na a hya'atər nji kuɗəkuɗə da wa, tə shili da Yesu ga na,

²⁸“Maləm, Musa tə tsəfəbiya ea gadlagadla na, cha na, ‘Ma nda ta ga ngyar mala a ngulisha'a da wa, zamə nyi kwa kina ɓwagu tsər na mala nda cha uya nyi ngulisha'a.’

²⁹Alenya nji da haaɗa, məɗəfə nda tə adan nda. Zə'ualə kənda tə həbiya mala ga tah, a zər da wa.

³⁰Mətləkunyi nda ɓwagu tsər na mala nda ga tah, a zər da wa.

³¹Əngə makərkunyi. Ngə a ɗa dəhə nda məɗəfa inda tə ɓwa tsər na mala nda, nda kuɗə a ngulisha'a da wa.

³²Ngə mala nda da tə ma'a nacha.

³³Yau, pəshir hya'atər nji kuɗəkuɗə ja ya, mala wa cho ɗa kara? Aka dəhə nda məɗəfə hə nyi ti.”

³⁴Ngə Yesu tə nar nda, “Aku dunəya na, shili kwa hə mahi'i, mahi'i tsəu kwa ɗəwa,

³⁵ya aku bəji nda kwa shili, nji'inda pəlakər hya'atə ku hwa, a da nda kwa hə mahi'i wa, ya a mahi'i da kwa ɗəu wa.

³⁶A laku da nda kwa ɓəla tə səkə wa, aka nda kwa ɗa wi ka chama Hyel. Nda kwa ɗa nguli Hyel aka a hya'atə tənda ku hwa.

³⁷Ya mada Musa chabiya ti tə babal ənda nji'inda tə kuɗə kwa hya'ati. Aku mafakə hu'u nda kwa gəɗə ku zər wu nda tsə'u, cha nga Tlakəu, ‘Nacha ngə Hyel nə Ibrahim, Hyel nə Ishaku, ana Hyel nə Jakop.’

³⁸A da Hyel nə nji kuɗəkuɗə cha wa, kəl nda Hyel nji'inda na pi. A nənyi, dəhə nji na pi.”

³⁹Kəl alenya maləm gadlagadla Musa tə ndəra ga na, “Maləm, pətə kə tsa'atsa'a!”

⁴⁰A nda ɓəla uya dunamar jau nyi vanya sə səkə wa.

⁴¹Yesu tə jau nda, “Ma ngə njo na Kəristi zər Dauda?

⁴²Dauda na kərnyi tə na aku Likatəkatə Dəla nda Karti, Tlaka nar nyi nə tlakə ɗa, ‘Ngyata nghə tə chisəma ya,

⁴³kəl ya fəu njir mər dawa naka a da kiɗa hya ka.’

⁴⁴Macha Dauda nga nyi Dləuya, ‘Tlakə ɗa.’ Aman cho ɗa ka zər nyi tsəu'a?”

⁴⁵Yesu tə ndər nə shawa nyi biyamar nji,

⁴⁶“Gəla ma hya da ba'a ɗa wi ka maləm gadlagadla ina! Nanda ingə kwa i ha ləkutə wawa'a ana nja usa nda ana səli tə suku, nda kwa i nda ngya tə sər ngya wawa'a biyama ku vi pətlənya, ana sər ngya tsəkəɗə tə vir ladər.

⁴⁷Dəhə ka ənga a da nda kwa ngatə kuzhir ɗiya ana dləu sər mahi'ifi wa, nda kwa mərtə kərnənda wi nji dur təwa pətlənya tərkusəu ku pama nji. Aka ənga, nəuma kənda kwa ndiya nə alenya nji.”