Read nya huba Luka 21 Bible Online

Luka 21 - nya huba bible

Luka 21

¹Yesu tə har kər ga la'a ənda njir gəna kwa shili na ga'a nə Hyel, nda kwa pə gu məɗəwa nə mbwa'ala.

²Ngə cha la'a vanya malafi ɗaliɗali tə shili fəu sulai mətləu.

³Kəl Yesu tə na, “Jiri yo nar hi, sənda malafi ɗaliɗali na fəu ndiya tə nə alenya nji dəhəu.

⁴Aka nda uyatsə ku 'ualkura sənda tsa nda, kəl ja, mala nə nənyi, aku ɗali nyi, cha fa'atə dəhə sənda cho ngya kari ga shili pəu.”

⁵Alenya nji tə ghəya na ɓwanya təkəra Mbwa'alə Hyel, ana chul hangu nda nja hər ni, ana ənda nja ɓatlətə nyi na sə mənakə inda nja tsəmti. Ngə Yesu tə na,

⁶“Bəji kwa da shili, nda njo huhuɓənda dəhəu, a da njo ngyar mada hangu zhang təkəra vanyi wa.”

⁷Ngə nda jau nyi ga na, “Maləm, sakamanə sə'ingə kwa ɗa? Mi sənda kwa char ənda sə'ingə kaɗə ɗa?”

⁸Ngə cha nar nda, “Gəla ma tsa nji da shandə hi kər. Aka nji ɗang kwa shili ku tləm ɗa, nda kwa na ‘Naya ngə nacha,’ nda kwa na tsəu bəra, bəji ɗatə ləhəu. Əngwa hya da nəu nda wa.

⁹Ma hya ngatə nja kwa pa, ana tlə mwali, əngwa hya da ləvər wa. Tuku ngə sə'ingə kwa ghəya na shili, kəl ja, a bəji ngə da taa ɗa gwadagə wa.”

¹⁰Cha tsakətə na, “Vanya hə'i kwa pa na vanya hə'i, ka təl ka təl tsəu kwa pa kərnənda.

¹¹Hə'i kwa dzədzə ɗimiɗimi, ana huɓə ba'a shiləkə pampamə ku hə'i pampaməu. Nja kwa la'a sər ləvəra ana sər muniya ɗang kwa səya kya huɗamələm.

¹²Təvi sə ingə dəhə kwa ɗa, nda kwa səya hi aka ga nja ɗa məndza'u nahi. Nda kwa yi na hi ku vi pətlənya njir Yahuda, nda kwa fəu hi ku jarum. Njo yi nahi mar təl ka njirawawa'a aka tləm ɗa.

¹³Sə ingə kwa nə hi lakur pə ɓwanya mənakə təkəra ya.

¹⁴Aka ənga hya ɓatliya ku ɗufwa hi, ngwa hya da ɗəngha təkəra ənda hyo həbiya kərnəhi wa.

¹⁵Aka yo fəu ɓwanya ana dəma ɗa ku nya hi, ənda mada zhang ku pama njir dawa kəhi da kwa nau shabiya, ndara cha kəpal sənda hyo pə wa.

¹⁶Ma'a ka njir yah hi ka zamən hi, ana njikə hi ka bazhi kəhi kwa tləɗanda hi, nda kwa tsəya alenya nji ku pama hi

¹⁷Madawa kwa ngya hi aka tləm ɗa.

¹⁸Kəl ja, a mada zhang ku shishir kəra hi da kwa sa wa.

¹⁹Ma hya səsə'ua hyo uya mbəɗa.”

²⁰Ma hya la'a ləvaləva i'i tə ɓandə Urshalima, hya zəndəbiya ənda kaɗə nja dlanda nyi.

²¹Yau, nji'inda na ngya ku hə'i Yahudiya tuku nda təra na hwi gyo mə i'i. Nji'inda ku ta mələm dəgal nda hwi biya, nji'inda ku nguli mələm tsəu əngwa nda da ba'a hwi gu ta mələm dəgal wa.

²²Aka hanyi inga, hanyir kisəkur Hyel inga, ka ga nja nyabiya sənda ɓwanya Hyel tə na.

²³Sər təhuɗə na mahi'i huɗəu ana mahi'i nda na ngulisha'a nya 'ua nda ku bəji nga! Aka ɓwaɓwatə kwa shili tə hə'i gagaɗa, ya huɗətlar Hyel kwa səya təkəra nji'ina

²⁴Njo kuɗənda alenya nji ku pa, alenya nji tsəu njo fa'atə nda ka mavi'i kyatə dəhə alenya hə'i nə dunəya. Nji'inda pa'a da njir Yahuda kwa shili kura Urshalima ba'a ngyata nda kwa, kəl ma bəji nda Hyel tə tlatsə nda tə nyabiyadza.

²⁵“Hyo la'a sər muniya tə pəchi, hya, ana sasəlga. Aku dunəya tsəu jigadəmar njir hə'i dunəya dəhə kwa hya'ati, nda kwa wi aka ləvər tsafa ana məlləm nda fa'a kwa məra.

²⁶Nji kwa ɗa wi nji kuɗəkuɗa aka ləvəra, nda kwa səkə sə inda kwa shili təkəra dunəya. Aka gyalkur huɗamələm i kwa dzədzi.

²⁷A tə bəji ngə ja, nda kwa la'a Zər Ndə kwa səya kya huɗamələm ku ləmbəkəu, ana gyalkur ku səli nyi.

²⁸Ma sə ingə tə ghəya na ɗa hya ta'i tə hya hi, aka mbəɗə kəhi ɗatə ləhəu.”

²⁹Ngə Yesu tə mərtə nda vanya ba'ada ga na, “Ndzamar ma wur kanda ka alenya wua.

³⁰Manda ghəya dla'a kərnəhi zəndətə ənda səyar jomən ɗati ləhəu.

³¹Əngə tanyi ja, ma sakanda hya la'a sə ingə kwa ɗa, hya zəndə ənda təlkur Hyel ɗatə ləhəu.”

³²“Jiri yo nar hi, a njir bəji nə da kwa kuɗə wa, kəl dəhə sə ingə tə ɗa.

³³Huɗamələm na hə'i kwa zhazha, kəl ja, ɓwanya ɗa da kwa zhazhə pa'a wa.”

³⁴“Ngya ma na ɓəla ja. Ngwa hya da ba'a i səma ana sa sə sasa gagaɗa ba'a ɗəngha təkəra ngyar dunəya da ba'a hənda jigadəma kəhi wa. Ma'a əngə wa, pəchi ngə kwa shili səya hi a da na zəndəkur kəhi wa wi ləbam.

³⁵Aka cho shili təkəra dəhə njir dunəya.

³⁶Hya ngya na ɓəla mada sakamani, hyo pətlənya ka ga hya uya dunamar mbəɗə tsa dəhə sə inda kwa ɗa, ana hya ta'i biyamar Zər Ndəu.”

³⁷Aku hanyi inga, Yesu kwa dlədləɓə nə nji ku Mbwa'alə Hyel, kəl ja, ma akə tə ɗa cho biya cho təra gyatə Dəgəl Zaitun aka hanyi.

³⁸Tsəɗakə mbudla tsə'u dlama nji kwa shili həya nyi, aku Mbwa'alə Hyel ka nda səhimi da cha.